ପାଟଣାଗଡ଼, ୦୪/୦୪: ବହୁଚର୍ଚ୍ଚିତ ପାଟଣାଗଡ଼ ପାର୍ସଲବୋମା ବିସ୍ଫୋରଣ ମାମଲାର ମୁଖ୍ୟ ଅଭିଯୁକ୍ତ ପୁଞ୍ଜିଲାଲ ମେହେର ଗୁରୁବାର ଅତିରିକ୍ତ ଜିଲ୍ଲା ଦୌରାଜଜ୍ଙ୍କ କୋର୍ଟରେ ନିଜ ପକ୍ଷ ରଖିଛନ୍ତି । ପାର୍ସଲବୋମା ବିସ୍ଫୋରଣ ମାମଲାରେ ତାଙ୍କର କୌଣସି ସମ୍ପୃକ୍ତି ନାହିଁ ବୋଲି ସେ ପକ୍ଷ ରଖି କହିଛନ୍ତି । ପାର୍ସଲବୋମା ବିସ୍ଫୋରଣ ମାମଲାକୁ ନେଇ ପୁଞ୍ଜିଲାଲଙ୍କ ନାମରେ ଯାହାସବୁ ଅଭିଯୋଗ ରହିଛି ତାହା ସମ୍ପୂର୍ଣ୍ଣ ମିଥ୍ୟା । ଏ ସମ୍ପର୍କିତ ସମସ୍ତ ତଥ୍ୟ ଓ ପ୍ରମାଣ ପୁଞ୍ଜିଲାଲ କୋର୍ଟଙ୍କୁ ଜଣାଇଥିବା ତାଙ୍କ ଓକିଲ ପ୍ରମୋଦ ମିଶ୍ର ଗଣମାଧ୍ୟମକୁ ସୂଚନା ଦେଇଛନ୍ତି।
ପୁଞ୍ଜିଲାଲ ନିଜର ପରିତ୍ରାଣ ସାକ୍ଷ୍ୟ ଦେଇଥିବାବେଳେ ପ୍ରାୟ ଅଢ଼େଇ ଘଣ୍ଟା ଧରି ଯୁକ୍ତିତର୍କ ହୋଇଥିଲା । ଯୁକ୍ତିତର୍କ ସମୟରେ ମାମଲାରେ କୌଣସି ସମ୍ପୃକ୍ତି ନ ଥିବା ନେଇ ପୁଞ୍ଜିଲାଲ୍ କୋର୍ଟକୁ ଜଣାଇଥିଲେ ବୋଲି ସରକାରୀ ଓକିଲ ଆଶିଷ ଚନ୍ଦନ ପ୍ରକାଶ କରିଛନ୍ତି । ଉକ୍ତ ମାମଲାରେ ଗତ ମାର୍ଚ୍ଚ ୪ରେ ଅତିରିକ୍ତ ଜିଲ୍ଲା ଦୌରାଜଜଙ୍କ କୋର୍ଟରେ ପୁଞ୍ଜିଲାଲଙ୍କ ବୟାନ ରେକର୍ଡ କରାଯାଇଥିଲା । ସେହିଦିନ କୋର୍ଟ ତାଙ୍କୁ ପରିତ୍ରାଣ ସାକ୍ଷୀ ଦେବାକୁ ଇଚ୍ଛୁକ କି ବୋଲି ପଚାରିଥିଲେ । ସେ ସହମତି ଜଣାଇବା ପରେ କୋର୍ଟ ପକ୍ଷରୁ ଏଥିଲାଗି ଏପ୍ରିଲ ୩ ତାରିଖ ଧାର୍ଯ୍ୟ କରାଯାଇଥିଲା । ଏନେଇ ପୁଞ୍ଜିଲାଲଙ୍କ ଓକିଲ କୋର୍ଟକୁ ଏକ ପିଟିସନ ମଧ୍ୟ ଦେଇଥିଲେ । ସେହି ଆଧାରରେ ପରିତ୍ରାଣ ସାକ୍ଷ୍ୟ ଗ୍ରହଣ କରାଯାଇଥିଲା ।
ଏଥିପାଇଁ ପୁଞ୍ଜିଲାଲକୁ ବଲାଙ୍ଗିର ମୁଖ୍ୟ କାରାଗାରରୁ କଡ଼ା ସୁରକ୍ଷା ବଳୟରେ ପାଟଣାଗଡ଼ ଅତିରିକ୍ତ ଜିଲ୍ଲା ଦୌରାଜଜ୍ଙ୍କ କୋର୍ଟରେ ହାଜର କରାଯାଇଥିଲା । ଆସନ୍ତା ୧୬ ତାରିଖରେ ପୁଞ୍ଜିଲାଲ ପୁଣି ପରିତ୍ରାଣ ସାକ୍ଷ୍ୟ ଦେବେ ବୋଲି କୋର୍ଟ ପକ୍ଷରୁ ତାରିଖ ଧାର୍ଯ୍ୟ କରାଯାଇଛି ।
ସୂଚନାଯୋଗ୍ୟ, ୨୦୧୮ ଫେବ୍ରୁଆରୀ ୨୩ରେ ପାଟଣାଗଡ଼ ପାର୍ସଲ ବୋମା ବିସ୍ଫୋରଣ ଘଟଣାରେ ନବବିବାହିତ ସୌମ୍ୟଶେଖର ଓ ତାଙ୍କ ଜେଜେମା ଜେମାମଣି ସାହୁଙ୍କ ମୃତ୍ୟୁ ଘଟିଥିଲା । ସୌମ୍ୟଶେଖରଙ୍କ ସ୍ତ୍ରୀ ରିମାରାଣୀ ଗୁରୁତର ହୋଇ ଦୀର୍ଘଦିନ ଧରି ଡାକ୍ତରଖାନାରେ ଚିକିତ୍ସିତ ହୋଇଥିଲେ ।କ୍ରାଇମବ୍ରାଞ୍ଚ ତଦନ୍ତ କରି ଭଇଁଷା କଲେଜର ଇଂରାଜୀ ଅଧ୍ୟାପକ ପୁଞ୍ଜିଲାଲ ମେହେରଙ୍କୁ ମୁଖ୍ୟ ଏବଂ ଏକମାତ୍ର ଅଭିଯୁକ୍ତ ଭାବେ ଗିରଫ କରିଥିଲା ।
