ନୂଆଦିଲ୍ଲୀ,୦୫/୧୦: ଜଳବାୟୁ ପରିବର୍ତ୍ତନର କୁପ୍ରଭାବରୁ ପୃଥିବୀର ସବୁଠୁ ଥଣ୍ଡା ସ୍ଥାନ ଆଣ୍ଟାର୍କଟିକା ମଧ୍ୟ ବାଦ୍ ପଡିନାହିଁ । ବରଫାବୃତ୍ତ ଆଣ୍ଟାର୍କଟିକାର କିଛି ଅଂଶ ଏବେ ସବୁଜିମାମୟ ଦେଖାଯାଉଛି । ବିଶେଷକରି ଏଠାରେ ଶୈବାଳ ଜାତୀୟ ଉଦ୍ଭିଦ ବିପଜ୍ଜନକ ହାରରେ ବୃଦ୍ଧି ପାଉଛି ବୋଲି ବୈଜ୍ଞାନିକମାନଙ୍କ ଦ୍ୱାରା କରାଯାଇଥିବା ଏକ ନୂଆ ଗବେଷଣାରୁ ସ୍ପଷ୍ଟ ହୋଇଛି । ଆଣ୍ଟାର୍କଟିକା ଉପଦ୍ୱୀପରେ ଗଛଲତା ବୃଦ୍ଧି ସ୍ତରକୁ ବିଶ୍ଳେଷଣ କରିବା ଲାଗି ବୈଜ୍ଞାନିକମାନେ ଉପଗ୍ରହର ଫଟୋ ଓ ତଥ୍ୟକୁ ବ୍ୟବହାର କରିଥିଲେ । ସେମାନେ ଦେଖିଲେ ଯେ, ବିଗତ ୪ ଦଶନ୍ଧି ମଧ୍ୟରେ ଏଠାରେ ଶୈବାଳ ଜାତୀୟ ଉଦ୍ଭିଦ ୧୦ ଗୁଣରୁ ଅଧିକ ବଢ଼ିଛି । ଇଂଲଣ୍ଡର ଏକ୍ସଟେର ଓ ହାର୍ଟଫୋର୍ଡସାୟାର ବିଶ୍ୱବିଦ୍ୟାଳୟର ବୈଜ୍ଞାନିକ ଓ ବ୍ରିଟିଶ୍ ଆଣ୍ଟର୍କଟିକ୍ ସର୍ଭେ ପକ୍ଷରୁ କରାଯାଇଥିବା ଏହି ଅନୁଧ୍ୟାନ ଶୁକ୍ରବାର ଜର୍ଣ୍ଣାଲ ନେଚର୍ ଜିଓସାଇନ୍ସରେ ପ୍ରକାଶିତ ହୋଇଛି । ଏହାପରେ ଏହି ମହାଦେଶର ପରିବର୍ତ୍ତିତ ଦୃଶ୍ୟପଟ୍ଟ ସଂପର୍କରେ ଉଦ୍ବେଗ ପ୍ରକାଶ ପାଇଛି ।
ଅଧ୍ୟୟନ ଅନୁସାରେ, ୧୯୮୬ରେ ଆଣ୍ଟାର୍କଟିକା ଉପଦ୍ୱୀପରେ ୦.୪ ବର୍ଗ ମାଇଲ୍ରୁ କମ୍ କ୍ଷେତ୍ରରେ ଗଛଲତା ଥିଲା । କିନ୍ତୁ ୨୦୨୧ରେ ଏହା ପ୍ରାୟ ୫ ବର୍ଗ ମାଇଲ୍ ଯାଏ ପହଞ୍ଚିଯାଇଛି । ଗତ ୪ ଦଶନ୍ଧି ମଧ୍ୟରେ ଏହି ଅଞ୍ଚଳରେ ସବୁଜିମା ବୃଦ୍ଧି ପାଇବାର ହାର ମଧ୍ୟ ବଢ଼ିଛି । ୨୦୧୬ରୁ ୨୦୨୧ ମଧ୍ୟରେ ସେଥିରେ ୩୦ ପ୍ରତିଶତରୁ ଅଧିକ ବୃଦ୍ଧି ହୋଇଛି । ଏକ୍ସଟେର ବିଶ୍ୱବିଦ୍ୟାଳୟରେ ପରିବେଶ ବୈଜ୍ଞାନିକ ତଥା ଅଧ୍ୟୟନରେ ସାମିଲ ଥିବା ଥୋମାସ୍ ରୋଲାଣ୍ଡ କହିଛନ୍ତି, ଆଣ୍ଟାର୍କଟିକା ଏବେ ମଧ୍ୟ ପୂରା ବରଫ ଓ ପଥର ଦ୍ୱାରା ଆବୃତ୍ତ । କିନ୍ତୁ ଏହି ଛୋଟିଆ ସବୁଜ ଅଞ୍ଚଳ ନାଟକୀୟ ଭାବେ ୧୯୮୦ର ମଧ୍ୟଭାଗରୁ ବଢ଼ିଚାଲିଛି । ଆମର ନିଷ୍କର୍ଷରୁ ସ୍ପଷ୍ଟ ହୋଇଛି ଯେ, ମନୁଷ୍ୟକୃତ ଜଳବାୟୁ ପରିବର୍ତ୍ତନର ପ୍ରଭାବର କୌଣସି ସୀମା ନାହିଁ । ଏପରିକି ଆଣ୍ଟାର୍କଟିକା ଉପଦ୍ୱୀପର ଏହି ଦୁର୍ଗମ ଅଞ୍ଚଳରେ ମଧ୍ୟ ଦୃଶ୍ୟପଟ୍ଟ ବଦଳୁଛି । ଏହାର ପ୍ରଭାବକୁ ମହାକାଶରୁ ସ୍ପଷ୍ଟ ଭାବେ ଦେଖିହେଉଛି ।
ପୃଥିବୀର ସବୁଠୁ ଥଣ୍ଡା ସ୍ଥାନ ଆଣ୍ଟାର୍କଟିକା ନିକଟରେ ଅତ୍ୟଧିକ ଗରମ ଜନିତ ଘଟଣା ଯୋଗୁ ପ୍ରଭାବିତ ହେଉଛି । ଚଳିତବର୍ଷ ଗ୍ରୀଷ୍ମଦିନରେ ଏହି ମହାଦେଶର କିଛି ଅଂଶରେ ହିଟ୍ ୱେଭ୍ ରେକର୍ଡ ଭାଙ୍ଗିଥିଲା । ଜୁଲାଇ ମାସର ମଧ୍ୟଭାଗରେ ତାପମାତ୍ରା ସ୍ୱାଭାବିକ ଠାରୁ ୫୦ ଡିଗ୍ରୀ ଫାରେନ୍ହାଇଟ୍ ଉପରକୁ ଉଠିଥିଲା । ଜୀବାଶ୍ମ ଇନ୍ଧନ ଜନିତ ପ୍ରଦୂଷଣ ସାରା ବିଶ୍ୱକୁ ଉତ୍ତପ୍ତ କରିଚାଲିଥିବାବେଳେ ଆଣ୍ଟାର୍କଟିକା ଆଗରୁ ଆହୁରି ଉତ୍ତପ୍ତ ହୋଇଚାଲିବ ଓ ଏହି ସବୁଜିମା ମଧ୍ୟ ବଢ଼ିଚାଲିବ ବୋଲି ବୈଜ୍ଞାନିକମାନେ ଆକଳନ କରିଛନ୍ତି । ସବୁଜିମା ଯେତେ ଅଧିକ ବଢ଼ିବ ସେତେ ଅଧିକ ମାଟି ସୃଷ୍ଟି ହେବ ।
ଏଥିସହ ଏହି କ୍ଷେତ୍ର ବିଦେଶୀ ପ୍ରଜାତି ଲାଗି ଅଧିକ ଅନୁକୂଳ ହୋଇଯିବ । ଫଳରେ ଦେଶୀ ବନ୍ୟଜୀବଙ୍କ ଲାଗି ବିପଦ ସୃଷ୍ଟି ହେବ । ବୀଜ, ବୀଜାଣୁ ଓ ଗଛର ଅଂଶ ସହଜରେ ପର୍ଯ୍ୟଟକ ଓ ଗବେଷକମାନଙ୍କର ଜୋତା କିମ୍ବା ଉପକରଣ ମାଧ୍ୟମରେ କିମ୍ବା ପ୍ରବାସୀ ପକ୍ଷୀ ଓ ବାୟୁ ସହ ଜଡ଼ିତ ଅଧିକ ପାରମ୍ପରିକ ମାର୍ଗ ଦ୍ୱାରା ଆଣ୍ଟାର୍କଟିକ ଯାଏ ନିଜର ରାସ୍ତା ଖୋଜିନେବେ । ସେଥିଯୋଗୁ ଏଠାରେ ବିପଦ ସ୍ପଷ୍ଟ ବୋଲି ସେ କହିଛନ୍ତି । ଏହି ସବୁଜିମା ଯୋଗୁ ଉପଦ୍ୱୀପର ସୌର ବିକିରଣକୁ ପୁଣି ଅନ୍ତରୀକ୍ଷକୁ ପ୍ରତିବିମ୍ବିତ କରିବାର କ୍ଷମତା ମଧ୍ୟ କମିପାରେ। କାରଣ ଗାଢ଼ ରଙ୍ଗର ପୃଷ୍ଠ ଅଧିକ ଉତ୍ତାପକୁ ଅବଶୋଷନ କରିଥାଏ । ଅଧ୍ୟୟନରେ ସାମିଲ ଆଉ ଜଣେ ବୈଜ୍ଞାନିକ ଓଲି ବାର୍ଟଲେଟ୍ କହିଛନ୍ତି, ଏହି ପ୍ରଭାବ କେବଳ ସ୍ଥାନୀୟ ହୋଇପାରେ । କିନ୍ତୁ ଜଳବାୟୁ ଉତ୍ତପ୍ତ ହୋଇଚାଲୁଥିବାରୁ ଉଦ୍ଭିଦର ବିକାଶକୁ ଏହା ଆହୁରି ତ୍ୱରାନ୍ୱିତ କରିବ । ସେଥିଯୋଗୁ ଏଠାକାର ଦୃଶ୍ୟପଟ୍ଟ ସବୁଦିନ ପାଇଁ ବଦଳିଯାଇପାରେ ।
ସ୍କଟିଶ୍ ଆସୋସିଏସନ୍ ଫର୍ ମେରାଇନ୍ ସାଇନ୍ସରେ ଆସୋସିଏଟ୍ ପ୍ରଫେସର ଥିବା ମାଥ୍ୟୁ ଡାଭେ କହିଛନ୍ତି, ଆଣ୍ଟାର୍କଟିକାରେ ଉଦ୍ଭିଦର ଜୀବନକୁ ବୁଝିବା ଲାଗି ଏହା ଏକ ଗୁରୁତ୍ୱପୂର୍ଣ୍ଣ ସର୍ବେକ୍ଷଣ । ଚିହ୍ନିତ ହୋଇଥିବାଠାରୁ ବି ଅଧିକ ବୃକ୍ଷଲତା ସେଠାରେ ଥାଇପାରେ । ଆଣ୍ଟାର୍କଟିକାରେ ଉଦ୍ଭିଦ ଜୀବନର ବାସ୍ତବିକ କ୍ଷେତ୍ରରେ ବୃଦ୍ଧି କମ୍ ରହିଛି, କିନ୍ତୁ ଯେଉଁ ହାରରେ ଏହା ବୃଦ୍ଧି ପାଇଛି ତାହା ନାଟକୀୟ । ଏଥିରୁ ଧୀରେ ଧୀରେ ହେଲେ ମଧ୍ୟ ବୃକ୍ଷଲତା ବଢ଼ୁଥିବା ଜଣାପଡୁଛି।
