ଭୁବନେଶ୍ୱର,୨୧/୦୨: ଆଜି ଦେଇଥାନ୍ତେ ମାଟ୍ରିକ ପରୀକ୍ଷା । ମାଟ୍ରିକ ପରୀକ୍ଷା ପୂର୍ବରୁ ଲିଭିଗଲା ଜୀବନ ଦୀପ । ଅସୁସ୍ଥ ଥିବାରୁ ଚାଲିଗଲା ଜୀବନ । ମୃତ ଛାତ୍ର ଜଣକ ବାହାନଗା ବ୍ଲକ ବାରିପଦା ଉଦୟ ନାରାୟଣ ହାଇସ୍କୁଲର ଛାତ୍ର କୈଳାସ ମାଝୀଙ୍କ ପୁଅ ଚନ୍ଦ୍ରଶେଖର ମାଝୀ ବୋଲି ଜଣାପଡ଼ିଛି । ବାଲେଶ୍ୱର ଜିଲ୍ଲା ସୋର ଅଞ୍ଚଳରେ ଏଭଳି ଏକ ଦୁଃଖଦ ଘଟଣା ଘଟିଛି ।
ସୂଚନା ମୁତାବକ, ବାହାନଗା ବ୍ଲକ ବାରିପଦା ଉଦୟ ନାରାୟଣ ହାଇସ୍କୁଲର ଜଣେ ମାଟ୍ରିକ ପରୀକ୍ଷାର୍ଥୀଙ୍କ ଅକାଳ ମୃତ୍ୟୁ ହୋଇଛି । ସେ ଗତ ଦୁଇ ଦିନ ତଳେ ଭୋଜି ଖାଇ ଅସୁସ୍ଥ ହୋଇ ପଡ଼ିଥିଲେ । ତାଙ୍କ ପେଟ କାଟିବାକୁ ପରିବାର ଲୋକେ ଗୋପାଳପୁର ଡାକ୍ତରଖାନାକୁ ନେଇ ଚିକିତ୍ସା କରିଥିଲେ । ଏହା ପରେ ମଧ୍ୟ ସ୍ୱାସ୍ଥ୍ୟାବସ୍ଥାରେ ସୁଧାର ନ ହେବାରୁ ଗୁରୁବାର ପୁଣି ଥରେ ଏକ ଘରୋଇ ଡାକ୍ତରଖାନାରେ ଚିକିତ୍ସା କରାଇଥିଲେ । ଡାକ୍ତର ଦେଇଥିବା ଓୌଷଧ ଖାଇ ରାତିରେ ଚନ୍ଦ୍ରଶେଖର ଶୋଇଥିଲେ । ଆଜି ସକାଳେ ପରୀକ୍ଷା କେନ୍ଦ୍ରକୁ ଯିବା ପାଇଁ ପ୍ରସ୍ତୁତ ହେଉଥିଲେ । ନିତ୍ୟକର୍ମ ସାରିବା ପରେ ହଠାତ ତାଙ୍କ ମୁଣ୍ଡ ବୁଲାଇଥିଲା । ଏହା ଦେଖି ତାଙ୍କ ପରିବାରଲୋକେ ତୁରନ୍ତ ସୋର ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ଭର୍ତ୍ତି କରାଇଥିଲେ । ହେଲେ ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । ଏହି ଦୁଃଖଦ ଘଟଣା ପରେ ପରିବାର ଲୋକେ ଭାଙ୍ଗି ପଡ଼ିଛନ୍ତି ।
