ନୂଆଦିଲ୍ଲୀ: ପାକିସ୍ତାନର ପୂର୍ବତନ ପ୍ରଧାନମନ୍ତ୍ରୀ ଇମ୍ରାନ ଖାନଙ୍କୁ କୋର୍ଟରୁ ଏକ ବଡ଼ ଝଟକା ଲାଗିଛି । ଅନୈତିକ ନିକାହ ମାମଲାରେ ତାଙ୍କୁ ଦିଆଯାଇଥିବା ଦଣ୍ଡକୁ ସ୍ଥଗିତ ରଖିବାକୁ ଇମ୍ରାନ ଖାନ ଏବଂ ତାଙ୍କ ପତ୍ନୀ ବୁଶ୍ରା ବିବି ଆବେଦନ କରିଥିଲେ । ଏହି ଆବେଦନକୁ ଆଜି (ଗୁରୁବାର) ଏକ ଜିଲ୍ଲା କୋର୍ଟ ପ୍ରତ୍ୟାଖ୍ୟାନ କରିଛନ୍ତି। ଏହି କାରଣରୁ, ଇମ୍ରାନ ଖାନଙ୍କୁ ଶୀଘ୍ର ଜେଲରୁ ବାହାରିବା କଷ୍ଟକର ହୋଇପାରେ । ସୂଚନାଥାଉକି, ଫେବୃଆରୀ ୩ ରେ, ଜିଲ୍ଲା ଏବଂ ସେସନ କୋର୍ଟ ଏହି ଦମ୍ପତିଙ୍କୁ ସାତ ବର୍ଷ ଜେଲଦଣ୍ଡ ଏବଂ ଏହି ମାମଲାରେ ପ୍ରତ୍ୟେକଙ୍କୁ ୫୦ ହଜାର ଟଙ୍କା ଜରିମାନା କରିଛନ୍ତି।
ଏହି ମାମଲା ସାଧାରଣତ ଇଦତ୍ ମାମଲା ଭାବରେ ଜଣାଶୁଣା । ଇଦତ ହେଉଛି ସେହି ସମୟ ଯେଉଁଥିରେ ଜଣେ ମୁସଲମାନ ମହିଳା ସ୍ୱାମୀଙ୍କ ମୃତ୍ୟୁ କିମ୍ବା ଛାଡପତ୍ର ପରେ ପୁନଃବିବାହ କରିବା ପୂର୍ବରୁ ବିତାଇବାକୁ ପଡିଥାଏ । ଏହି ମାମଲାର ଶୁଣାଣି ପରେ ଅତିରିକ୍ତ ଜିଲ୍ଲା ତଥା ସେସନ ଜଜ୍ ଆଫଜାଲ ମଜୋକା ମଙ୍ଗଳବାର ଦିନ ଏହି ରାୟ ସଂରକ୍ଷିତ ରଖିଛନ୍ତି । ଜଜ୍ ଗୁରୁବାର କୋର୍ଟ ପରିସରରେ କହିଛନ୍ତି ଯେ ଏହି ଦମ୍ପତିଙ୍କ ଦ୍ବାରା ଦାଖଲ ହୋଇଥିବା ଆବେଦନ ଖାରଜ ହୋଇଛି । ଏହି ନିଷ୍ପତ୍ତି ରାୱଲପିଣ୍ଡିର ଆଡିଆଲା ଜେଲରେ ଥିବା ଦମ୍ପତିଙ୍କୁ ମୁକ୍ତ କରିବା ପାଇଁ ପ୍ରୟାସକୁ ଏକ ଝଟକା ଦେଇଛି।
ପୂର୍ବତନ ପ୍ରଧାନମନ୍ତ୍ରୀ ଖାନ (୭୧) ଙ୍କ ବିରୋଧରେ ଅନେକ ମାମଲା ରୁଜୁ ହୋଇଥିବା ବେଳେ ତାଙ୍କ ପତ୍ନୀ ବୁଶ୍ରା (୪୯) ମଧ୍ୟ ଅନେକ ମାମଲାର ସମ୍ମୁଖୀନ ହୋଇଛନ୍ତି। ଏହି ବେଆଇନ ନିକା ମାମଲା ବୁଶ୍ରା ବିବିଙ୍କ ପୂର୍ବତନ ସ୍ୱାମୀ ଖାନୱାର ମାନେକା ନଭେମ୍ବର ୨୦୨୩ ରେ ଦାଖଲ କରିଥିଲେ । ସେ ଅଭିଯୋଗ କରିଛନ୍ତି ଯେ ବୁଶ୍ରା ଇମ୍ରାନ ଖାନ୍କୁ ଇଦତର ବାଧ୍ୟତାମୂଳକ ଅବଧି ପୂରଣ ନକରି ବିବାହ କରିଥିଲେ । ଖାନ ଏବଂ ବୁଶ୍ରାଙ୍କ ବିବାହକୁ ଅନୈତିକ କରିବାକୁ ମାନେକା ନିବେଦନ କରିଥିଲେ । ଖାନ ଏବଂ ବୁଶ୍ରା ବିବି ୨୦୧୮ ରେ ବିବାହ କରିଥିଲେ । ବୁଶ୍ରା ହେଉଛନ୍ତି ଇମ୍ରାନ ଖାନଙ୍କ ତୃତୀୟ ପତ୍ନୀ।