ନୂଆଦିଲ୍ଲୀ,୦୮/୦୭:ସୋମବାର ଦୁଇ ଦିନିଆ ରୁଷ୍‌ ଗସ୍ତରେ ଯିବେ ପ୍ରଧାନମନ୍ତ୍ରୀ ନରେନ୍ଦ୍ର  ମୋଦି । ଏନେଇ ରୁଷ୍‌ରେ ଅବସ୍ଥାପିତ ଭାରତୀୟ ରାଷ୍ଟ୍ରଦୂତ ବିନୟ କୁମାର ସୂଚନା ଦେଇଛନ୍ତି । ୟୁକ୍ରେନ୍‌ ଉପରେ ରୁଷ୍‌ ଆକ୍ରମଣ କରିବା ପରଠାରୁ ଏହା ମୋଦିଙ୍କ ପ୍ରଥମ ରୁଷ୍‌ ଗସ୍ତ ହେବ । ଏହି  ଅବସରରେ ମୋଦି ରୁଷ୍‌ ରାଷ୍ଟ୍ରପତି ଭ୍ଲାଦିମିର ପୁଟିନ୍‌ଙ୍କ ସହ ଦ୍ୱିପାକ୍ଷିକ ବୈଠକ କରିବା ସହ  ପାରସ୍ପରିକ ସ୍ୱାର୍ଥ ଉପରେ ଆଲୋଚନା କରିବେ । ପ୍ରାୟ ୩ ବର୍ଷର ବ୍ୟବଧାନ ପରେ ମୋଦିଙ୍କ ଏହି  ଗସ୍ତ ଏବଂ ପୁଟିନ୍‌ଙ୍କ ସହ ଆଲୋଚନା ବେଶ୍‌  ଗୁରୁତ୍ୱପୂର୍ଣ୍ଣ ହେବ । 

ଏଥିସହ ପୁଟିନଙ୍କ ନିମନ୍ତ୍ରଣ  କ୍ରମେ ମୋଦି ୨୨ତମ ଭାରତ-ରୁଷ୍‌ ବାର୍ଷିକ  ଶିଖର ସମ୍ମିଳନୀରେ ଭାଗ ନେବେ । ଶେଷଥର  ପାଇଁ ୨୦୨୧ରେ ନୂଆଦିଲ୍ଲୀରେ ଏହି ସମ୍ମିଳନୀ  ହୋଇଥିଲା । କିନ୍ତୁ ଏହାପରଠାରୁ ବିଶ୍ୱରେ  ବହୁ କିଛି ବଦଳିଯାଇଛି ବୋଲି ବିନୟ କୁମାର କହିଛନ୍ତି । ସୋମବାର ଅପରାହ୍ନରେ ମୋଦି  ମସ୍କୋରେ ପହଞ୍ଚିବେ । ପରେ ରାଷ୍ଟ୍ରପତି ପୁଟିନଙ୍କ  ସହ ଭୋଜନ କରିବାର କାର୍ଯ୍ୟକ୍ରମ ରହିଛି।  

ମଙ୍ଗଳବାର ମୋଦି ରୁଷ୍‌ରେ ଥିବା ଭାରତୀୟ  ସମୁଦାୟଙ୍କୁ ଭେଟିବେ । ପରେ ଅଜଣା ସୈନ୍ୟଙ୍କ  ସମାଧିରେ ସେ ଶ୍ରଦ୍ଧାଞ୍ଜଳି ଦେଇ ମସ୍କୋରେ  ଏକ ପ୍ରଦର୍ଶନୀ କାର୍ଯ୍ୟକ୍ରମରେ ଯୋଗ ହେବେ ।  ୨୦୧୯ରେ ଶେଷଥର ପାଇଁ ମୋଦି ରୁଷ୍‌ ଯାଇ ଏକ  ଇକୋନୋମିକ୍‌ ଫୋରମରେ ଯୋଗ ଦେଇଥିଲେ ।