ୱାଶିଂଟନ,୧୪/୦୩: ୮ ଦିନ ପାଇଁ ଯାଇଥିଲେ ହେଲେ ୯ ମାସ ହେବ ଫସି ରହିଛନ୍ତି । ଅନ୍ତର୍ଜାତୀୟ ମହାକାଶ କେନ୍ଦ୍ର (ଆଇଏସଏସ)ରୁ ନାସା ମହାକାଶଚାରୀ ସୁନୀତା ୱିଲିୟମ୍ସଙ୍କ ପ୍ରତ୍ୟାବର୍ତ୍ତନ ପୁଣି ଥରେ ବିଳମ୍ବ ହୋଇଛି । ତାଙ୍କ ଫେରିବା ନେଇ ପୁଣି ଅନିଶ୍ଚିନ୍ତତା ଦେଖାଦେଇଛି । ତେବେ କେବେ ଫେରିବେ ସୁନୀତା ଓ ତାଙ୍କ ଟିମ୍ ତାହା ଉପରେ ସମସ୍ତଙ୍କ ନଜର ରହିଛି । ଏହାରି ଭିତରେ ନୂଆ ତାରିଖ ଦେଇଛି ନାସା । ଆସନ୍ତା ମାର୍ଚ୍ଚ ୧୯ ତାରିଖ ସୁଦ୍ଧା ସୁନୀତା ୱିଲିୟମ୍ସ ତାଙ୍କ ଟିମ୍ ସହ ମହାକାଶରୁ ଫେରି ପାରନ୍ତି ।

ସୁନୀତାଙ୍କ ଫେରିବାରେ ବିଳମ୍ବ- ପାଖାପାଖି ୯ ମାସ ହେବ (୨୮୦ ଦିନ) ମହାକାଶରେ ଫସି ରହିଛନ୍ତି ସୁନୀତାଙ୍କ ସମେତ ତାଙ୍କ ଟିମ୍ । ବୋଇଂରେ ତ୍ରୁଟିପୂର୍ଣ୍ଣ ଷ୍ଟାରଲାଇନର ମହାକାଶଯାନରେ ଯାତ୍ରା କରିବା ପରେ ୱିଲିୟମ୍ସ ସାଥୀ ମହାକାଶଚାରୀ ବୁଚ୍ ୱିଲ୍ମୋରଙ୍କ ସହ ୯ ମାସ ଧରି ଫସି ରହିଛନ୍ତି । ମାତ୍ର ୮ ଦିନ ରହିବାକୁ ସ୍ଥିର ହୋଇଥିଲା । ତାଙ୍କର ଫେରିବା ବିଳମ୍ବ ହୋଇଛି । ସ୍ପେସ୍ଏକ୍ସ ତାର କ୍ରୁ-୧୦ ମିଶନ ଉତକ୍ଷେପଣକୁ ବାତିଲ କରିବା ପରେ ଫେରିବା ଆହୁରି ବିଳମ୍ବ ହୋଇଛି । ରକେଟ୍ ପାଇଁ ଗ୍ରାଉଣ୍ଡ ସପୋର୍ଟ କ୍ଲାମ୍ପ ଆର୍ମରେ ବୈଷୟିକ ତ୍ରୁଟି ଯୋଗୁଁ ଏହି ଉତକ୍ଷେପଣକୁ ବାତିଲ କରାଯାଇଥିଲା ।

କେବେ ଫେରିବେ ସୁନୀତା ୱିଲିୟମ୍ସ ? ନାସା ଘୋଷଣା କରିଛି କି ପରବର୍ତ୍ତୀ ଉତକ୍ଷେପଣ ଶନିବାର ପୂର୍ବରୁ ସମ୍ଭବ ନୁହେଁ । ଯଦି କ୍ରୁ-୧୦ ଉତକ୍ଷେପଣ ଶନିବାର ସୁଦ୍ଧା ସଫଳ ହୁଏ ତେବେ ମାର୍ଚ୍ଚ ୧୯ ସୁଦ୍ଧା ସୁନୀତା ୱିଲିୟମ୍ସ ତାଙ୍କ ଟିମ୍ ସହ ପୃଥିବୀକୁ ଫେରିବେ । ମାର୍ଚ୍ଚ ୧୯ରେ ସୁନୀତା ଆଇଏସଏସ ଛାଡିବେ ବୋଲି ଆଶା କରାଯାଉଛି ।

ଅଧିକ ପଢନ୍ତୁ...ରଟେକ୍ ଲଞ୍ଚକୁ ୧ ଘଣ୍ଟା ଥିଲା; ହାଇଡ୍ରୋଲିକ୍ ସିଷ୍ଟମ ହେଲା ଫେଲ୍, ଫେରିବେନି ସୁନୀତା

କହି ରଖୁଛୁ କି, ରକେଟ୍ ଗ୍ରାଉଣ୍ଡ ସପୋର୍ଟ କ୍ଲାମ୍ପ ଆର୍ମ ହାଇଡ୍ରୋଲିକ୍ ସିଷ୍ଟମରେ ଯାନ୍ତ୍ରିକ ତ୍ରୁଟି ଦେଖା ଦେଇଥିଲା । ଏ ନେଇ କ୍ରୁ-୧୦ ମିଶନକୁ ସ୍ଥଗିତ ରଖାଯାଇଛି । ଉତକ୍ଷେପଣକୁ ୧ ଘଣ୍ଟା ଥିଲା ଏହା ପୂର୍ବରୁ ଏହି ତ୍ରୁଟି ହୋଇଥିଲା । ସୁନୀତା ୱିଲିୟିମ୍ସଙ୍କ ଫେରିବା ନେଇ ବିଳମ୍ବ ହୋଇଥିଲା । ସୁନୀତା ଓ ତାଙ୍କ ଟିମ୍ ସୁରକ୍ଷିତ ଥିବା ନାସା ପକ୍ଷରୁ କୁହାଯାଇଛି ।