କଟକ,୪/୪ : ଚୌଦ୍ଵାର ବାଣିପଦା ପଞ୍ଚାୟତରେ ଥିବା ଇଡ଼କୋ ଜମିରେ ଓଡ଼ିଶା ସରକାରଙ୍କ ପ୍ରଦୂଷଣ ନିୟନ୍ତ୍ରଣ ବୋର୍ଡ ପକ୍ଷରୁ ବାୟୋ ମେଡ଼ିକାଲ ବର୍ଜ୍ୟ ବସ୍ତୁ ପରିଚାଳନା ପ୍ରକଳ୍ପ ସ୍ଥାପନ କରାଯିବ । ଏ ନେଇ ଆଜି ହେବାକୁ ଥିବା ଜନ ଶୁଣାଣିକୁ ସ୍ଥାନୀୟ ଗ୍ରାମବାସୀ ବିରୋଧ କରିଛନ୍ତି । ଆଗାମୀ ଦିନରେ ସରକାରଙ୍କ ପକ୍ଷରୁ ଅନ୍ୟ ଏକ ତାରିଖ ନିର୍ଦ୍ଧାରିତ କରାଯାଇ ଜନ ଶୁଣାଣି କରାଯିବ ବୋଲି ଅତିରିକ୍ତ ଜିଲ୍ଲାପାଳ କହିଛନ୍ତି ।
ଅନ୍ୟ ପକ୍ଷରେ ସ୍ଥାନୀୟ ଲୋକେ ଏହାକୁ ବିରୋଧ କରିଛନ୍ତି । କହିଛନ୍ତି ଏଠାରେ ପ୍ରକଳ୍ପ ନିର୍ମାଣ କରାଗଲେ ପରିବେଶ ପ୍ରଦୂଷଣ ହେବା ସହ ଏହାର ପ୍ରଭାବ ଜନବସତି ଉପରେ ପଡ଼ିବ । ତେଣୁ ଏହି ଅଞ୍ଚଳରେ ଏବେ କି ଆଗାମୀ ଭବିଷ୍ୟତରେ ଏହି ପ୍ରକଳ୍ପ କଲେ ଏହାକୁ ବିରୋଧ କରାଯିବ । ଏ ନେଇ ଘଟଣାସ୍ଥଳରେ ଉତ୍ତେଜନା ହେବାର ଆଶଙ୍କାରେ ଚୌଦ୍ଵାର ଥାନା ଆଇଆଇସିଙ୍କ ସମେତ ଶହେରୁ ଅଧିକ ପୋଲିସ ନିୟୋଜିତ ହୋଇଥିଲେ । ତେବେ ସ୍ଥାନୀୟ ଲୋକଙ୍କ ବିରୋଧ ହେବା ଫଳରେ ଉପସ୍ଥିତ ଅଧିକାରୀ ମାନେ ଫେରି ଯାଇଥିବା ଦେଖିବାକୁ ମିଳିଥିଲା ।
