ଭୁବନେଶ୍ୱର, ଶ୍ରୁତକୀର୍ତ୍ତି ତ୍ରିପାଠୀ/୭।୮: ପ୍ରକୃତିକୃତ ଦୁର୍ଲଭ ଉପଚାର ମଧ୍ୟରୁ ଆକସ୍ମିକ ଆଘାତ ବା ଧକ୍କା ହେଉଛି ଗୋଟିଏ । ଜୀବନ ତମାମ ପ୍ରକୃତି ମାନବ ସମାଜକୁ ଅନେକ ଆକସ୍ମିକ ଆଘାତ ଦିଏ; ତନ୍ମଧ୍ୟରୁ ଖାଦ୍ୟାଭାବ ଜନିତ କ୍ଷୁଧା ଯନ୍ତ୍ରଣାର ଆଘାତ ସର୍ବାଧିକ ଅସହନୀୟ । ସେହି ଜ୍ୱାଳା ମଣିଷ ସହ୍ୟ କରିପାରେ ନାହିଁ ବୋଲି ତ ଅସାଧୁ ଉପାୟଟିଏ ବାଛିନିଏ । ଚୋରି, ଡକାୟତି, ଛିନତାଇ, ହତ୍ୟା, ଅପହରଣ ଆହୁରି କେତେ କ’ଣ କରିବାରେ ତାର ଦ୍ୱିଧା ନଥାଏ । କ୍ଷୁଧା ଓ ତୃଷ୍ଣା ହେଉଛି ସେଇଭଳି ଦୁଇଟି ଆକସ୍ମିକ ଆଘାତ; ଯାହା ଚିକିତ୍ସା ଉପଚାରର ଏକ ଅଂଶବିଶେଷ । ଏହା ଦ୍ୱାରା ମଣିଷ ନିଜ ସାମର୍ଥ୍ୟକୁ ହୃଦୟଙ୍ଗମ କରିପାରେ । ଉପବାସ ମଧ୍ୟ ସେହିପରି ଏକ ଚିକିତ୍ସା ବା ଉପଚାର । ପ୍ରାୟ ସବୁ ଧର୍ମରେ ଉପବାସକୁ ଗ୍ରହଣ କରାଯାଇଛି । ମାନବ ଶରୀରକୁ ମଝି ମଝିରେ କ୍ରିୟାଶୀଳ ଅବସ୍ଥାକୁ ଆଣିବା ପାଇଁ କ୍ଷୁଧା ବା ଭୋକ ନାମକ ଆଘାତ ଦେବା ପ୍ରକୃତିର ଏକ ପ୍ରକ୍ରିୟା । ଭୋକ ମଣିଷକୁ ମନେ ପକେଇଦିଏ ଯେ, ଖାଦ୍ୟ ହେଉଛି ଜୀବନର ଏକ ମୂଲ୍ୟବାନ ଅଂଶ । 

ତେଣୁ ଖାଦ୍ୟର ସଂରକ୍ଷଣ ସହ ଖାଦ୍ୟ ଅପଚୟ ଉପରେ ରୋକ୍‌ ଲଗେଇବା ଆବଶ୍ୟକ । ଖାଦ୍ୟର ମହତ୍ତ୍ୱ ବୁଝିବା ପାଇଁ ଉପବାସକୁ ମଣିଷ ଜୀବନରେ ସ୍ଥାନ ଦିଆଯାଇଛି । ପ୍ରକୃତିରେ ପ୍ରଚୁର ପରିମାଣରେ ଖାଦ୍ୟ ଓ ଜଳ ମହଜୁଦ ରହିଛି । ଏହି ପ୍ରାଚୁର୍ଯ୍ୟକୁ ଅନୁଦାନ ମନେକରି ଅନେକେ ଖାଦ୍ୟର ସଂରକ୍ଷଣ ଓ ବ୍ୟବହାର ପ୍ରତି ସଚେତନ ହୁଅନ୍ତି ନାହିଁ । ପରିଣାମ ସ୍ୱରୂପ, ବିଶ୍ୱରେ ବହୁ ମାତ୍ରାରେ ଖାଦ୍ୟ ଓ ପାନୀୟର ଅପଚୟ ହେଉଛି । ଆଉ ମଧ୍ୟ ଉପବାସ କରିବା ଦ୍ୱାରା ମାନବର ଧୈର୍ଯ୍ୟ, ସହନଶକ୍ତି ଏବଂ ନିଜ ଉପରେ ନିୟନ୍ତ୍ରଣର କ୍ଷମତା ବୃଦ୍ଧି ପାଏ । ନିଜ ଉପରେ ନିୟନ୍ତ୍ରଣର ଏହି ଜୀବନୀ ଶକ୍ତିକୁ ଜୀବନର ସବୁ ସଫଳତାର ମୂଳମନ୍ତ୍ର କହିଲେ ଭୁଲ୍‌ ହେବନାହିଁ । ତେଣୁ ସପ୍ତାହରେ ଥରେ ବା ପନ୍ଦର ଦିନରେ ଥରେ ଉପବାସ କରିବାକୁ କୁହାଯାଇଛି । ବୈଜ୍ଞାନିକ ଦୃଷ୍ଟିକୋଣରୁ ମଧ୍ୟ ସୁସ୍ଥ ଏବଂ ସାବଲୀଳ ଜୀବନ ବଞ୍ଚିବା ପାଇଁ ଉପବାସ କରିବା ନିହାତି ଆବଶ୍ୟକ ବୋଲି ବିଶେଷଜ୍ଞମାନେ ମତ ପ୍ରକାଶ କରିଛନ୍ତି ।