ନୂଆଦିଲ୍ଲୀ: ହାଓ୍ବାଇ ଦ୍ବୀପର ଆଖପାଖ ଅଞ୍ଚଳରେ ରିମ ଅଫ ଦି ପାସିଫିକ୍ (ରିମପ୍ୟାକ୍) ଅଭ୍ୟାସ ଜୁନ ୨୭ରୁ ଆରମ୍ଭ ହୋଇଛି । ଅଗଷ୍ଟ ୧ ଯାଏଁ ହେବାକୁ ଥିବା ଏହି ଯୁଦ୍ଧାଭ୍ୟାସରେ ୨୯ ଦେଶର ସେନା ସାମିଲ ହେବେ । ୧୯୭୧ରେ ଅଷ୍ଟ୍ରେଲିଆ, କାନାଡା ଏବଂ ଆମେରିକା ଏହି ଯୁଦ୍ଧାଭ୍ୟାସ ଆରମ୍ଭ କରିଥିଲେ । ଏହି ଏକ୍ସରସାଇଜ୍ରେ ଏବେ ଦକ୍ଷିଣ କୋରିଆ, ଜାପାନ, ଭାରତ, ଦକ୍ଷିଣ ପୂର୍ବ ଏସୀୟ ରାଷ୍ଟ୍ର, ଲାଟିନ୍ ଆମେରିକା ଏବଂ ବହୁ ନାଟୋ ସହଯୋଗୀ ରାଷ୍ଟ୍ର ସାମିଲ ହେଉଛନ୍ତି । ଏହି ଯୁଦ୍ଧାଭ୍ୟାସରେ ୧୫୦ ବିମାନ, ୪୦ ବଡ଼ ଜାହାଜ, ୩ ଟି ବୁଡ଼ାଜାହାଜ ଏବଂ ୨୫ ହଜାରରୁ ଅଧିକ ସୈନିକ ଅଂଶଗ୍ରହଣ କରୁଛନ୍ତି ।
ଜାହାଜରେ ଯୁଦ୍ଧ ବିମାନ ଲ୍ୟାଣ୍ଡିଂ, ବୁଡ଼ାଜାହାଜ ଧ୍ବଂସ କରିବା ନେଇ ପ୍ରଶିକ୍ଷଣ, ଜାହାଜ ବୁଡ଼ାଇବାକୁ ଅଭ୍ୟାସ ସହିତ ରାଫେଲ୍ର ଗର୍ଜନ ବି ଶୁଣିବାକୁ ମିଳିବ । ଚୀନ୍ ସହିତ ବଢ଼ୁଥିବା ତିକ୍ତତା ମଧ୍ୟରେ ଏଭଳି ସାମୁହିକ ଯୁଦ୍ଧାଭ୍ୟାସର ଭୂରାଜେନୖତିକ ମହତ୍ତ୍ବ ରହିଛି । ଆମେରିକା ଏବଂ ଏହାର ୟୁରୋପୀୟ ସହଯୋଗୀଙ୍କ ମଧ୍ୟରେ ନୂଆ ପ୍ରତିରକ୍ଷା ଚୁକ୍ତି ହୋଇଛି । ଏହା ସହ ପ୍ରଶାନ୍ତ ମହାସାଗରୀୟ କ୍ଷେତ୍ରରେ ଏମାନେ ନିଜ ନିଜର ସୈନ୍ୟ କ୍ଷମତା ବୃଦ୍ଧି କରିଛନ୍ତି ।
ଅନ୍ୟପଟେ ତାଇଓ୍ବାନ ଉପକୂଳରେ ଚୀନ୍ ନିଜର ସୈନ୍ୟ ଗତିବିଧି ବଢ଼ାଇ ଦେଇଛି । ଏହା ସହ ଫିଲିପାଇନ୍ସ ସୀମାରେ ଚୀନ୍ର ଯୁଦ୍ଧାଜାହାଜର ଉପସ୍ଥିତି ମଧ୍ୟ ବିଶ୍ବରେ ନୂଆ ବିବାଦକୁ ଜନ୍ମ ଦେଇଛି । ଇଣ୍ଡୋ-ପାସିଫିକ୍ କ୍ଷେତ୍ରରେ କ୍ଷେତ୍ରୀୟ ଦାବିକୁ ନେଇ ଚୀନ୍, ତାଇଓ୍ବାନ, ଫିଲିପାଇନ୍ସ, ଭିଏତନାମ ଏବଂ ମାଲେସିଆ ମଧ୍ୟରେ ବିବାଦ ବଢ଼ିବାରେ ଲାଗିଛି । ଏହାକୁ ନଜରରେ ରଖି ଆମେରିକା ଏବଂ ବହୁ ନାଟୋ ସଦସ୍ୟ ଦେଶ ଏହି କ୍ଷେତ୍ରରରେ ନିଜର ଉପସ୍ଥିତି ଜାହିର କରିବାକୁ ମଧ୍ୟ ପ୍ରଚେଷ୍ଟା ଜାରି ରଖିଛନ୍ତି ।