ଇସ୍ଲାମାବାଦ,୨୮/୦୬: ପାକିସ୍ତାନରେ ପ୍ରବଳ ଗ୍ରୀଷ୍ମ ପ୍ରବାହ ଜାରି ରହିଛି । ଏହାଯୋଗୁ ସାଧାରଣ ଜୀବନଯାତ୍ରା ବ୍ୟାହତ ହୋଇଛି । ୬ ଦିନରେ ଅଂଶୁଘାତର ଶିକାର ହୋଇ ୫୬୮ ଜଣ ପ୍ରାଣ ହରାଇଲେଣି । ଗତ ମଙ୍ଗଳବାର ୧୪୧ ଲୋକଙ୍କ ମୃତ୍ୟୁ ଘଟିଥିଲା । ପାକିସ୍ତାନର ସବୁଠୁ ବଡ଼ ସହର କରାଚୀରେ ଜୁନ୍ ୨୪ରେ ତାପମାତ୍ରା ୪୧ ଡିଗ୍ରୀ ସେଲ୍ସିୟସ ଛୁଇଁଥିଲା ।
ରିପୋର୍ଟ ମୁତାବକ, ଗତ ୩ ଦିନ ମଧ୍ୟରେ ତାପମାତ୍ରାରେ ହ୍ରାସ ଦେଖିବାକୁ ମିଳିଛି । କିନ୍ତୁ ପବନର ଗତି ଅତ୍ୟନ୍ତ ଧୀର ହେବା ଯୋଗୁ ଉଷ୍ମତା ବଢ଼ିଛି । ଏହି କାରଣରୁ ୪୦ ଡିଗ୍ରୀ ତାପମାତ୍ରା ୪୯ ଡିଗ୍ରୀ ଭଳି ଅନୁଭୂତ ହେଉଛି । ବିଗତ ୪ ଦିନରେ କରାଚୀର ସିଭିଲ ହସ୍ପିଟାଲରେ ଅଂଶୁଘାତ ଯୋଗୁ ୨୬୭ ଲୋକଙ୍କୁ ଭର୍ତ୍ତି କରାଯାଇଛି ।
ପାକିସ୍ତାନର ଏନ୍ଜିଓ ଇଘି ଫାଉଣ୍ଡେସନର ମୁଖ୍ୟ ଫୈଜଲ କହିଛନ୍ତି, କରାଚୀରେ ତାଙ୍କର ୪ଟି ମୁର୍ଦାଘର ରହିଛି । କିନ୍ତୁ ସ୍ଥିତି ଏଭଳି ହୋଇଛି ଯେ ମୁର୍ଦାଘରେ ଶବ ରଖିବା ପାଇଁ ଆଉ ଜାଗା ନାହିଁ । ଏଠାରେ ପ୍ରତ୍ୟେକ ଦିନ ୩୦-୩୫ ମୃତଦେହ ଆସି ପହଞ୍ଚୁଛି । ବିଶେଷକରି ଜରୁରି ସେବା ଯୋଗାଉଥିବା କର୍ମଚାରୀମାନେ ଅଂଶୁଘାତର ଅଧିକ ଶିକାର ହେଉଛନ୍ତି । ଏ ପର୍ଯ୍ୟନ୍ତ କରାଚୀ ରାସ୍ତାରେ ୩୦ କର୍ମଚାରୀଙ୍କ ଶବ ମିଳିଲାଣି । ମୃତକଙ୍କ ମଧ୍ୟରେ ଅଧିକାଂଶ ଲୋକଙ୍କ ବୟସ ୫୦ ବର୍ଷରୁ ଅଧିକ ହେବ । ଅଂଶୁଘାତର ଶିକାର ହେବା ପରେ ଲୋକଙ୍କୁ ହସ୍ପିଟାଲ ନିଆଯାଉଛି । ସେମାନେ ବାନ୍ତି, ଡାଇରିଆ ଏବଂ ଭୀଷଣ ଜ୍ୱର ଭଳି ଲକ୍ଷଣର ସମ୍ମୁଖୀନ ହେଉଛନ୍ତି ।
