ନୂଆଦିଲ୍ଲୀ, ୧୪।୩: ଆଖି ପାହିଲା ଯାଏ କିଛି ବି ଦିଶୁନି । ଯୁଆଡ଼େ ଚାହିଁବ ଚାରିଆଡ଼େ ଖାଲି କିଟ୍ କିଟ୍ ଅନ୍ଧାର । ଏ ତ ଥିଲା ଗୁମ୍ଫା ବାହାରର ଦୃଶ୍ୟ । କିନ୍ତୁ, ଭୂଗର୍ଭର ୧୩୦୦ ଫୁଟ୍ ଗଭୀରକୁ ଗଲେ ଗୁମ୍ଫା ଭିତରର ଦୃଶ୍ୟ ସମ୍ପୂର୍ଣ୍ଣ ଅଲଗା । ଯାହାକି ଆପଣ କେବେ କଳ୍ପନା ବି କରିନଥିବେ । ଏହି ଭୂଗର୍ଭସ୍ଥ ଗୁମ୍ଫା ଭିତରେ ସମୟ ଅତିବାହିତ କରିବାକୁ ଛୁଟୁଛି ପର୍ଯ୍ୟଟକକଙ୍କ ସୁଅ । ପ୍ରକୃତରେ ଏହି ଗୁମ୍ଫା ୨୨୫ ବର୍ଷ ପୁରୁଣା ଏକ ଖଣି, ଯାହା ପରିତ୍ୟକ୍ତ ଅବସ୍ଥାରେ ପଡ଼ିରହିଥିଲା । କିନ୍ତୁ, ଏବେ ପରିତ୍ୟକ୍ତ ଗୁମ୍ଫା ବିଳାସବହୁଳ ହୋଟେଲପାଲଟିଛି । ଯାହାର ନାଁ ରହିଛି ‘ଡିପ୍ ସ୍ଲିପ୍’ । ସ୍ୱିଡେନର ଏକ ଛୋଟ ସହରରେ ଏହି ହୋଟେଲ ଅବସ୍ଥିତ । ଏହା ବିଶ୍ୱର ଗଭୀରତମ ହୋଟେଲ୍ ଭାବେ ପର୍ଯ୍ୟଟକମାନଙ୍କୁ ଆକୃଷ୍ଟ କରୁଛି । ସ୍ଲୋଡେନିଆ ପାର୍ବତ୍ୟମାଳାର ଗୋଟିଏ ଗୁମ୍ଫା ଭିତରେ ନିର୍ମିତ ଏହି ହୋଟେଲ୍ ୧,୩୦୦ଫୁଟ୍ ଗଭୀରରେ ଅବସ୍ଥିତ । ଏତେ ଗଭୀରରେ ବି କୌଣସି ହୋଟେଲ ଥାଇପାରେ ତାହା ଆଖିରେ ନ ଦେଖିଲେ ବିଶ୍ୱାସ କରିହୁଏ ନାହିଁ ।
ହୋଟେଲଟି ଏକ ପୁରୁଣା ଖଣି ଭିତରେ ତିଆରି ହୋଇଛି, ଯାହା ଏକ ସମୟରେ ରୂପା ଏବଂ ଅନ୍ୟାନ୍ୟ ମୂଲ୍ୟବାନ ଧାତୁ ପାଇଁ ବିଖ୍ୟାତ ଥିଲା । ପରବର୍ତ୍ତୀ ସମୟରେ ଏହି ଖଣିଟି ଏକ ପର୍ଯ୍ୟଟନ ଆକର୍ଷଣରେ ରୂପାନ୍ତରିତ ହେଲା । ହୋଟେଲ ଭିତରେ ପହଞ୍ଚିବା ପାଇଁ ରହିଛି ବିଶେଷ ଆୟୋଜନ । ଅତିଥିମାନଙ୍କୁ ଗୁମ୍ଫାର ପଥର ଉପରେ ପାଦ ରଖି ସାମାନ୍ୟ ତଳକୁ ଓହ୍ଲାଇବାକୁ ହୋଇଥାଏ । ତାହାପରେ ‘ଜିପଲାଇନ୍’ରେ ବାନ୍ଧି ସେମାନଙ୍କୁ ହୋଟେଲରେ ପହଞ୍ଚାଇ ଦିଆଯାଏ । ହୋଟେଲ୍ ଭିତରେ ରହିଛି ଚାରିଟି କ୍ୟାବିନ୍ । କ୍ୟାବିନ୍ଗୁଡି଼କରେ ଗୋଟିଏ ରାତି ରହିବା ପାଇଁ ଦେବାକୁ ପଡ଼ିବ ୩୭୫ ୟୁରୋ ଅର୍ଥାତ୍ ୩୪ ହଜାର ଟଙ୍କା । କେବିନ୍ ପାଖାପାଖି ହୋଟେଲ ମଧ୍ୟରେ ରହିଛି ଗୋଟିଏ ବିଳାସବହୁଳ କକ୍ଷ । ପ୍ରାଚୀନ ଖଣି ଭିତରେ ସୁଡ଼ଙ୍ଗପଥରରେ ଏହି କକ୍ଷ ତିଆରି କରାଯାଇଛି । ଏହି ବିଶେଷ ଘରେ ଗୋଟିଏ ରାତି ରହିବା ପାଇଁ ଖର୍ଚ୍ଚ ହୁଏ ୫୭୫ ୟୁରୋ ଅର୍ଥାତ୍ ୫୨ ହଜାର ଟଙ୍କା । ହୋଟେଲର ଘରଗୁଡି଼କ ପଥର ଖୋଦେଇ କରି ତିଆରି ହୋଇଛି ଏବଂ ଆଧୁନିକ ସୁବିଧାରେ ସୁସଜ୍ଜିତ ହୋଇଛି । ହୋଟେଲର ଘରଗୁଡି଼କ ନଏଜ୍ ପ୍ରୁଫ୍ ଅର୍ଥାତ୍, ଏହାକୁ ଏମିତି ଭାବେ ତିଆରି କରାଯାଇଛି ଯେ, ବାହାରୁ କୌଣସି ଶବ୍ଦ ଏହା ମଧ୍ୟକୁ ପ୍ରବେଶ କରିବ ନାହିଁ । ହୋଟେଲ୍ଟି ସଂପୂର୍ଣ୍ଣ ପ୍ରାକୃତିକ ଏବଂ ଶାନ୍ତିପୂର୍ଣ୍ଣ ପରିବେଶ ବଜାୟ ରଖି ବିଦ୍ୟୁତ ଏବଂ ୱାଇଫାଇ ଭଳି ସମସ୍ତ ଆଧୁନିକ ସୁବିଧା ରହିଛି ।
ହୋଟେଲ ଭିତରେ ଗୋଟିଏ ରେସ୍ତୋରାଁ ମଧ୍ୟ ରହିଛି, ଯେଉଁଠାରେ ଅତିଥିମାନଙ୍କୁ ପରଷାଯାଏ ସୁସ୍ୱାଦୁ ସ୍ୱିଡିଶ୍ ଡିସ୍ । କିନ୍ତୁ, ସେଠାରେ ରୋଷେଇ କରିବାର ସୁବିଧା ନାହିଁ । ବ୍ରେକଫାଷ୍ଟଠୁ ଆରମ୍ଭ କରି ସ୍ନାକ୍ସ ପର୍ଯ୍ୟନ୍ତ ସବୁ ଖାଦ୍ୟ ଏହି ହୋଟେଲରେ ଉପଲବ୍ଧ । ତେବେ ଏହି ହୋଟେଲଟି ଅତିଥିମାନଙ୍କ ସବୁ ସମୟରେ ଖୋଲା ନଥାଏ । ସପ୍ତାହରେ ଗୋଟିଏ ଦିନ ଖୋଲା ରହେ ଏହି ହୋଟେଲ । ପ୍ରତି ସପ୍ତାହରେ ଶନିବାର ରାତିରେ ଅତିଥିମାନଙ୍କ ପାଇଁ ହୋଟେଲର ଦ୍ୱାର ଖୋଲାଯାଏ । ରବିବାର ସକାଳେ ଅତିଥିମାନେ ସକାଳ ଜଳଖିଆ ସାରି ହୋଟେଲରୁ ବାହାରି ଆସନ୍ତି । ପ୍ରତିବର୍ଷ ଏହି ହୋଟେଲକୁ ପର୍ଯ୍ୟଟକଙ୍କ ସୁଅ ଛୁଟିଥାଏ ।
