ନୂଆଦିଲ୍ଲୀ: ପାକିସ୍ତାନର ରାଜଧାନୀ ଇସ୍ଲାମାବାଦରେ ଆଇନ ଶୃଙ୍ଖଳା ବିପର୍ଯ୍ୟସ୍ତ ହୋଇପଡ଼ିଛି । ପୂର୍ବତନ ପ୍ରଧାନମନ୍ତ୍ରୀ ଇମ୍ରାନ ଖାନଙ୍କ ଦଳ ପାକିସ୍ତାନ ତେହରିକ-ଏ ଇନସାଫ (ପିଟିଆଇ) ସମର୍ଥକମାନେ ନିଜ ନେତାଙ୍କୁ ଜେଲରୁ ମୁକ୍ତ କରିବାକୁ ଦାବି କରି ଆନ୍ଦୋଳନ ଜାରି କରିଛନ୍ତି । ଇମ୍ରାନ ଖାନଙ୍କୁ ଜେଲରୁ ବାହାର କରିବାକୁ ଦାବି କରିବା ସହ ନ୍ୟାୟପାଳିକାର ସ୍ବାଧୀନତା ଦାବି କରିଛନ୍ତି ଆନ୍ଦୋଳନକାରୀ । ସେପଟେ ପୋଲିସ ଆନ୍ଦୋଳନକାରୀଙ୍କ ଉପରକୁ ଲୁହବୁହା ଗ୍ୟାସ ମାଡ଼ କରିଛି । ଏହା ସହ ସବୁ ରାଜରାସ୍ତାକୁ ଅବରୋଧ କରିଦେଇଛି ପୋଲିସ ।
ଇଣ୍ଟରନେଟ ବ୍ୟାନ୍ କରାଯାଇଥିବା ବେଳେ ଧାରା ୧୪୪ ଲାଗୁ ହୋଇଛି । ପିଟିଆଇ ଦାବି କରିଛି ଯେ, ରେଞ୍ଜର୍ସ ଯବାନମାନେ ଇସ୍ଲାମାବାଦରେ କେପି ହାଉସ୍ ଭିତରକୁ ଜବରଦସ୍ତି ପଶିବା ସହ କେପିର ମୁଖ୍ୟମନ୍ତ୍ରୀ ଅଲି ଅମୀନ ଗନ୍ଦପୁରଙ୍କୁ ଗିରଫ କରିଛନ୍ତି । ସେପଟେ ପିଟିଆଇ ନେତା ଇମ୍ରାନ ଖାନ ଏକ୍ସରେ ଏକ ପୋଷ୍ଟ ମାଧ୍ୟମରେ ନିଜର ସମର୍ଥକଙ୍କୁ ଧନ୍ୟବାଦ ଜଣାଇଛନ୍ତି ।
ଏହା ସହ ଡି-ଚୌକ ଆଡ଼କୁ ବଢ଼ିବାକୁ ଏବଂ ଅଲି ଅମୀନଙ୍କ କାରକେଡରେ ସାମିଲ ହେବାକୁ ଆନ୍ଦୋଳନକାରୀଙ୍କୁ ଅପିଲ କରିଛନ୍ତି ଇମ୍ରାନ ଖାନ । ସେ କେପି, ଉତ୍ତର ପଞ୍ଜାବ ଏବଂ ଇସ୍ଲାମାବାଦର ଲୋକମାନଙ୍କୁ ଖୁବ ପ୍ରଶଂସା କରିଛନ୍ତି । ପ୍ରଚଣ୍ଡ ଗୁଳିମାଡ଼, ହେଲିକପ୍ଟରରୁ ମାଡ଼ ହେଉଥିବା କେମିକାଲ୍ ସତ୍ତ୍ୱେ ଆନ୍ଦୋଳନରେ ସାମିଲ ହୋଇଥିବା ପ୍ରତ୍ୟେକ ଲୋକଙ୍କୁ ଧନ୍ୟବାଦ ଜଣାଇଛନ୍ତି ଇମ୍ରାନ ଖାନ ।
ସେପଟେ ଆନ୍ଦୋଳନ ଏତେ ଭୀଷଣ ରୂପ ଧାରଣ କରିଛି ଯେ, ଇସ୍ଲାମାବାଦ ଏବଂ ଲାହୋରରେ ସେନା ମୁତୟନ ହୋଇଛି । ପୋଲିସ ଏବଂ ପିଟିଆଇ ସମର୍ଥକଙ୍କ ମଧ୍ୟରେ ହିଂସ୍ରକ ଲଢ଼େଇର ଗୋଟିଏ ଦିନ ପରେ ଶନିବାର ଇସ୍ଲାମାବାଦରେ ସ୍ଥିତି ଅଣାୟତ୍ତ ହୋଇଛି । ରାଜଧାନୀ ଏବଂ ଏହାର ନିକଟବର୍ତ୍ତୀ ରାଓ୍ବଲପିଣ୍ଡିରେ ଲଗାତାର ଦୁଇ ଦିନ ହେଲା ସାଧାରଣ ଜୀବନ ଯାତ୍ରା ଅସ୍ତବ୍ୟସ୍ତ ହୋଇପଡ଼ିଛି ।