ଚଣ୍ଡିଗଡ଼,୦୪/୦୪: ସୋସିଆଲ ମିଡିଆରେ ‘ଇନ୍ଷ୍ଟା କୁଇନ୍’ ନାଁରେ ଜଣା ପଞ୍ଜାବ ପୁଲିସର ବରିଷ୍ଠ ଲେଡି କନ୍ଷ୍ଟେବଳ ଅମନଦୀପ କୌରଙ୍କୁ ବୁଧବାର ହେରୋଇନ୍ ସହ ଗିରଫ କରାଯାଇଥିଲା । ସେ ହରିୟାଣାରେ ଏହି ଡ୍ରଗ୍ସ ବିକ୍ରି କରୁଥିଲେ । ଗୁରୁବାର ତାଙ୍କୁ ଚାକିରିରୁ ବରଖାସ୍ତ କରାଯାଇଛି । ନିଜ ଥାର୍ ଗାଡିରେ ହେରୋଇନ୍ ଯୋଗାଣ କରିବାକୁ ଯାଉଥିବାବେଳେ ଆଣ୍ଟି ନାର୍କୋଟିକ୍ସ ଟାସ୍କ ଫୋର୍ସ ଓ ବଠିଣ୍ଡା ପୁଲିସର ଟିମ୍ କୌରଙ୍କୁ ବାଦଲ ରୋଡ୍ରେ ଅଟକାଇଥିଲା । ପୁଲିସ ତାଙ୍କ ଗାଡି ଅଟକାଇବାରୁ ପ୍ରଥମେ ସେ କର୍ମଚାରୀମାନଙ୍କୁ ଧମକ ଦେଇଥିଲେ । କିନ୍ତୁ ତାର କୌଣସି ପ୍ରଭାବ ନ ପଡିବାରୁ ଚମ୍ପଟ ମାରିବାକୁ ଉଦ୍ୟମ କରିଥିଲେ । ପୁଲିସ ଟିମ୍ ତାଙ୍କର ପିଛା କରି ତାଙ୍କୁ ଗିରଫ କରିଥିଲା । ଗାଡିର ଯାଞ୍ଚ କରାଯିବାରୁ ଗିଅର ବକ୍ସରୁ ୧୭.୭୧ ଗ୍ରାମ ହେରୋଇନ୍ ମିଳିଥିଲା । ଲେଡି କନ୍ଷ୍ଟେବଳ ମାନସାରେ ମୁତୟନ ଥିବାବେଳେ ବଠିଣ୍ଡା ପୁଲିସ ଲାଇନ୍ ସହ ମଧ୍ୟ ତାଙ୍କୁ ଆଟାଚ୍ କରାଯାଇଥିଲା ।
ଆଇଜିପି ହେଡକ୍ୱାର୍ଟର ସୁଖଚୈନ୍ ସିଂହ କହିଛନ୍ତି, ହେରୋଇନ୍ ସହ ଧରା ପଡିଥିବା ଲେଡି କନ୍ଷ୍ଟେବଳଙ୍କୁ ତୁରନ୍ତ ଚାକିରିରୁ ବରଖାସ୍ତ କରାଯାଇଛି । ସରକାରୀ ନିୟମକୁ ପାଳନ କରି ଧାରା ୩୧୧ ଅନୁସାରେ ତାଙ୍କ ବିରୋଧରେ ଏହି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି । ତାଙ୍କର ସମସ୍ତ ସମ୍ପତ୍ତିକୁ ମଧ୍ୟ ଜବତ କରାଯିବ । ସେ ନିଜେ ନିଶା କରୁଥିବାବେଳେ ତାଙ୍କର ଡୋପ୍ ପରୀକ୍ଷା କରାଯିବ ବୋଲି ସୂଚନା ମିଳିଛି ।
ବଠିଣ୍ଡା ଡିଏସ୍ପି ସିଟି-୧ ହରବଂଶ ସିଂହ କହିଛନ୍ତି, କିଛି ପୁଲିସକର୍ମୀ ନିଶାଦ୍ରବ୍ୟ ଚାଲାଣ କରୁଥିବା ନେଇ ଅଭିଯୋଗ ଆସୁଥିଲା । ସେଥିମଧ୍ୟରେ ଜଣେ କନ୍ଷ୍ଟେବଳ ସାମିଲ ଥିବାବେଳେ ସେ ଥାର୍ ଗାଡି ଚଳାଉଥିବା ନେଇ ଖବର ମିଳିଥିଲା । ଏହାପରେ ତାଙ୍କୁ ଧରିବାକୁ ମିଳିତ ଅପରେସନ୍ ହୋଇଥିଲା । ସୂଚନାଥାଉକି, ଅମନଦୀପ ପୁଲିସ ବିଭାଗରେ ‘ମେରୀ ଜାନ୍’ ନାଁରେ ପ୍ରସିଦ୍ଧ ଥିଲେ । ଚାକିରିରୁ ଛୁଟି ନେଇ ସେ ହେରୋଇନ କିଣି ତାର ବ୍ୟବସାୟ କରୁଥିଲେ । ସେହିପରି ସୋସିଆଲ୍ ମିଡିଆରେ ତାଙ୍କର ପ୍ରାୟ ୧୪ ହଜାର ଫଲୋଅର୍ସ ଅଛନ୍ତି ।
