ନୂଆଦିଲ୍ଲୀ: ମଙ୍ଗଳବାର ଉତ୍ତରପ୍ରଦେଶର ହାଥରସ୍ ଜିଲ୍ଲାରେ ଭୋଲେବାବା ସତସଙ୍ଗ କେନ୍ଦ୍ରରେ ଦଳାଚକଟାରେ ୧୨୨ ଜଣଙ୍କର ମୃତ୍ୟୁ ହୋଇଛି । ସିକନ୍ଦରାଉ ଅଞ୍ଚଳର ଫୁଲରାଇ ଗ୍ରାମରେ ଲକ୍ଷ ଲକ୍ଷ ଅନୁଗାମୀ ନାରାୟଣ ସାକର ବିଶ୍ୱ ହରିଙ୍କ ସତସଙ୍ଗରେ ପହଞ୍ଚିଥିଲେ । ଏହି ସମୟରେ ଏକ ଦଳାଚକଟା ପରିସ୍ଥିତି ଉପୁଜିଥିଲା । ଏହି ସମଗ୍ର ଘଟଣା ଦେଶ ତଥା ବିଶ୍ବରେ ଏବେ ଆଲୋଡନ ସୃଷ୍ଟି କରିଛି ଏବଂ ସମସ୍ତ ନେତା ଏବଂ ଅଭିନେତା ଏହି ଦୁର୍ଘଟଣାରେ ଦୁଖ ପ୍ରକାଶ କରୁଛନ୍ତି । ତେବେ ଏସବୁ ମଧ୍ୟରେ ଋଷର ରାଷ୍ଟ୍ରପତି ଭ୍ଲାଦିମିର ପୁଟିନ ମଧ୍ୟ ଏହି ଦୁର୍ଘଟଣାରେ ଦୁଖ ପ୍ରକାଶ କରିବା ସହ ସମବେଦନା ଜଣାଇଛନ୍ତି । ରାଷ୍ଟ୍ରପତି ଦ୍ରୌପଦୀ ମୁର୍ମୁ ଏବଂ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ପୁଟିନ ଏକ ସମବେଦନା ବାର୍ତ୍ତା ପଠାଇଛନ୍ତି ।
ସୂଚନା ମୁତାବତ ପୁଟିନ ତାଙ୍କ ବାର୍ତ୍ତାରେ ଲେଖିଛନ୍ତି ଯେ, ଉତ୍ତରପ୍ରଦେଶରେ ଘଟିଥିବା ଏହି ଦଃଖଦ ଦୁର୍ଘଟଣାରେ ପ୍ରାଣ ହରାଇଥିବା ଲୋକଙ୍କ ପରିବାର ପ୍ରତି ମୁଁ ସମବେଦନା ଜଣାଉଛି । ଦୁର୍ଘଟଣାରେ ଆହତମାନଙ୍କ ଶୀଘ୍ର ଆରୋଗ୍ୟ ପାଇଁ ମୁଁ କାମନା କରୁଛି । ଆମେ ଏଥି ପାଇଁ ଦୁଃଖିତ ।
ପୁଟିନ୍ଙ୍କ ଏହି ସମବେଦନା ବାର୍ତ୍ତା ଏଭଳି ସମୟରେ ଆସିଛି, ଯେତେବେଳେ କି, ପ୍ରଧାନମନ୍ତ୍ରୀ ମୋଦୀ ଋଷ ରାଷ୍ଟ୍ରପତି ଭ୍ଲାଦିମିର ପୁଟିନଙ୍କୁ ଭେଟିବା ପାଇଁ ମସ୍କୋ ଗସ୍ତ କରିବାକୁ ପ୍ରସ୍ତୁତ ହେଉଛନ୍ତି । ଏହି ଗସ୍ତ ଏପର୍ଯ୍ୟନ୍ତ ଆନୁଷ୍ଠାନିକ ଭାବେ ଘୋଷଣା କରାଯାଇ ନାହିଁ କିନ୍ତୁ ସୂଚନା ରହିଛି ଯେ ମୋଦୀ ଆସନ୍ତା ସପ୍ତାହରେ ମସ୍କୋ ଗସ୍ତ କରିପାରନ୍ତି । ଏସବୁ ମଧ୍ୟରେ ବୈଦେଶିକ ମନ୍ତ୍ରୀ ଏସ୍ ଜୟଶଙ୍କର ବର୍ତ୍ତମାନ ଋଷରେ ଅଛନ୍ତି । ସାଂଘାଇ ସହଯୋଗ ସଂଗଠନ (ଏସସିଓ) ର ବାର୍ଷିକ ଶିଖର ସମ୍ମିଳନୀରେ ଭାରତର ପ୍ରତିନିଧିତ୍ବ କରିବା ପାଇଁ ଜୟଶଙ୍କର ମଙ୍ଗଳବାର ଏଠାରେ ପହଞ୍ଚିଛନ୍ତି।
