ନୂଆଦିଲ୍ଲୀ: ଇରାନ୍ ଓ ଲେବାନନ୍ ସମେତ ଗାଜା ଯୁଦ୍ଧର ତୀବ୍ରତା ବଢ଼ି ବଢ଼ି ଚାଲିଛି । ଇସ୍ରାଏଲ ସେନା ବେରୁଟରେ ଲଗାତାର ହେଜବୁଲ୍ଲାକୁ ଟାର୍ଗେଟ କରୁଛି । ଏହାରି ମଧ୍ୟରେ ଇସ୍ରାଏଲର ସରକାରୀ ଗଣମାଧ୍ୟମ କେଏଏନ୍ ଏବଂ ଅନ୍ୟ ମିଡିଆ ଯୁଦ୍ଧର ପ୍ରସ୍ତୁତିକୁ ନେଇ ବଡ଼ ଖୁଲାସା କରିଛନ୍ତି । ମିଡିଆ ରିପୋର୍ଟ ଅନୁସାରେ, ବଡ଼ ଧରଣର ଯୁଦ୍ଧ ଲାଗି ଇସ୍ରାଏଲ ପ୍ରସ୍ତୁତି କରୁଛି ।
ଏହା ସହ ଇସ୍ରାଏଲ ଉପରେ ଇରାନ୍ କରିଥିବା ମିସାଇଲ ଆକ୍ରମଣର ଜବାବ ଦେବାକୁ ଆଇଡିଏଫ ବଡ଼ ପ୍ରସ୍ତୁତି କରୁଛି । ଏବେ ଆଇଡିଏଫ୍ ନିଜର ଲକ୍ଷ୍ୟକୁ ଗୋଟିଏ ପରେ ଗୋଟିଏ ଚୟନ କରୁଛି । ରିପୋର୍ଟରେ ଆହୁରି କୁହାଯାଇଛି ଯେ, ପାଶ୍ଚାତ୍ୟ ଦେଶଗୁଡ଼ିଗର ସହାୟତା ଚାହୁଁଛି ଇସ୍ରାଏଲ । ଗାଜା ଯୁଦ୍ଧକୁ ଏକ ବର୍ଷ ପୂରଣ ହେବାକୁ ଯାଉଥିବା ବେଳେ ଏହାର ତୀବ୍ରତା ବଢ଼ାଇବାକୁ ଇସ୍ରାଏଲ ସେନା ଯୋଜନା କରୁଛି ।
ବର୍ତ୍ତମାନ ଦକ୍ଷିଣ ଲେବାନନ୍ରେ କାଁ ଭାଁ ଅପରେସନ୍ କରୁଛି ଇସ୍ରାଏଲ । ଆଗାମୀ ଦିନରେ ଏହାର ତୀବ୍ରତା ଆହୁରି ବଢ଼ିବ । ହେଜବୁଲ୍ଲା ବିରୋଧରେ ଇସ୍ରାଏଲର ଆକ୍ରମଣ ଜାରି ରହିଛି । ଆଇଡିଏଫର ଆକ୍ରମଣରେ ହେଜବୁଲ୍ଲାର ମୁଖ୍ୟ ହାସନ ନସରଲ୍ଲାହ ଏବଂ ତାର ଉତ୍ତରାଧିକାରୀର ମୃତ୍ୟୁ ହୋଇଛି । ଏହାକୁ ବିରୋଧ କରି ଇରାନ୍ ଇସ୍ରାଏଲ ଉପରେ ମିସାଇଲ ଆକ୍ରମଣ କରିଥିଲା । ଆଉ ଏହାର ପ୍ରତିଜବାବ ଦେବାକୁ ଯୋଜନା କରୁଛି ଇସ୍ରାଏଲ ।
