ସାଧାରଣତଃ ଆମ ସମସ୍ତଙ୍କର ଏକ ଧାରଣା ରହିଛି ଯେ, ଭାଗ୍ୟରେ କାଳସର୍ପ ଦୋଷ ରହିବା ଅତ୍ୟନ୍ତ ଦୁଃଖଦାୟକ । ମଣିଷ ଜୀବନକୁ ଏହା କଷ୍ଟରେ ଭରି ଦେଇଥାଏ । ଏପରିକି ଏହି ଦୋଷ ରହିବା ଦ୍ୱାରା ମଣିଷ ଆକାଳ ମୃତ୍ୟୁର ଶିକାର ହୋଇଥାଏ ବୋଲି ମଧ୍ୟ ବିଶ୍ୱାଷ ରହିଛି । ଏଥିପାଇଁ ଅନେକ ଲୋକ ଜ୍ୟୋତିର୍ବିଦ୍ ମାନଙ୍କୁ ପାରମର୍ଶ କରି ଅନେକ ପ୍ରତିକାର ମଧ୍ୟ କରିଥାନ୍ତି । ହେଲେ କ'ଣ ଆପଣ ଜାଣିଛନ୍ତି କି, ଅନେକ ସମୟରେ କାଳସର୍ପ ଦୋଷକୁ ଡରିବାର କୌଣସି ଆବଶ୍ୟକତା ରହିନଥାଏ । ଏହାକୁ ଏକ ଦୋଷ ଭାବରେ ଗଣନା ନ କରି ଏକ ସଂଯୋଗ ଭାବରେ ବିବେଚନା କରିବା ଉଚିତ୍ । ଏହାର ଅନେକ ଉଦାହରଣ ରହିଛି ଯାହା ପ୍ରମାଣ କରୁଛି ଯେ, କାଳସର୍ପ ଦୋଷ ରାଜଯୋଗ ଭଳି ଶୁଭ ଫଳ ମଧ୍ୟ ପ୍ରଦାନ କରିଥାଏ । ଧିରୁଭାଇ ଅମ୍ୱାନୀ, ହୃଷିକେଷ ମୁଖାର୍ଜି, ସଚିନ ତେନ୍ଦୁଲକରଙ୍କ ଭାଗ୍ୟରେ କାଳସର୍ପ ଦୋଷ ରହିଛି ଏବଂ ଏମାନେ ଆଜି ସଫଳତାର ଶୀର୍ଷରେ ପହଞ୍ଚି ପାରିଛନ୍ତି । 

ଯେଉଁଭଳି, ଶନି ଦେବଙ୍କ ସାଢେ ସାତି ସମସ୍ତଙ୍କ ପାଇଁ ସମାନ ଫଳ ପ୍ରଦାନ କରିନଥାଏ, ଠିକ୍ ସେହିଭଳି କାଳସର୍ପ ଦୋଷର ସଂଯୋଗ ମଧ୍ୟ ସମସ୍ତଙ୍କୁ ସମାନ ପରିଣାମ ଦେଇନଥାଏ । କାଳସର୍ପ ଦୋଷ ଭାଗ୍ୟରେ ଥିବା ରାହୁ ଏବଂ କେତୁର ସ୍ଥିତି ଉପରେ ନିର୍ଭର କରିଥାଏ । ବ୍ୟକ୍ତିର ରାଶିରେ ରାହୁ ଏବଂ କେତୁଙ୍କ ଗୋଚର ଅନୁଯାୟୀ ଏହି ସଂଯୋଗ ଶୁଭ କିମ୍ୱା ଅଶୁଭ ଫଳ ପ୍ରଦାନ କରିଥାଏ । କାଳସର୍ପ ଦୋଷ ଶୁଭ ହେଲେ, ରାହୁ ଏବଂ କେତୁଙ୍କ ସ୍ଥିତି ଅନୁଯାୟୀ ବ୍ୟକ୍ତିକୁ ନିଜର ଦୁର୍ବଳତାକୁ ଦୂର କରିବାକୁ ସୁଯୋଗ ମିଳିଥାଏ । ଯାହା ଦ୍ୱାରା ସେହି ବ୍ୟକ୍ତି ନିରନ୍ତର ଭାବରେ ଆଗକୁ ବଢି ଚାଲିଥାଏ । ଯେଉଁମାନେ ଜୀବନରେ ଆସୁଥିବା ଚ୍ୟାଲେଞ୍ଜକୁ ଡରି ଯାଆନ୍ତି, ସେମାନଙ୍କ ପାଇଁ ଏହି କାଳସର୍ପ ଦୋଷ ଅଶୁଭ ବୋଲି ସାବ୍ୟସ୍ତ ହୋଇଥାଏ । 

କାହା ପାଇଁ ସୈଭାଗ୍ୟ ଆଣିଥାଏ କାଳସର୍ପ ଦୋଷ ?

ଯେଉଁ ବ୍ୟକ୍ତିଙ୍କ ଭାଗ୍ୟରେ ରାହୁ ନିଜର ଉଚ୍ଚ ରାଶି ବୃଷ କିମ୍ୱା ମିଥୁନ ରାଶିରେ ଥାଏ, ସେମାନେ ରାହୁଙ୍କ ଦଶାରେ ସଫଳତା ଶୀର୍ଷରେ ପହଞ୍ଚିଥାନ୍ତି । ବ୍ୟକ୍ତିର ରାଶିରେ ଥିବା ଗୁରୁ ମଧ୍ୟ ବ୍ୟକ୍ତି ପାଇଁ ଲାଭଦାୟକ ହୋଇଥାଏ । ଯଦି କାଳସର୍ପ ଦୋଷର ସଂଯୋଗ ଥିବା ବ୍ୟକ୍ତିର ଭାଗ୍ୟରେ ଗୁରୁ ଏବଂ ଚନ୍ଦ୍ର କେନ୍ଦ୍ରିଭୂତ ହୋଇ ଏକାଠି ବସିଛନ୍ତି, ସେହି ବ୍ୟକ୍ତି ମଧ୍ୟ ଜୀବନରେ ବହୁ ଉନ୍ନତି କରିଥାଏ । 

ଭାଗ୍ୟରେ ରାହୁର ଏହି ସ୍ଥିତି ଦେଇଥାଏ କଷ୍ଟ -

ଭାଗ୍ୟରେ ତୃତୀୟ, ଷଷ୍ଠ ଏବଂ ଅଷ୍ଟମ ଘରକୁ ତ୍ରିକ ଘର ଭାବେ ବିବେଚନା କରାଯାଇଥାଏ । ଏହି ଘରଗୁଡ଼ିକରେ ରାହୁଙ୍କ ଉପସ୍ଥିତି ଶୁଭ ନୁହେଁ । ଏହି ଘର ଗୁଡ଼ିକରେ ରାହୁଙ୍କ ଅବସ୍ଥାନ ବ୍ୟକ୍ତିଙ୍କୁ ବହୁ ଅଶୁଭ ଫଳ ପ୍ରଦାନ କରିଥାଏ ।  ଯଦି କୌଣସି ବ୍ୟକ୍ତିର ଭାଗ୍ୟର ଏହି ଘରଗୁଡ଼ିକରେ ରାହୁ ଉପସ୍ଥିତ ଥାଆନ୍ତି, ତେବେ ସେହି ବ୍ୟକ୍ତିଙ୍କୁ ରାହୁର ଅଶୁଭ ପ୍ରଭାବକୁ ଦୂର କରିବା ପାଇଁ ପ୍ରତିକାର କରିବା ଉଚିତ୍।