ମସ୍କୋ: ଶୀତଳ ଯୁଦ୍ଧ ସମୟରେ ହୋଇଥିବା ଚୁକ୍ତି ଶେଷ ହେବା ପରେ ଏବେ ଋଷିଆ ଆକ୍ସନ ମୋଡ୍କୁ ଆସିଛି । ଆମେରିକା ସହ ଚୁକ୍ତି ସମାପ୍ତ ହୋଇଯିବା ପରେ ଋଷିଆ ରାଷ୍ଟ୍ରପତି ଭ୍ଲାଦିମିର ପୁଟିନ୍ ପୁଣି ଥରେ ମଧ୍ୟମ ରେଞ୍ଜର ମିସାଇଲ୍ ନିର୍ମାଣ ଲାଗି ଅନୁମତି ଦେଇଛନ୍ତି । ପୁଟିନ୍ ୫୦୦-୫,୫୦୦ କିଲୋମିଟର ରେଞ୍ଜର ମିସାଇଲ୍ ନିର୍ମାଣ ସଂପର୍କରେ କହିଥିବା ଜଣାପଡ଼ିଛି । ତେବେ ଶୀତଳ ଯୁଦ୍ଧ ସମୟରେ ଇଣ୍ଟରମିଡିଏଟ-ରେଞ୍ଜ ନ୍ୟୁକ୍ଲିୟର ଫୋର୍ସେସ୍ (ଆଇଏନଏଫ୍) ଚୁକ୍ତି ମାଧ୍ୟମରେ ଏହି ମିସାଇଲ୍ ନିର୍ମାଣ ଉପରେ ପ୍ରତିବନ୍ଧକ ଲାଗିଥିଲା।
୧୯୮୮ରେ ଏହି ଚୁକ୍ତି ସୁଭିଏତ ସଂଘର ନେତା ମିଖାଇଲ୍ ଗୋର୍ବାଚେଭ ଏବଂ ଆମେରିକାର ତତ୍କାଳୀନ ରାଷ୍ଟ୍ରପତି ରୋନାଲ୍ଡ ରେଗାନ୍ଙ୍କ ମଧ୍ୟରେ ହୋଇଥିଲା । ଋଷିଆ ଚୁକ୍ତିର ଉଲ୍ଲଂଘନ କରିଥିବା ଅଭିଯୋଗ କରି ଆମେରିକା ୨୦୧୯ରେ ଏହି ଚୁକ୍ତିକୁ ବାତିଲ କରିଥିଲା । ସେପଟେ ପୁଟିନ ଅଭିଯୋଗ କରିଥିଲେ ଯେ, ଡେନମାର୍କ ସହ ଯୁଦ୍ଧାଭ୍ୟାସ ସମୟରେ ଆମେରିକା ଏଭଳି ମିସାଇଲ୍ର ବ୍ୟବହାର କରିଛି। ଯେଉଁ ସବୁ ମିସାଇଲ୍ର ଋଷିଆ ମଧ୍ୟଭାଗକୁ ଟାର୍ଗେଟ କରିବାର କ୍ଷମତା ରହିଛି ।
ସେପଟେ ଶୀତଳ ଯୁଦ୍ଧ ସମୟରେ ଆମେରିକା ଏବଂ ଋଷିଆ ମଧ୍ୟରେ ଏକାଧିକ ଚୁକ୍ତି ହୋଇଥିଲା । ସେହିଭଳି ଗତବର୍ଷ ଦୁଇ ଦେଶ ମଧ୍ୟରେ ପରମାଣୁ ଯୁଦ୍ଧାସ୍ତ୍ରକୁ ନେଇ ଥିବା ଶେଷ ଚୁକ୍ତି ନ୍ୟୁ ଷ୍ଟାର୍ଟ ଟ୍ରିଟିରୁ ଓହରିଯାଇଥିଲା ଋଷିଆ । ୟୁକ୍ରେନ୍କୁ ଆମେରିକା ସାମରିକ ସହାୟତା ଯୋଗାଉଥିବାରୁ ଋଷିଆ ଏଭଳି ପଦକ୍ଷେପ ନେଉଥିବା ଚର୍ଚ୍ଚା ହେଉଛି ।