ଭୁବନେଶ୍ବର,୪/୪ : ସଂସଦରେ ପାରିତ ହୋଇଛି ଓ୍ବାକଫ ସଂଶୋଧନ ବିଧେୟକ । ଉଭୟ ଗୃହରେ ଚର୍ଚ୍ଚା ପରେ ଏହା ଭୋଟିଂ ଆଧାରରେ ପାସ୍ ହୋଇଛି । ଲୋକସଭାରେ ବିଲ୍ ସପକ୍ଷରେ ୨୮୮ ଖଣ୍ଡ ଭୋଟ୍ ପଡ଼ିଥିବା ବେଳେ ରାଜ୍ୟସଭାରେ ୧୨୮ ସଦସ୍ୟ ବିଲ୍ ସପକ୍ଷରେ ଭୋଟ୍ ଦେଇଥିଲେ । ବିଲ୍କୁ ରାଷ୍ଟ୍ରପତିଙ୍କ ସ୍ବୀକୃତି ମିଳିବା ପରେ ଆଇନରେ ପରିଣତ ହେବ । ତେବେ ଏ ସବୁ ଭିତରେ ରାଜ୍ୟସଭାରେ ବିଧେୟକକୁ ନେଇ ବିଜେଡି ଯେଉଁ ଆଭିମୁଖ୍ୟ ରଖିଛି, ତାହାକୁ ନେଇ ଦଳ ଏବେ ସବୁଠି ସମାଲୋଚିତ ହେଉଛି ।
ରାଜ୍ୟସଭାରେ ଓ୍ବାକଫ୍ ବିଲ୍ ପାରିତ ହେବା ପୂର୍ବରୁ ବିଧେୟକକୁ ବିଜୁ ଜନତା ଦଳ ସମର୍ଥନ କରିବ ନାହିଁ ବୋଲି ଘୋଷଣା କରିଥିଲା । ହେଲେ ପରବର୍ତ୍ତି ସମୟରେ ନିଷ୍ପତ୍ତିରୁ ଓହରି ଯାଇଥିଲା । ରାଜ୍ୟସଭା ସାଂସଦ ସସ୍ମିତ ପାତ୍ର ନିଜ ସୋସିଆଲ୍ ମିଡିଆ ଆକଉଣ୍ଟ ଏକ୍ସରେ ପୋଷ୍ଟ କରି ଲେଖିଥିଲେ, ବିଜୁ ଜନତା ଦଳ ଧର୍ମନିରପେକ୍ଷ ପାର୍ଟି । ଦଳ ସବୁ ଦଳ ଧର୍ମକୁ ବିଶ୍ବାସ କରେ । ସଂଖ୍ୟାଲଘୁ ସଂପ୍ରଦାୟକୁ ସମ୍ମାନ କରେ । ତେଣୁ ଓ୍ବାକଫ୍ ବିଲ୍କୁ ବିଜେଡି ସାଂସଦମାନେ ନିଜ ବିବେକ ଅନୁଯାୟୀ ସମର୍ଥନ କରିବେ । ଏହାକୁ ନେଇ ରାଜ୍ୟ ରାଜନୀତିରେ ଚର୍ଚ୍ଚା ଜୋର୍ ଧରିଛି । କେବଳ ଦଳ ବାହାରେ ନୁହେଁ ଖୋଦ୍ ବିଜେଡି ଭିତରେ ବୟାନବାଜି ଆରମ୍ଭ ହୋଇଛି ।
ବିଜେଡି ବରିଷ୍ଠ ନେତା ତଥା ଘଷିପୁରା ବିଧାୟକ ବଦ୍ରି ନାରାୟଣ ପାତ୍ର ନିଜ ସାଂସଦମାନଙ୍କୁ ଟାର୍ଗେଟ୍ କରିଛନ୍ତି । ସେ କହିଛନ୍ତି, ସଭାପତି ନବୀନ ପଟ୍ଟନାୟକ ରାଜ୍ୟସଭାରେ ଓ୍ବକଫ୍ ବିଲକୁ ବିରୋଧ କରିବା ପାଇଁ ସାଂସଦ ମୁନ୍ନା ଖାଁଙ୍କୁ ୨ଥର କହିଥିଲେ । କିନ୍ତୁ ପରେ ଏହି ନିଷ୍ପତ୍ତି କେମିତି ବଦଳିଲା ? ଏଥିରେ ବୋଧ ହୁଏ କିଛି ଖେଳ ହୋଇଛି । ସଭାପତି ନିଜେ ମଧ୍ୟ ଏହାକୁ ନେଇ ଆଶ୍ଚର୍ଯ୍ୟ ହୋଇଛନ୍ତି । ଏହାର କାରଣ ଖୋଜା ଚାଲିଛି । ହୁଇପ୍ କାହିଁକି ରହିଲାନି । ତାହା ବର୍ତ୍ତମାନ ସନ୍ଦେହ ଘେରରେ ବୋଲି କହିଛନ୍ତି ଘସିପୁରା ବିଧାୟକ । ସେପଟେ ବଦ୍ରି ପାତ୍ରଙ୍କ ବୟାନ ଉପରେ ନିଆଁରେ ଘିଅ ଢାଳିବା ଭଳି କାର୍ଯ୍ୟ କରିଛନ୍ତି ବିଜେଡି ବରିଷ୍ଠ ନେତା ପ୍ରଫୁଲ୍ଲ ସମାଲ । ସେ ଓ୍ବାକଫ୍ ବିଧେୟକକୁ ନେଇ ସୁପ୍ରିମୋଙ୍କୁ ଚିଠି ଲେଖିଛନ୍ତି ।
ସେ ଚିଠିରେ ଉଲ୍ଲେଖ କରିଛନ୍ତି, ବିଜେଡି ଗଠନ ହେବା ଦିନଠାରୁ ସଂଖ୍ୟାଲଘୁ ସମ୍ପ୍ରଦାୟଙ୍କ ହିତ ପାଇଁ କାର୍ଯ୍ୟ କରିଆସୁଛି ଏବଂ ଆଗାମୀ ଦିନରେ ମଧ୍ୟ ଏହି କାର୍ଯ୍ୟକୁ ଜାରି ରଖିବ ଦଳ । କିନ୍ତୁ ଗୁରୁବାର ଓ୍ବାକଫ୍ ସଂଶୋଧନ ବିଲ୍ ରାଜ୍ୟସଭାରେ ଗୃହୀତ ପୂର୍ବରୁ ରାଜ୍ୟସଭା ସାଂସଦ ସସ୍ମିତ ପାତ୍ର ସୋସିଆଲ୍ ମିଡିଆ ପ୍ଲାଟଫର୍ମ ଏକ୍ସରେ ଦେଇଥିବା ମନ୍ତବ୍ୟ ଦୁଃଖଦାୟକ ଓ ଅତ୍ୟନ୍ତ ଦୁର୍ଭାଗ୍ୟଜନକ। ସଂଖ୍ୟାଲଘୁ ସମ୍ପ୍ରଦାୟର ବିଶ୍ବାସ ଭାଜନ ହେବା ପରିବର୍ତ୍ତେ ସାଂସଦଙ୍କ ଏଭଳି ମନ୍ତବ୍ୟ ଦଳକୁ କ୍ଷତି ପହଞ୍ଚାଇବ । ବୋଲି ପ୍ରଫୁଲ୍ଲ ସାମଲ କହିଛନ୍ତି । ତେଣୁ ସୁପ୍ରିମୋ ଏ ସମ୍ବନ୍ଧରେ ପୁଣି ଥରେ ବିଚାରବିମର୍ଶ କରି ପଦକ୍ଷେପ ନେବାକୁ ଦାବି କରିଛନ୍ତି ବରିଷ୍ଠ ନେତା ପ୍ରଫୁଲ୍ଲ ସାମଲ ।
ଅନ୍ୟପଟେ ଓ୍ବାକଫ ବିଲ୍କୁ ନେଇ ଦଳ ଭିତରେ ବୟାନବାଜି ପରେ ଶୁକ୍ରବାର ସଂଧ୍ୟାରେ ନବୀନ ନିବାସରେ ଗୁରୁତ୍ବପୂର୍ଣ୍ଣ ବୈଠକ ହୋଇଯାଇଛି । ଏହି ମିଟିଂରେ ଅନେକ ନେତା ସାମିଲ୍ ଥିଲେ । ବରିଷ୍ଠ ବିଜେଡି ନେତା ପ୍ରସନ୍ନ ଆଚାର୍ଯ୍ୟ, ଭୂପିନ୍ଦର ସିଂ, ଅଶୋକ ପଣ୍ଡା, ପଦ୍ମନାଭ ବେହେରା, ନୃସିଂହ ସାହୁ ଆଦି ଉପସ୍ଥିତ ଥିଲେ । ବୈଠକ ପରେ ବରିଷ୍ଠ ନେତା ପ୍ରସନ୍ନ ଆଚାର୍ଯ୍ୟ ପ୍ରତିକ୍ରିୟା ରଖିଛନ୍ତି । ସେ କହିଛନ୍ତି, ସୁପ୍ରିମୋଙ୍କ ସହିତ ଏ ବାବଦରେ ଆଲୋଚନା ହୋଇଛି । ବିଜୁ ଜନତା ଦଳ ଏକ ଧର୍ମନିରପେକ୍ଷ ଦଳ । ପୂର୍ବରୁ ସଂଖ୍ୟାଲଘୁଙ୍କ ସହିତ ଥିଲୁ, ବର୍ତ୍ତମାନ ଅଛୁ ଏବଂ ଆଗୁକୁ ଧର୍ମନିରପେକ୍ଷ ମଧ୍ୟ ରହିବ ବୋଲି ପ୍ରସନ୍ନ ଆଚାର୍ଯ୍ୟ କହିଛନ୍ତି ।
