ନୂଆଦିଲ୍ଲୀ: ହରିୟାଣାରେ ବିଜେପିକୁ ଲଗାତାର ତୃତୀୟ ଥର ବିଜୟୀ କରାଇବାରେ ବଡ଼ ଭୂମିକା ନେଇଥିବା ନେତା ନାୟବ ସିଂ ସୈନୀ ଅକ୍ଟୋବର ୧୫ ତାରିଖରେ ପୁଣି ଥରେ ରାଜ୍ୟର ମୁଖ୍ୟମନ୍ତ୍ରୀ ଭାବରେ ଶପଥ ନେଇପାରନ୍ତି । ଶପଥ ଗ୍ରହଣ ସମାରୋହ ଆୟୋଜନ କରିବା ଲାଗି ରାଜ୍ୟର ମୁଖ୍ୟ ଶାସନ ସଚିବଙ୍କ ଦ୍ବାରା ୧୦ ଜଣିଆ କମିଟି ଗଠନ କରାଯାଇଛି । ଶପଥ ଗ୍ରହଣ ସମାରୋହରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏବଂ ବିଜେପି ଶାସିତ ରାଜ୍ୟର ମୁଖ୍ୟମନ୍ତ୍ରୀମାନେ ଉପସ୍ଥିତ ରହିପାରନ୍ତି । ନିର୍ବାଚନ ସମୟରେ ନାୟବ ସିଂ ସୈନୀଙ୍କୁ ପୁଣି ଥରେ ରାଜ୍ୟର ମୁଖ୍ୟମନ୍ତ୍ରୀ କରାଯିବ ବୋଲି ବିଜେପି ଇସାରା ଦେଇଥିଲା ।
ଓବିସି ବର୍ଗରୁ ଆସିଥିବା ନାୟବ ସିଂ ସୈନୀ ବିଜେପିର ବଡ଼ ଭୋଟ୍ ବ୍ୟାଙ୍କ । ଚଳିତ ସପ୍ତାହ ଆରମ୍ଭରେ ଅନ୍ୟ ନିର୍ବାଚିତ ବିଜେପି ନେତାଙ୍କ ସମେତ ନାୟବ ସିଂ ସୈନୀ ଦିଲ୍ଲୀରେ ଦଳର ଶୀର୍ଷ ନେତାଙ୍କୁ ଭେଟିଥିଲେ । ସେ ପ୍ରଧାନମନ୍ତ୍ରୀ ମୋଦୀ, ବିଜେପିର ରାଷ୍ଟ୍ରୀୟ ଅଧ୍ୟକ୍ଷ ଜେପି ନଡ୍ଡା ଏବଂ କେନ୍ଦ୍ରମନ୍ତ୍ରୀ ଅମିତ ଶାହଙ୍କୁ ସାକ୍ଷାତ କରିଥିଲେ । ତେବେ ସରକାର ପରିବର୍ତ୍ତନର ହାଓ୍ବା ଏବଂ ଏକଜିଟ୍ ପୋଲକୁ ମିଥ୍ୟା ପ୍ରମାଣିତ କରି ବିଜେପି ହରିୟାଣାରେ ରେକର୍ଡ ବିଜୟ ହାସଲ କରିଛି ।
୯୦ ବିଧାନସଭା ଆସନରୁ ୪୮ଟିରେ ବାଜିମାତ କରିଛି ବିଜେପି । ସେପଟେ ଶାସନକୁ ଫେରିବାକୁ ଲକ୍ଷ୍ୟ ରଖିଥିବା କଂଗ୍ରେସ ଖାତାକୁ ୩୭ଟି ଆସନ ଯାଇଛି । ୨୦୧୯ରେ ବିଜେପି ସହ ମେଣ୍ଟ କରିଥିବା ଜେଜେପି ନିରାଶ ହୋଇଛି । ଆମ ଆଦମୀ ପାର୍ଟି ହରିୟାଣାରେ ଖାତା ଖୋଲିବାକୁ ଅସମର୍ଥ ହୋଇଥିବ ବେଳେ ଆଇଏନଏଲଡି କେବଳ ୨ଟି ଆସନରେ ସନ୍ତୁଷ୍ଟ ହୋଇଛି । ଏସବୁ ଭିତରେ ସାବିତ୍ରୀ ଜିନ୍ଦଲଙ୍କ ସମେତ ୩ ସ୍ବାଧୀନ ବିଧାୟକ ବିଜେପିକୁ ସମର୍ଥନ ଜଣାଇଛନ୍ତି ।
