ମୋହନା,୦୫/୦୪: ଆଗମୀ ସାଧାରଣ ନିର୍ବାଚନ ପାଇଁ ମତଦାନ ତାରିଖ ଯେତେ ପାଖେଇ ଆସୁଛି ବିଭିନ୍ନ ରାଜନୈତିକ ଦଳ ଓ ସାଧାରଣ ଜନତାଙ୍କ ମଧ୍ୟରେ ଉତ୍କଣ୍ଠା ସେତିକି ବଢ଼ିବାରେ ଲାଗିଛି । ରାଜ୍ୟର ତିନି ରାଜନୈତିକ ଦଳ ବିଜେଡି, ବିଜେପି ଓ କଂଗ୍ରେସର ପ୍ରାର୍ଥୀ ଘୋଷଣା ପ୍ରକ୍ରିୟା ଜାରି ରହିଛି । ଗଜପତି ଜିଲ୍ଲା ମୋହନା ବିଧାନସଭା ଆସନରେ ବିଜେଡି ଓ କଂଗ୍ରେସ ପ୍ରାର୍ଥୀ ଘୋଷଣା କରିସାରିଛି । ବିଜେଡିରୁ ଅନ୍ତର୍ଯ୍ୟାମୀ ଗମାଙ୍ଗ ଓ କଂଗ୍ରେସରୁ ବିଧାୟକ ଦାଶରଥି ଗମାଙ୍ଗ ପୁଣି ପ୍ରାର୍ଥୀ ହୋଇଛନ୍ତି । ମାତ୍ର ବର୍ତ୍ତମାନ ସୁଦ୍ଧା ବିଜେପି ପ୍ରାର୍ଥୀ ଘୋଷଣା ହୋଇନଥିବାରୁ ଆଶାୟୀଙ୍କ ମଧ୍ୟରେ ଆଶଙ୍କା ବୃଦ୍ଧି ପାଇଛି ।
ମୋହନା ବିଧାନସଭା ଆସନ ଅନୁସୂଚିତ ଜନଜାତିଙ୍କ ପାଇଁ ସଂରକ୍ଷିତ ରହିଥିବା ବେଳେ ୪ଟି ବ୍ଲକ୍ ରହିଛି । ଭୋଟରଙ୍କ ସଂଖ୍ୟା ୨ ଲକ୍ଷ ୩୧ ହଜାର ୧୯୭ । ପୁରୁଷ ଭୋଟର ୧ ଲକ୍ଷ ୧୨ ହଜାର ୬୭୨ ଓ ମହିଳା ଭୋଟର ୧ ଲକ୍ଷ ୧୮ ହଜାର ୫୨୫ ରହିଛନ୍ତି । ସେଥିମଧ୍ୟରୁ କେବଳ ମୋହନା ବ୍ଲକ୍ରେ ୯୭ ହଜାର ଭୋଟର ଅଛନ୍ତି । ୨୦୧୯ ନିର୍ବାଚନରେ କଂଗ୍ରେସକୁ ସର୍ବାଧିକ ୩୨.୮ ପ୍ରତିଶତ ଭୋଟ ମିଳିଥିବା ବେଳେ ବିଜେଡିକୁ ୩୧.୩ ପ୍ରତିଶତ ଓ ବିଜେପିକୁ ମିଳିଛି ୨୮.୨ ପ୍ରତିଶତ ଭୋଟ ।
ମୋହନା ନିର୍ବାଚନମଣ୍ଡଳୀରେ ବିଭିନ୍ନ ବର୍ଗର ଭୋଟର ଅଛନ୍ତି । ପ୍ରତ୍ୟେକ ନିର୍ବାଚନରେ ଜାତିଭିତ୍ତିକ ଭୋଟ ନିର୍ଣ୍ଣାୟକ ହୋଇଥିବା ନଜିର ରହିଛି । ବିଜେଡି ଓ କଂଗ୍ରେସ ପ୍ରାର୍ଥୀ ଘୋଷଣା କରିଥିଲେ ମଧ୍ୟ ବିଜେପି ପ୍ରାର୍ଥୀ ଘୋଷଣା ହୋଇନି । ବିଜେପିରେ ଏକାଧିକ ଆଶାୟୀ ପ୍ରାର୍ଥୀ ଥିବା ବେଳେ ଗତ ନିର୍ବାଚନରେ ତୃତୀୟ ସ୍ଥାନରେ ଥିଲା । ତେଣୁ ଚଳିତ ନିର୍ବାଚନରେ କାହାକୁ ପ୍ରାର୍ଥୀ କଲେ ମୋହନା ଆସନ ଦଖଲ କରିପାରିବ ତାକୁ ନେଇ ତର୍ଜମା କରୁଛି ବିଜେପି । ଏଭଳି ପରିସ୍ଥିତିରେ ବିଜେଡି ଓ କଂଗ୍ରେସର ପୁରୁଖା ନେତାଙ୍କ ସହ ବିଜେପିର କିଏ ମଇଦାନକୁ ଆସୁଛନ୍ତି ତାକୁ ଅପେକ୍ଷା କରିଛନ୍ତି ମୋହନାବାସୀ ।