ନୂଆଦିଲ୍ଲୀ,୧୪/୦୩: ବେଲୁଚିସ୍ତାନରେ ଟ୍ରେନ ଅପହରଣ ମାମଲାରେ ପାକିସ୍ତାନକୁ କଡା ଜାବବ୍ ଦେଇଛି ଭାରତ । ଟ୍ରେନ୍ ହାଇଜ୍ୟାକ୍ ନେଇ ଭାରତର ହାତ ଥିବା କହି ଅଙ୍ଗୁଳି ଉଠାଉଥିଲା ପାକିସ୍ତାନ । ଏହାକୁ ନେଇ ପାକକୁ ଜବାବ ଦେଇଛି ଭାରତୀୟ ବୈଦେଶିକ ମନ୍ତ୍ରଣାଳୟ । ପାକିସ୍ତାନର ଏହି ଅଭିଯୋଗକୁ ଖଣ୍ଡନ କରିବା ସହ ପାକିସ୍ତାନ ତାର ଆଭ୍ୟନ୍ତରୀଣ ମାମଲା ତା ପାଖରେ ରଖୁ ବୋଲି କହିଛି ଭାରତ ।
କଡା ଜବାବ ଦେଲା ଭାରତ- ପାକିସ୍ତାନର ଶାହବାଜ ସରକାର ଟ୍ରେନ ହାଇଜ୍ୟାକକୁ ନେଇ ଭାରତ ଉପରେ ଆରୋପ ଲଗାଇଥିଲା । ଏହାକୁ ନେଇ ପାକିସ୍ତାନକୁ କଡା ଜବାବ ଦେଇଛି ଭାରତ । ପାକିସ୍ତାନ କରିଥିବା ଅଭିଯୋଗକୁ ନେଇ ଭାରତ ବୈଦେଶିକ ମନ୍ତ୍ରଣାଳୟ ମୁଖ୍ୟ ସଚିବ ରଣଧୀର ଜୟସୱାଲ ଗଣମାଧ୍ୟମ ପ୍ରଶ୍ନର ଉତ୍ତର ରଖିଛନ୍ତି । ସେ କହିଛନ୍ତି, ''ପାକିସ୍ତାନର ଏହି ଅଭିଯୋଗକୁ ଖଣ୍ଡନ କରୁଛୁ । ସମଗ୍ର ଦୁନିଆ ଜାଣିଛି ପାକିସ୍ତାନକୁ ଗ୍ଲୋବାଲ ଆତଙ୍କବାଦର କେନ୍ଦ୍ରସ୍ଥଳ କୁହାଯାଏ । ପାକିସ୍ତାନ ତାର ବିଫଳତାକୁ ଲୁଚାଇବାକୁ ଅନ୍ୟ ଉପରେ ଅଙ୍ଗୁଳି ଉଠାଉଛି । ଅନ୍ୟକୁ କହିବା ଅପେକ୍ଷା ସେ ତାର ଆଭ୍ୟନ୍ତରୀଣ ମାମଲା ତା ପାଖରେ ରଖୁ ।''
ଗୁରୁବାର ବେଲୁଚିସ୍ତାନ ଗସ୍ତ କରିଥିଲେ ପାକିସ୍ତାନ ପ୍ରଧାନମନ୍ତ୍ରୀ ଶାହବାଜ୍ ଶରିଫ । ସେଠାରେ ସୁରକ୍ଷା ବ୍ୟବସ୍ଥା ସମୀକ୍ଷା କରିବା ସହ ଜାଫର୍ ଟ୍ରେନ ଅପହରଣ ଘଟଣାର ପୀଡିତଙ୍କ ପରିବାରକୁ ସମବେଦନା ଜଣାଇଥିଲେ । ତାଙ୍କ ସହ ଉପପ୍ରଧାନମନ୍ତ୍ରୀ ମହମ୍ମଦ ଇଶକ୍ ଦାରଙ୍କ ସମେତ ଅନ୍ୟ ନେତା ଉପସ୍ଥିତ ଥିଲେ ।
ଘେରିଲା ଆଫଗାନିସ୍ତାନ- ବେଲୁଚିସ୍ତାନରେ ଟ୍ରେନ ଅପହରଣ ଘଟଣାରେ ପାକିସ୍ତାନକୁ ଘେରିଛି ଆଫଗାନିସ୍ତାନ । ପାକିସ୍ତାନର ଏହି ଅଭିଯୋଗକୁ ଖଣ୍ଡନ କିରବା ସହ ସମ୍ପୂର୍ଣ୍ଣ ଭିତ୍ତିହୀନ କହିଛି । ଏଥିରେ ଆଫଗାନିସ୍ତାନର କୌଣସି ଲିଙ୍କ୍ ନାହିଁ । ପାକିସ୍ତାନ ଏପରି ଦାୟିତ୍ବହୀନ ମନ୍ତବ୍ୟ ଦେବା ବଦଳରେ ନିଜ ସୁରକ୍ଷା ବ୍ୟବସ୍ଥା ଠିକ୍ କରୁ । ଆଭ୍ୟନ୍ତରୀଣ ମାମଲାର ସମାଧନ କରୁ ବୋଲି କହିଛନ୍ତି ତାଲିବାନ ନେତା ତଥା ଆଫଗାନିସ୍ତାନର ବିଦେଶ ମନ୍ତ୍ରଣାଳୟ ମୁଖପାତ୍ର ଅବଦୁଲ କହାର ବଲଖି ।
ମାର୍ଚ୍ଚ ୧୧ରେ ହୋଇଥିଲା ହାଇଜ୍ୟାକ- ପାକିସ୍ତାନରେ ମାର୍ଚ୍ଚ ୧୧ ତାରିଖରେ ଜାଫର ଏକ୍ସପ୍ରେସ ଟ୍ରେନ ଅପହରଣ ହୋଇଥିଲା । ଟ୍ରେନରେ ୪୫୦ ଯାତ୍ରୀ ଥିଲେ । ଯେଉଁଥିରୁ ୫୮ଜଣଙ୍କର ମୃତ୍ୟୁ ହୋଇଛି । ସେମାନଙ୍କ ମଧ୍ୟରେ ୨୧ ଯାତ୍ରୀ, ୪ ଜଣ ସେନା ଓ ବିଏଲଏର ୩୩ଜଣ ଆତଙ୍କୀ ରହିଛନ୍ତି । ଏହି ହାଇଜ୍ୟାକ ହେବା ପରେ ପାକିସ୍ତାନ ନାଁ ନ ନେଇ ଭାରତ ଉପରେ ଅଭିଯୋଗ ଆଣିଥିଲା । ନିଜର ବିଫଳତାକୁ ଲୁଚାଇବାକୁ ଚେଷ୍ଟା କରି ଭାରତ ଉପରେ ଦୋଷ ଲଦିଥିଲା । ବେଲୁଚିସ୍ତାନରେ ବାରମ୍ବାର ଅଶାନ୍ତି ସୃଷ୍ଟି ହେଉଥିବା ନେଇ ବିଏଲଏ ପରି ସଂଗଠନକୁ ଭାରତ ସମର୍ଥନ କରୁଥିବା ପାକିସ୍ତାନ ଅଭିଯୋଗ କରିଥିଲା । ଏହାକୁ ଭାରତ ଖଣ୍ଡନ କରି କଡା ଜବାବ୍ ଦେଇଛି ।
