ଓ୍ବାଶିଂଟନ: ସାଥିମାନଙ୍କ ସହ ଅର୍ଥପୂର୍ଣ୍ଣ ସାମାଜିକ ବାର୍ତ୍ତାଳାପ ଦ୍ବାରା ଏକଲାପଣ ଦୂର ହେବା ସହ ନିଜର ଜୀବନ ସୁଖମୟ ହୋଇଥାଏ । ଏକ ଗବେଷଣାତ୍ମକ ରିପୋର୍ଟରୁ ଏହି ତଥ୍ୟ ସାମ୍ନାକୁ ଆସିଛି । ବିଶ୍ବବିଦ୍ୟାଳୟ ଛାତ୍ରଛାତ୍ରୀଙ୍କୁ ୩ଟି ଗୋଷ୍ଠୀରେ ବିଭକ୍ତ କରି ଦୀର୍ଘ ୩ ବର୍ଷ ଧରି ସେମାନଙ୍କ ମଧ୍ୟରେ ସଂପର୍କ ଏବଂ ଏହାର ପ୍ରଭାବ ଉପରେ ଅଧ୍ୟୟନ କରିଥିଲେ ଗବେଷକ । ଅଧ୍ୟୟନ ପରେ ଗବେଷକଙ୍କୁ ଯେଉଁ ତଥ୍ୟ ମିଳିଛି ତାହା ‘ସୋସିଆଲ ସାଇକୋଲୋଜିକାଲ୍ ଆଣ୍ଡ ପର୍ସନାଲିଟି ସାଇନ୍ସ’ ପତ୍ରିକାରେ ପ୍ରକାଶ ପାଇଛି ।
ପଜିଟିଭ୍ କନଭର୍ସେସନ (ସକରାତ୍ମକ ବାର୍ତ୍ତାଳପ) କରିବା ଦ୍ବାରା ଜଣେ ବ୍ୟକ୍ତିଙ୍କୁ ମାନସିକ ଚାପ ଏବଂ ଏକଲାପଣରୁ ଆଶ୍ବସ୍ତି ମିଳିଥାଏ । ସେହିଭଳି ଭଲ କିମ୍ବା କମ୍ ଯୋଗାଯୋଗ ଥିବା ସାଥିମାନଙ୍କ ସହ ସାରଗର୍ଭିତ ବା ଗହନ(Deep Conversations) ଆଲୋଚନା କରିବା ଦ୍ବାରା ଅଳ୍ପ କେତେ ଜଣଙ୍କୁ ଖୁସି ମିଳୁଛି ବୋଲି ଗବେଷଣାରୁ ଜଣାପଡ଼ିଛି । ସବୁଠୁ ବଡ଼ କଥା ହେଉଛି, ଯେତେବେଳେ ବ୍ୟକ୍ତି ବ୍ୟକ୍ତିଙ୍କ ମଧ୍ୟରେ ମୁହାଁମୁହିଁ ଅର୍ଥପୂର୍ଣ୍ଣ ସାମାଜିକ ବାର୍ତ୍ତାଳାପ ହୁଏ ସେତେବେଳେ ଏହାର ଫଳାଫଳ ଖୁବ ସକରାତ୍ମକ । କିନ୍ତ ଏହି କଥାବାର୍ତ୍ତା ମେସେଜ୍ କିମ୍ବା କୌଣସି ସୋସିଆଲ ମିଡିଆରେ ହୋଇନଥିବା ଦରକାର । ଏଥିରୁ ସ୍ପଷ୍ଟ ଯେ, ମୁହାଁମୁହିଁ କୌଣସି ଅର୍ଥପୂର୍ଣ୍ଣ ପ୍ରସଙ୍ଗରେ ଆଲୋଚନା କରିବା ଦ୍ବାରା ବ୍ୟକ୍ତିଙ୍କ ଏକଲାପଣ ଦୂର ହେବା ସହ ମାନସିକ ଚାପରୁ ମଧ୍ୟ ଆଶ୍ବସ୍ତି ମିଳିପାରିବ ବୋଲି ଗବେଷଣାର ମୁଖ୍ୟ ମହନାଜ ରୋସାନାଇ କହିଛନ୍ତି ।
ସେପଟେ ଗବେଷଣା କେବଳ ବିଶ୍ବିବଦ୍ୟାଳୟ ଛାତ୍ରଛାତ୍ରୀଙ୍କ ପାଖରେ ସୀମିତ । ତେଣୁ ଗବେଷଣାରୁ ମିଳିଥିବା ତଥ୍ୟକୁ ପ୍ରତିଟି ବ୍ୟକ୍ତିଙ୍କ କ୍ଷେତ୍ରରେ ଉପଯୋଗ କରାଯାଇପାରିବ ନାହିଁ ବୋଲି ଗବେଷକ ସ୍ବୀକାର କରିଛନ୍ତି । ଏପରିକି ଆମେରିକାରରେ ଏହି ଗବେଷଣା ହୋଇଥିବାରୁ ଏହର ଆଉଟକମ୍ ବିଶ୍ବର ଅନ୍ୟ ଦେଶରେ ଭିନ୍ନ ହୋଇପାରେ । ମହନାଜ ରୋସାନାଇ କହିଛନ୍ତି ଯେ, ଭବିଷ୍ୟତରେ ଏହି ଗବେଷଣାତ୍ମକ ତଥ୍ୟ ସୁସ୍ଥ ସାମାଜିକ ଜୀବନକୁ ପ୍ରୋତ୍ସାହିତ କରିବା ପାଇଁ ଷ୍ଟ୍ରାଟେଜି ତିଆରି କରିବାରେ ବ୍ୟବହାର କରାଯାଇପାରିବ ।
