ନୂଆଦିଲ୍ଲୀ,୩୦/୬:ଉତ୍ତର ପୂର୍ବ ନାଇଜେରିଆରେ ଆତ୍ମଘାତି ଆକ୍ରମଣ। ଏହି ଆକ୍ରମଣରେ ପ୍ରାୟ ୧୮ ଜଣଙ୍କ ମୃତ୍ୟୁ ହୋଇଥିବା ବେଳେ ୪୨ ଆହତ ହୋଇଥିବା ଜଣାପଡିଛି । ସେହିପରି ସେମାନଙ୍କ ମଧ୍ୟରୁ ୧୯ ଜଣ ଗୁରୁତର ଆହତଙ୍କୁ ଜରୁରୀକାଳିନ ସେବା ପ୍ରଦାନ କରାଯାଇଥିବା ସୂଚନା ମିଳିଛି । ତେବେ ଏହି ଆକ୍ରମଣ ଗତକାଲି ଅର୍ଥାତ ଶନିବାର ହୋଇଥିଲା । 

ପୋଲିସ ସୂତ୍ରନୁଯାୟୀ, ଗ୍ୱୋଜା ସହରରେ ହୋଇଥିବା ୩ଟି ବିସ୍ଫୋରଣ ମଧ୍ୟରୁ ଜଣେ ମହିଳା ଆକ୍ରମଣକାରୀ ତାଙ୍କ ପିଠିରେ ଶିଶୁ ସହ ବିସ୍ଫୋରକ ସାମଗ୍ରୀ ବାନ୍ଧି ଏକ ବିବାହ ଉତ୍ସବରେ ବିସ୍ଫୋରଣ ଘଟାଇଥିଲେ । ଏହା ବାଦ୍ କ୍ୟାମେରୁନ୍ ସୀମାନ୍ତ ସହରରେ ହୋଇଥିବା ଅନ୍ୟ ଆକ୍ରମଣରେ ଏକ ହସ୍ପିଟାଲ ଏବଂ ପୂର୍ବ ବିବାହ ଉତ୍ସବରେ ପୀଡ଼ିତଙ୍କ ଅନ୍ତିମ ସଂସ୍କାରକୁ ଟାର୍ଗେଟ କରାଯାଇଥିଲା । ଏକ ରିପୋର୍ଟରୁ ପ୍ରକାଶ ଏହି ବିସ୍ପୋରଣରେ ୧୮ ଜଣ ମୃତକଙ୍କ ମଧ୍ୟରୁ ଶିଶୁ, ମହିଳା, ପୁରୁଷ ଏବଂ ଗର୍ଭବତୀ ମହିଳା ସାମିଲ ଥିଲେ । ସେହିପରି ଅନ୍ୟ ଏକ ଆଟାକରେ ଗ୍ୱାଜା ସୈନ୍ୟବାହିନୀକୁ ସମର୍ଥନ କରୁଥିବା ମିଲିସିଆର ଜଣେ ସଦସ୍ୟଙ୍କ କହିବାନୁଯାୟୀ ଏକ ସୁରକ୍ଷା ପୋଷ୍ଟରେ ହୋଇଥିବା ଆକ୍ରମଣରେ ତାଙ୍କର ଦୁଇ ସାଥୀ ଏବଂ ଜଣେ ସୈନିକ ନିହତ ହୋଇଥିଲେ । ତେବେ ଏପର୍ଯ୍ୟନ୍ତ କୌଣସି ଆତଙ୍କବାଦୀ ସଂଗଠନ ଏହି ଆକ୍ରମଣ ପାଇଁ ଦାୟୀ ଥିବା ନେଇ ସୂଚନା ମିଳିନି ।