ବେଙ୍ଗାଲୁରୁ: କର୍ଣ୍ଣାଟକ ମୁଖ୍ୟମନ୍ତ୍ରୀ ସିଦ୍ଧରମୈୟାଙ୍କ ଅଡ଼ୁଆ ବଢ଼ିବାରେ ଲାଗିଛି । ମୁଦା ଦୁର୍ନୀତି ମାମଲାରେ ସିଦ୍ଧରମୈୟାଙ୍କ ବିରୋଧରେ ପ୍ରବର୍ତ୍ତନ ନିର୍ଦ୍ଦେଶାଳୟ (ଇଡି) ମାମଲା ରୁଜୁ କରିସାରିଛି । ଏହାରି ମଧ୍ୟରେ ଆଜି ଜଣେ ଅଭିଯୋଗକାରୀ ମୁଖ୍ୟମନ୍ତ୍ରୀଙ୍କ ବିରୋଧରେ ସଙ୍ଗୀନ ଅଭିଯୋଗ ଆଣିଛନ୍ତି । ମୁଖ୍ୟମନ୍ତ୍ରୀ ସିଦ୍ଧରମୈୟା ଏବଂ ଅନ୍ୟମାନେ ମୁଦା ମାମଲାରେ ପ୍ରମାଣ ନଷ୍ଟ କରିବାକୁ ଚେଷ୍ଟା କରୁଛନ୍ତି ଏବଂ ସେମାନଙ୍କ ବିରୋଧରେ ଶୀଘ୍ର ତଦନ୍ତ ଆରମ୍ଭ କରିବାକୁ ଇଡିକୁ ଅନୁରୋଧ କରିଛନ୍ତି ଅଭିଯୋଗକାରୀ ପ୍ରଦୀପ କୁମାର ଏସ୍‌ପି । 

ଏହା ପୂର୍ବରୁ ସେପ୍ଟେମ୍ବର ୨୭ରେ ଏକ ସ୍ବତନ୍ତ୍ର କୋର୍ଟଙ୍କ ନିର୍ଦ୍ଦେଶ କ୍ରମେ ଲୋକାୟୁକ୍ତ ପୋଲିସ ସିଦ୍ଧରମୈୟା, ତାଙ୍କ ପତ୍ନୀ ପାର୍ବତୀ ବିଏମ, ଶଳା ମଲ୍ଲିକାର୍ଜୁନ ସ୍ବାମୀ, ଦେବରାଜୁଙ୍କ ବିରୋଧରେ ଏଫଆଇଆର ରୁଜୁ କରିଥିଲା । ଦେବରାଜୁଙ୍କ ପାଖରୁ ଜମି କିଣି ଭଉଣୀ ପାର୍ବତୀଙ୍କୁ ଉପହାର ଦେଇଥିଲେ ମଲ୍ଲିକାର୍ଜୁନ ସ୍ବାମୀ । 

ସେପଟେ ପ୍ରବର୍ତ୍ତନ ନର୍ଦ୍ଦେଶାଳୟ ମୁଖ୍ୟମନ୍ତ୍ରୀ ସିଦ୍ଧରମୈୟାଙ୍କ ବିରୋଧରେ ଆର୍ଥିକ ଅନିୟମିତାତ ନେଇ ମାମଲା ରୁଜୁ କରିଥିଲା । ସିଦ୍ଧରମୈୟା ମହୀଶୂର ସହରୀ ବିକାଶ ପ୍ରାଧିକରଣ (MUDA) ସହାୟତାରେ ତାଙ୍କ ପତ୍ନୀଙ୍କୁ ୧୪ଟି ପ୍ଲଟ୍‌ ଆବଣ୍ଟନ କରିଥିବା ଅଭିଯୋଗ ରହିଛି । ମଙ୍ଗଳବାର ମୁଦା ସିଦ୍ଧରମୈୟାଙ୍କ ପତ୍ନୀଙ୍କ ପାଖରୁ ଆବଣ୍ଟିତ ୧୪ଟି ପ୍ଲଟ୍‌ ଫେରାଇ ଆଣିବାକୁ ନିଷ୍ପତ୍ତି ନେଇଛି ।