ନୂଆଦିଲ୍ଲୀ: ଭାରତୀୟ ମୂଳ ବ୍ରିଟିଶ ପ୍ରଧାନମନ୍ତ୍ରୀ ତଥା କନ୍ଜରଭେଟିଭ ପାର୍ଟି ନେତା ଋଷି ସୁନକ ତାଙ୍କ ପରାଜୟକୁ ସ୍ବିକାର କରିଛନ୍ତି । ତଥାପି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ସୁନକଙ୍କୁ ଅଭିନନ୍ଦନ ଜଣାଇଛନ୍ତି । ସେ କହିଛନ୍ତି ଯେ, ୟୁ.କେ.କୁ ଆପଣଙ୍କର ପ୍ରଶଂସନୀୟ ନେତୃତ୍ୱ ଏବଂ ଆପଣଙ୍କର କାର୍ଯ୍ୟକାଳ ମଧ୍ୟରେ ଭାରତ ଏବଂ ବ୍ରିଟେନ ମଧ୍ୟରେ ସମ୍ପର୍କ ଗଭୀର କରିବାରେ ଆପଣଙ୍କର ସକ୍ରିୟ ଅବଦାନ ପାଇଁ ଋଷି ସୁନକଙ୍କୁ ଧନ୍ୟବାଦ । ଏଥିସହ ପିଏମ ମୋଦୀ ଋଷି ସୁନକ ଏବଂ ତାଙ୍କ ପରିବାରକୁ ଭବିଷ୍ୟତ ପାଇଁ ଶୁଭେଚ୍ଛା ଜଣାଇଛନ୍ତି ।
ସଦ୍ୟ ବ୍ରିଟେନରେ ଶେଷ ହୋଇଥିବା ନିର୍ବାଚନର ଫଳାଫଳରେ ବ୍ରିଟିଶ ପ୍ରଧାନମନ୍ତ୍ରୀ ତଥା କନଜରଭେଟିଭ୍ ପାର୍ଟି ନେତା ଋଷି ସୁନକ ତାଙ୍କ ପରାଜୟକୁ ଗ୍ରହଣ କରିଛନ୍ତି । ଏହି ବିଜୟ ପାଇଁ ସେ ଲେବର ପାର୍ଟି ନେତା କିଆର ଷ୍ଟାରମରଙ୍କୁ ଅଭିନନ୍ଦନ ଜଣାଇଛନ୍ତି । ସେ କହିଛନ୍ତି, “ବ୍ରିଟିଶ ଲୋକମାନେ ଏକ ସମ୍ମାନଜନକ ନିଷ୍ପତ୍ତି ଦେଇଛନ୍ତି । ଏଥିରୁ ବହୁତ କିଛି ଶିଖିବା ଆବଶ୍ୟକ । ମୁଁ ପରାଜୟକୁ ଗ୍ରହଣ କରୁଛି । ତେବେ ଋଷି ସୁନକ ୟର୍କସାୟାରରେ ରିଚମଣ୍ଡ ଆସନ ଜିତି ଆସନ ବଜାୟ ରଖିଛନ୍ତି ।
ସୂଚନାଥାଉକି, ଯେ ବ୍ରିଟେନରେ ୨୦୧୯ ନିର୍ବାଚନରେ କନଜରଭେଟିଭ୍ ପାର୍ଟି ୬୫୦ ସିଟ୍ ବିଶିଷ୍ଟ ସଂସଦରେ ୩୬୪ ଟି ଆସନ ଜିତିଥିଲେ ଏବଂ ବୋରିସ୍ ଜନସନ ପ୍ରଧାନମନ୍ତ୍ରୀ ହୋଇଥିଲେ । ତେବେ ଗତ ଥର ତୁଳନାରେ ଏହା ୪୭ ଟି ସିଟ୍ ହାସଲ କରିଥିଲା । କିନ୍ତୁ ଏଥର ପରିସ୍ଥିତି ସମ୍ପୂର୍ଣ୍ଣ ଓଲଟା । ଏଥର ଲେବର ପାର୍ଟି ୧୪ ବର୍ଷ ପରେ ବ୍ରିଟେନରେ କ୍ଷମତାକୁ ଫେରୁଛି । ବ୍ରିଟେନର ମୋଟ ୬୫୦ ଟି ସିଟ୍ ମଧ୍ୟରୁ ଲେବର ପାର୍ଟି ୪ ଶହରୁ ଅଧିକ ସିଟ୍ ଜିତିଛି ।