ନୂଆଦିଲ୍ଲୀ,୨୮/୦୬: ଇସ୍ରାଏଲ-ହମାସ ଯୁଦ୍ଧକୁ ଟପିଲାଣି ୯ ମାସ। ଖାନ୍ ୟୁନିସ୍, ରଫାହ ସମେତ ଅନେକ ଅଞ୍ଚଳକୁ ଟାର୍ଗେଟ କରୁଛି ଆଇଡିଏଫ୍। ଆକ୍ରମଣ ଭିତରେ ପାଖାପାଖି ୧୦ ଲକ୍ଷ ଲୋକ ଭୟଭିତ ହୋଇ ନିଜ ସ୍ଥାନ ଛାଡ଼ିସାରିଲେଣି। ଏତେ ସବୁ ପରେ ଇସ୍ରାଏଲ ପୁଣି ଏକ ବଡ଼ ଆକ୍ରମଣ କରିବାକୁ ପ୍ରସ୍ତୁତ ହେଊଛି। ଏଥରର ଟାର୍ଗେଟ 'ଲେବାନନ୍'।
ଲେବାନନ୍ ସୀମାରେ ଇସ୍ରାଏଲ ଏହାର ସେନା ମୁତୟନ କରିସାରିଛି। ଯେକୌଣସି ମୂହୁର୍ତ୍ତରେ ଆକ୍ରମଣ କରିବାର ଭୟ ଗୋଡ଼ାଉଛି। ଗାଜା ପଟ୍ଟିରେ ହମାସ ପକ୍ଷରୁ ଜାରି ଆକ୍ରମଣ ଭିତରେ ସେପଟେ ଇସ୍ରାଏଲ ଉପରେ ହିଜବୁଲ୍ଲାହ ମଧ୍ୟ ଆତଙ୍କବାଦୀ ଆକ୍ରମଣ କରୁଥିଲା। ଏହି ଆତଙ୍କୀ ସଂଗଠନ ଲେବାନନ ସହିତ ସକ୍ରିୟ ରହିଛି ଏବଂ ଏହାକୁ ଇରାନ ସମର୍ଥନ କରୁଛି। ଏହି ପରିପ୍ରେକ୍ଷିରେ ଇସ୍ରାଏଲ ଏବେ ଲେବାନନକୁ ଟାର୍ଗେଟ କରିବାକୁ ପ୍ରସ୍ତୁତି ଚଳାଇଛି।
ଇସ୍ରାଏଲର ଏହି ଘୋଷଣା ସହିତ ବିଶ୍ବର ପ୍ରମୁଖ ରାଷ୍ଟ୍ରର ନେତାମାନେ ସତର୍କ ହୋଇଥିଲେ। ଅନେକ ନେତା ମଧ୍ୟ ବେଞ୍ଜାମିନ ନେତାନ୍ୟାହୁଙ୍କୁ ସତର୍କ କରାଇଛନ୍ତି ଯେ, ସେ ଏଥିରୁ ବିରତ ରୁହନ୍ତୁ, ନଚେତ ଯୁଦ୍ଧ ଆହୁରି ବଡ଼ ଓ ଭୟାନକ ହୋଇପାରେ। ନେତାନ୍ୟାହୁ ସୋସିଆଲ ମିଡିଆରେ ଏକ ଭିଡିଓ ସେୟାର କରିଛନ୍ତି, ଯେଉଁଥିରେ ସେ ଇସ୍ରାଏଲି ସୁରକ୍ଷା ବଳକୁ କହୁଛନ୍ତି ଯେ, ଆମେ ବିଜୟ ପାଇଁ ପ୍ରସ୍ତୁତ ଏବଂ ପ୍ରତିବଦ୍ଧ ଅଟୁ। ଇସ୍ରାଏଲର ବରିଷ୍ଠ ନେତା ମାନେ ଲେବାନନ ସୀମା ଅଞ୍ଚଳ ବୁଲି ଆସିଲେଣି। ଲେବାନନ ଓ ଇସ୍ରାଏଲ ମଧ୍ୟରେ ବିବାଦ ଏମିତି ଏକ ସମୟରେ ହୋଇଛି, ଯେତେବେଳେ ମଧ୍ୟପ୍ରାଚ୍ୟକୁ ନେଇ ସାରା ବିଶ୍ବ ଚିନ୍ତାରେ ରହିଛି।
