ଭୁବନେଶ୍ୱର, ୧୯/୦୨: ବିଳମ୍ୱିତ ରାତିରେ ଭାରସାମ୍ୟ ହରାଇ ଘରକୁ ଧକ୍କା ଦେଲା ବରଯାତ୍ରୀ ବସ୍ । ଦୁର୍ଘଟଣାରେ ୫ ଯାତ୍ରୀ ଆହତ । ବାଲେଶ୍ୱର ଜିଲ୍ଲା ଖଇରା ବ୍ଳକ ଗଣ୍ଡିବେଡ ଔପଦା ରାସ୍ତାର ପାଣିଶିଆଳି ନିକଟରେ ଏଭଳି ଘଟଣା ଘଟିଥିବାର ଖବର ସାମ୍ନାକୁ ଆସିଛି ।
ସୂଚନା ମୁତାବକ, ନୀଳଗିରି କାଠପାଳ ଅଞ୍ଚଳରୁ ଶ୍ରୀ ଗଣେଶ ନାମକ ଏକ ବସ୍ ୫୦ରୁ ଅଧିକ ବରଯାତ୍ରୀ ନେଇ ଗଣ୍ଡିବେଡ ଔପଦା ରାସ୍ତାର ଜହ୍ନିଆପଦାକୁ ଯାଉଥିଲା । ବସ୍ଟି ହଠାତ ପାଣିଶିଆଳି ରାସ୍ତାକଡ଼ରେ ଥିବା ମଙ୍ଗଳ ଦାସଙ୍କ ଘରର ବାରଣ୍ଡାରେ ଥିବା ଆଜବେଷ୍ଟସକୁ ଧକ୍କା ଦେଇ ଅଟକି ଯାଇଥିଲା । ବସ୍ଟି ଧକ୍କା ଦେବା କାରଣରୁ ପ୍ରଚଣ୍ଡ ଶବ୍ଦ ହୋଇଥିଲା । ଶବ୍ଦ ଶୁଣି ସ୍ଥାନୀୟଲୋକେ ଭୟଭୀତ ହୋଇ ଘର ବାହାରକୁ ଆସିଥିଲେ ଏବଂ ବସ୍ ଭିତରେ ଥିବା ବରଯାତ୍ରୀମାନଙ୍କୁ ଉଦ୍ଧାର କରି ଖଇରା ମେଡ଼ିକାଲକୁ ପଠାଇଥିଲେ । ଏହି ଦୁର୍ଘଟଣାରେ ୫ ଜଣ ଆହତ ହୋଇଥିବା ବେଳେ ସେମାନଙ୍କ ମଧ୍ୟରୁ ଜଣଙ୍କର ଅବସ୍ଥା ଗୁରୁତର ଥିବା ଜଣାପଡ଼ିଛି । ଏହି ଦୁର୍ଘଟଣା ଘଟାଇ ବସ୍ର ଡ୍ରାଇଭର ଘଟଣା ସ୍ଥଳରୁ ଫୋରାର ହେଇଥିଲା । ଏନେଇ ଖବର ପାଇବା ପରେ ପୋଲସି ଘଟଣାସ୍ଥଳରେ ପହଞ୍ଚି ତଦନ୍ତ କରୁଛି ।
