ଭୁବନେଶ୍ୱର ୩୧/୦୫: ମାଇଗ୍ରେନ୍ ଏକ ସାଧାରଣ ନ୍ୟୁରୋଲୋଜି ଜନିତ ସମସ୍ୟା । ଏହି ସମୟରେ ମାତ୍ରାଧିକ ମୁଣ୍ଡବିନ୍ଧା ହୋଇଥାଏ । ଏହି ସମସ୍ୟା ପୁରୁଷଙ୍କ ଅପେକ୍ଷା ମହିଳାଙ୍କଠାରେ ଅଧିକ ଦେଖିବାକୁ ମିଳିଥାଏ । ମାଇଗ୍ରେନ୍ ହେବା ସମୟରେ ମୁଣ୍ଡବିନ୍ଧା ପ୍ରାୟ ୪ ଘଣ୍ଟାରୁ ୭୨ ଘଣ୍ଟା ପର୍ଯ୍ୟନ୍ତ ରହିଥାଏ । ଏହାବ୍ୟତୀତ ରୋଗୀକୁ ବାନ୍ତି ମଧ୍ୟ ହୋଇପାରେ । ସେହିପରି ଅଧିକ ଶବ୍ଦ ଓ ଆଲୋକ ରୋଗୀକୁ ବିଚଳିତ କରିପାରେ । ସର୍ଭେ ରିପୋର୍ଟ ଅନୁସାରେ ମାଇଗ୍ରେନ୍ ହେଉଛି ବିଶ୍ୱର ତୃତୀୟ ସର୍ବାଧିକ ସ୍ୱାସ୍ଥ୍ୟ ସମସ୍ୟା । ମାଇଗ୍ରେନ୍ ସମସ୍ୟାକୁ ବଢାଇଥାଏ ନିଦର ଅଭାବ, ଖାଇବାରେ ଅବହେଳା, ଅଧିକ ୱାର୍କଆଉଟ୍, ଅଧିକ ଭାବନାତ୍ମକ ଚିନ୍ତା, ଅଧିକ ଆଲୋକ, ଅଧିକ ଶବ୍ଦ, ହର୍ମୋନ୍ ପରିବର୍ତ୍ତନ, ଋତୁସ୍ରାବ ଓ ଶରୀରରେ ଜଳାଭାବ ଆଦି ଅନ୍ୟତମ । ସେହିପରି କିଛି ଖାଦ୍ୟର ବାସ୍ନା ମଧ୍ୟ ମାଇଗ୍ରେନ୍କୁ ବଢାଇଥାଏ ଯେପରିକି କ୍ୟାଫିନ୍, ଚକୋଲେଟ୍, ଚିଜ୍, ଆଚାର ଓ ପ୍ରୋସେସ୍ଡ ମାଂସ । ଏହାବ୍ୟତୀତ ଋତୁ ପରିବର୍ତ୍ତନ, ଅଧିକ ଗରମ, ଅଧିକ ଖରା ସାଙ୍ଗକୁ ଗରମରେ ମଧ୍ୟ ମାଇଗ୍ରେନ୍ ଆଟାକ୍ ଆସିପାରେ ।
ମାଇଗ୍ରେନ୍ରୁ ରକ୍ଷା ପାଇବାର ଉପାୟ:
-ଘରୁ ବାହାରକୁ ଯିବା ସମୟରେ ସାଙ୍ଗରେ ପାଣି ବୋତଲ ନିଶ୍ଚୟ ନିଅନ୍ତୁ । ଦିନକୁ ୨ରୁ ୩ ଲିଟର ପାଣି ପିଇବା ଆବଶ୍ୟକ ।
- କଫି, ରେଡ୍ ୱାଇନ୍, ଚକୋଲେଟ୍ ଓ ଚିଜ୍ ପରିବର୍ତ୍ତେ ଆମ୍ବ, ତରଭୁଜ୍, କାକୁଡି ଓ ସବୁଜ ପତ୍ରଯୁକ୍ତ ପରିବା ଓ ଶାଗ ମଧ୍ୟ ସାମିଲ୍ କରନ୍ତୁ ।
-ସିଧାସଳଖ ଖରାରୁ ମୁଣ୍ଡକୁ ରକ୍ଷା କରିବା ପାଇଁ ହ୍ୟାଟ୍ସ ଓ ଟୋପି ବ୍ୟବହାର କରନ୍ତୁ । ଏହା ମାଇଗ୍ରେନ୍ ଆଟାକ୍ରୁ ରକ୍ଷା କରିଥାଏ ।
-ଯେତେବେଳେ ସନ୍ସ୍କ୍ରିନ୍ ଲୋସନ୍ ଚୟନ କରୁଛନ୍ତି, ସେତେବେଳେ ବାସ୍ନାଯୁକ୍ତ ଉତ୍ପାଦଠାରୁ ଦୂରେଇ ରୁହନ୍ତୁ ।
-ଏସିର ତାପମାତ୍ରା ୨୫ରୁ ୨୭ ମଧ୍ୟରେ ରଖନ୍ତୁ, ଯାହା ମଣିଷର ଶରୀର ପାଇଁ ଉପଯୁକ୍ତ ତାପମାତ୍ରା ।
-ନିର୍ଦ୍ଦିଷ୍ଟ ସମୟରେ ଖାଇବା ସହ ଶୋଇବା ପ୍ରତି ବିଶେଷ ଧ୍ୟାନ ଦିଅନ୍ତୁ । ଛୁଟିରେ ଥିଲେ ମଧ୍ୟ ଏଥିରେ ଅବହେଳା କରନ୍ତୁ ନାହିଁ ।
-ମାତ୍ରାଧିକ ଖରାଠାରୁ ଦୂରେଇ ରହିବା ପାଇଁ ଚେଷ୍ଟା କରନ୍ତୁ । ଖରାଠାରୁ ଦୂରେଇ ରହି ବ୍ୟାୟାମ କରନ୍ତୁ ।
-ଚିନ୍ତା ନ କରି ନିଜ କାମକୁ ସହଜ କରିବାକୁ ଚେଷ୍ଟା କରନ୍ତୁ । ସମୟର ନିୟନ୍ତ୍ରଣ କରିବା ଶିଖନ୍ତୁ । ଅଫିସ୍ରେ ଥିଲେ ସବୁ କାମର ବୋଝ ନିଜେ ନିଅନ୍ତୁ ନାହିଁ । ବରଂ କାମକୁ ଟିମ୍ରେ ବାଣ୍ଟି ନିଅନ୍ତୁ ।
