ନୂଆଦିଲ୍ଲୀ: ୨୦୦୭ ମସିହାରେ ଜଣେ ୧୬ ବର୍ଷୀୟ ବାଳକକୁ ଯୌନ ନିର୍ଯାତନା ଦେବା ଅଭିଯୋଗରେ ଦୋଷୀ ସାବ୍ୟସ୍ତ ହେବା ପରେ ସିଙ୍ଗାପୁରରେ ଜଣେ ଭାରତୀୟ ବଂଶୋଦ୍ଭବ ରଞ୍ଜିତ ପ୍ରସାଦଙ୍କୁ ୧୦ ବର୍ଷ ଛଅ ମାସ ଜେଲଦଣ୍ଡାଦେଶ ଦିଆଯାଇଛି। ତେବେ ମାମଲାର ଶୁଣାଣି ସମୟରେ ମଧ୍ୟ ପ୍ରସାଦ ତାଙ୍କ ଦ୍ୱାରା କରାଯାଇଥିବା ଅପରାଧ ପାଇଁ ଅନୁତାପ କରି ନଥିଲେ ବୋଲି ଅପରପକ୍ଷର ଓକିଲ ସମସ୍ତଙ୍କ ସାମ୍ନାରେ କହିଛନ୍ତି।
ପୂର୍ବରୁ ପିପୁଲ୍ସ ଆସୋସିଏସନ(ପିଏ)ରେ ପ୍ରସନ ବିଭିନ୍ନ ଯୁବକମାନଙ୍କ ସହିତ କାମ କରୁଥିଲେ। ତେବେ ଅଭିଯୁକ୍ତ ଯୁବକ ଜଣଙ୍କ ସହ ଚିହ୍ନା ପରିଚୟ ହେବା ପରେ ସେ ତାଙ୍କ ପଦବୀର ଅପବ୍ୟବହାର କରିଥିଲେ। ଶୁଣାଣି ସମୟରେ ଏହାକୁ ନେଇ ବିଚାରପତି ଜନ୍ ଏନଜି କହିଥିଲେ ଯେ ଏହି ଘଟଣା ପୀଡିତଙ୍କ ଜୀବନ ପ୍ରତିକୂଳ ପ୍ରଭାବ ପକାଇଛି। ଖାଲି ଯେ ପ୍ରଭାବ ପକାଇଛି ତାହା ନୁହେଁ ଏହି ଘଟଣା ତାଙ୍କ ଭବିଷ୍ୟତକୁ ମଧ୍ୟ ଅନେକାଂଶରେ ପ୍ରଭାବିତ କରିଛି ବୋଲି କହିଥିଲେ।
ଆପଣଙ୍କୁ ଜଣାଇରଖୁ ଯେ ପ୍ରସାଦ ମଡେଲିଂରେ ଆଗ୍ରହୀ ଥିବା ବାହାନାରେ ପୀଡିତଙ୍କୁ ତାଙ୍କ ଅଫିସକୁ ଡାକିଥିଲେ। ତା'ପରେ ସେ ତାଙ୍କୁ ବିଭିନ୍ନ ବାହାନା ଦେଖାଇ ଏକ ସାର୍ବଜନୀନ ଶୌଚାଳୟକୁ ନେଇଯାଇଥିଲେ। ଯେଉଁଠାରେ ସେ ପୀଡିତଙ୍କୁ ଯୌନ ନିର୍ଯାତନା ଦେଇଥିଲେ। ହେଲେ ଏତିକିରେ ଅଟକି ନଥିଲେ ପ୍ରସାଦ। ସେ ପୀଡିତଙ୍କୁ ଜୋର ଜବରଦସ୍ତ ଏକ ହୋଟେଲକୁ ନେଇ ତାଙ୍କ ସହିତ ଅପ୍ରାକୃତିକ ଯୌନ ସମ୍ୱଦ୍ଧ ମଧ୍ୟ ରଖିଥିଲେ।
ପୀଡିତ ଯୁବକ ଜଣକ ଏନେଇ ୨୦୨୦ ମସିହା ଅଗଷ୍ଟ ୨୪ ତାରିଖରେ ପୋଲିସରେ ଏକ ରିପୋର୍ଟ ଦାଖଲ କରିଥିଲେ। ତେବେ ଶୁଣାଣି ସମୟରେ, ପ୍ରସାଦ କୌଣସି ଭୁଲ କରିଥିବା କଥା ମନା କରିଥିଲେ। କିନ୍ତୁ ବିଚାରପତି ପୀଡିତାଙ୍କ ବୟାନକୁ ନଜରରେ ରଖି ଏହି ମାମଲାର ରାୟ ପ୍ରଦାନ କରିଥିଲେ।
ଏହି ମାମଲାର ରାୟ ଆସିବା ପରେ ପିଏର ମୁଖ୍ୟ କହିଛନ୍ତି ଯେ ପ୍ରସାଦଙ୍କ ଦ୍ୱାରା କରାଯାଇଥିବା ଅପରାଧ ଏକ ଗମ୍ଭୀର ଅପରାଧ। ଏହା ସହିତ, ଯୁବପିଢ଼ିଙ୍କ ସ୍ୱାର୍ଥ ଏବଂ ସୁରକ୍ଷା ଜଡିତ ରହିଥିବାରୁ ବିଚାରପତି ଏହି ମାମଲାରେ ନିର୍ଣ୍ଣାୟକ ପଦକ୍ଷେପ ନେଇଛନ୍ତି। ପ୍ରସାଦଙ୍କୁ ସେପ୍ଟେମ୍ବର ୨୦୨୦ ମସିହା ପ୍ରାରମ୍ଭରେ ତାଙ୍କ କାର୍ଯ୍ୟକ୍ଷେତ୍ରରୁ ନିଲମ୍ବିତ କରାଯାଇଥିଲା। ୨୦୨୪ ମସିହା ୨୩ ଅକ୍ଟୋବର ମାସରେ ତାଙ୍କୁ ବହିଷ୍କାର କରାଯିବା ପର୍ଯ୍ୟନ୍ତ ସେ ପିଏ ସହ ଜଡିତ କୌଣସି କାର୍ଯ୍ୟ କରିନଥିଲେ ବୋଲି ସେ କହିଛନ୍ତି।
