ଫିରିଙ୍ଗିଆ,୪/୪ : ରାଜ୍ୟ ଓ କେନ୍ଦ୍ର ସରକାର ସହରାଞ୍ଚଳଠାରୁ ଗ୍ରାମାଞ୍ଚଳମାନଙ୍କୁ ଗମନାଗମନର ବ୍ୟବସ୍ଥା ପାଇଁ ରାଜକୋଷରୁ କୋଟିକୋଟି ଟଙ୍କା ଖର୍ଚ୍ଚ କରି ପ୍ରଧାନମନ୍ତ୍ରୀ ଗ୍ରାମ୍ୟ ସଡ଼କ ଯୋଜନା ମାଧ୍ୟମରେ ପକ୍କା ସଡ଼କ ନିର୍ମାଣ କରୁଛନ୍ତି I କିନ୍ତୁ ଅନେକ ଜାଗାରେ ବିଭାଗୀୟ ଅବହେଳା ଓ କିଛି ଅସାଧୁ ଠିକାଦାରମାନଙ୍କ ଅବହେଳା ପାଇଁ ଏହି ରାସ୍ତା କାମ ଗୁଡ଼ିକ ବର୍ଷ ବର୍ଷ ଧରି ସମ୍ପୂର୍ଣ୍ଣ ହୋଇପାରୁ ନାହିଁ I ଫଳରେ ରାସ୍ତା ପାଇଁ ସାଧାରଣ ଜନସାଧାରଣଙ୍କୁ ଯାତାୟତ ପାଇଁ ନାହିଁ ନ ଥିବା ଅସୁବିଧାର ସମ୍ମୁଖୀନ ହେବାକୁ ପଡ଼ୁଛି I ଏଭଳି ଏକ ରାସ୍ତା କାମ ଦେଖିବାକୁ ମିଳିଛି ଆଦିବାସୀ ବହୁଳ କନ୍ଧମାଳ ଜିଲ୍ଲା ଫିରିଙ୍ଗିଆ ବ୍ଲକ ଅଧୀନରେ ଥିବା ଲୋଇସିଂ ପଞ୍ଚାୟତରେ I
ସୂଚନା ଅନୁସାରେ ଗତ ୫ ବର୍ଷ ତଳେ ଏହି ଲୋଇସିଂ ପଞ୍ଚାୟତ ମୁଖ୍ୟାଳୟଠାରୁ ବଣପାହାଡ଼ ଘେରା ଉପାନ୍ତ ଅଞ୍ଚଳ କୁହାଯାଉଥିବା ଏହି ଲୋଇସିଂ ପଞ୍ଚାୟତର କୁମ୍ଭାହରୁ ପର୍ଯ୍ୟନ୍ତ ସ୍ଥାନୀୟ ବାସିନ୍ଦାଙ୍କ ଦାବି ପରେ ତତ୍କାଳୀନ ବିଧାୟକ ଅଙ୍ଗଦ କହଁରଙ୍କ ସୁପାରିଶ କ୍ରମେ ଏକ ପକ୍କା ରାସ୍ତା ନିର୍ମାଣ ପାଇଁ ଅର୍ଥ ମଞ୍ଜୁର କରାଯାଇଥିଲା I କାମଟିକୁ ପ୍ରଧାନମନ୍ତ୍ରୀ ଗ୍ରାମ୍ୟ ସଡ଼କ ଯୋଜନା ଅଧୀନରେ କରାଯାଉଥିବାବେଳେ ଗ୍ରାମ୍ୟ ଉନ୍ନୟନ ବିଭାଗ ଏହି ରାସ୍ତା ନିର୍ମାଣର ଦାୟିତ୍ୱ ନେଇଛି ଓ ବଲାଙ୍ଗୀରର ଆକାଶ ଅଗ୍ରୱାଲ ନାମକ ଜଣେ ଠିକାଦାରଙ୍କୁ ଏହି କାମଟି ଦିଆଯାଇଛି I ତେବେ କାମଟି ଆରମ୍ଭ ହେବାର ପାଞ୍ଚ ବର୍ଷ ବିତି ଯାଇଥିଲେ ମଧ୍ୟ ସରିପାରୁନଥିବାବେଳେ ସମ୍ପୃକ୍ତ ଠିକାଦାର ଜଣକ ରାସ୍ତା ଉପରେ କେବଳ ଗୋଡ଼ି ଓ ମାଟି ପକାଇ ଚୁପ ହୋଇ ବସି ରହିଛନ୍ତି I
ସେପଟେ ବର୍ତ୍ତମାନ ରାସ୍ତା ଉପରେ ପଡ଼ିଥିବା ଗୋଡ଼ି ଓ ମେଟାଲ ଉଠିଯାଇ ଏକ ପ୍ରକାର ମରଣ ଯନ୍ତାରେ ପରିଣତ ହୋଇଥିବାବେଳେ ନିତିଦିନ ଏହି ରାସ୍ତାରେ ଛୋଟବଡ଼ ଦୁର୍ଘଟଣା ଘଟି ଚାଲିଛି ଓ ଯିବା ଆସିବା ପାଇଁ ସ୍ଥାନୀୟ ଲୋକଙ୍କୁ ନାହିଁ ନ ଥିବା ଅସୁବିଧାର ସମ୍ମୁଖୀନ ହେବାକୁ ପଡୁଛି I ରାସ୍ତା କାମଟିକୁ ସରିବା ପାଇଁ ଅଞ୍ଚଳବାସୀଙ୍କ ସହ ସ୍ଥାନୀୟ ରାଜନେତାମାନେ ବାରମ୍ବାର ଅଭିଯୋଗ କଲା ପରେ ମଧ୍ୟ ବିଭାଗୀୟ ଅଧିକାରୀ ଓ ଯନ୍ତ୍ରୀ କୌଣସି ପଦକ୍ଷେପ ନେଉନଥିବାରୁ ଦିନକୁ ଦିନ ସ୍ଥାନୀୟ ଅଞ୍ଚଳରେ ଅସନ୍ତୋଷ ଦାନା ବାନ୍ଧିବାରେ ଲାଗିଛି I
ସୂଚନା ଯୋଗ୍ୟ ଯେ ଏହି ରାସ୍ତା ଉପରେ ଲୋଇସିଂ ପଞ୍ଚାୟତର କଟ୍ରକେତା, ତେତେଲପଡା, ଡାଲିଆପଡା, ଶୁନୁପାଙ୍ଗା, କୁଲୁମସ୍କା, କୁମ୍ଭାହାରୁ ଭଳି ପ୍ରାୟ ୧୦ରୁ ୧୧ଟି ଗ୍ରାମବାସୀ ନିର୍ଭର କରି ଆସୁଛନ୍ତି I ରାସ୍ତା କାମଟି ଅର୍ଦ୍ଧନିର୍ମିତ ଅବସ୍ଥାରେ ପଡି ରହିଥିବାବେଳେ ରାସ୍ତା ପାଇଁ ସମସ୍ୟା ଭୋଗୁଛନ୍ତି ସ୍ଥାନୀୟ ଲୋକେ I ରାସ୍ତା କାମ ଶୀଘ୍ର ସରିବା ପାଇଁ ପୂର୍ବତନ ବିଧାୟକ ଅଙ୍ଗଦ କହଁର, ସ୍ଥାନୀୟ ସରପଞ୍ଚ ଦୁଦର୍ଶନ କହଁର, ସମିତିସଭ୍ୟ କାଳିଆ କହଁରଙ୍କ ସହ ଅଞ୍ଚଳବାସୀ ବିଭାଗୀୟ ଅଧିକାରୀଙ୍କ ପାଖରେ ବାରମ୍ବାର ଅଭିଯୋଗ ମଧ୍ୟ କରି ଆସୁଛନ୍ତି I କିନ୍ତୁ ବିଭାଗର ଆନ୍ତରିକତା ଅଭାବ ଯୋଗୁଁ ଦୀର୍ଘ ପାଞ୍ଚ ବର୍ଷ ଧରି ରାସ୍ତାଟି ଅର୍ଦ୍ଧ ନିର୍ମିତ ଅବସ୍ଥାରେ ପଡ଼ି ରହିଛି I ଆଗାମୀ ଆଗାମୀ ଦିନରେ ରାସ୍ତା ନିର୍ମାଣ ସମ୍ପୂର୍ଣ୍ଣ ନ ହଲେ ବାଧ୍ୟ ହୋଇ ସ୍ଥାନୀୟ ଅଂଚଳବାସୀ ଆନ୍ଦୋଳନ କରିବେ ବୋଲି ଚେତାବନୀ ଦେଇଛନ୍ତି I ଅନ୍ୟପଟେ ଏହି ଅସମ୍ପୂର୍ଣ ରାସ୍ତା କାମ ବିଷୟରେ ଦାୟିତ୍ୱରେ ଥିବା ଗ୍ରାମ୍ୟ ଉନ୍ନୟନ ବିଭାଗର ଏସଡିଓ ସୁଶୀଲ ମହାନ୍ତିଙ୍କୁ ପଚାରିବରୁ ଚିରାଚରିତ ଢଙ୍ଗରେ କାମ ବନ୍ଦ ହୋଇ ନାହିଁ କାମ ଚାଲିଛି ବୋଲି କହିବା ସହ ଏହି ରାସ୍ତାର ବିପରୀତ ଦିଗରେ ଲୋଇସିଂଠାରୁ ମାଲାକେରିକୁ ଏକ ରାସ୍ତା ଚାଲିଛି ଓ ସେହି ରାସ୍ତା ମଧ୍ୟ ଏହି ରାସ୍ତା କାମ କରୁଥିବା ଠିକାଦାର କରୁଛନ୍ତି ସେଥିପାଇଁ ରାସ୍ତା କାମ ବିଳମ୍ବ ହେଉଛି ଓ ଖୁବଶୀଘ୍ର ଏହି ରାସ୍ତା କାମ ସମ୍ପୂର୍ଣ୍ଣ ହେବ ବୋଲି ସୂଚନା ଦେଇଛନ୍ତି I
