ନୂଆଦିଲ୍ଲୀ: ଭାରତୀୟ ଟିମର ମୁଖ୍ୟ କୋଚ୍ ଗୌତମ ଗମ୍ଭୀରଙ୍କ କାର୍ଯ୍ୟଦକ୍ଷତା ଉପରେ ପ୍ରଶ୍ନବାଚୀ ସୃଷ୍ଟି ହୋଇଛି । ନିକଟରେ ଶେଷ ହୋଇଥିବା ବର୍ଡର-ଗାଭାସ୍କର ଟ୍ରଫିରେ ଭାରତର ଶୋଚନୀୟ ପରାଜୟ ପରେ ଖୁବ ସମାଲୋଚିତ ହୋଇଛନ୍ତି ଗମ୍ଭୀର । କୋଚିଂ କ୍ୟାରିୟର ଆରମ୍ଭରୁ ବିବାଦରେ ରହିଆସିଥିବା ଗମ୍ଭୀରଙ୍କ ନେତୃତ୍ୱରେ ଭାରତୀୟ ଟିମ୍, ଅଷ୍ଟ୍ରେଲିଆ ସମେତ ଶ୍ରୀଲଙ୍କା ଏବଂ ନ୍ୟୁଜିଲାଣ୍ଡ ଠାରୁ ମଧ୍ୟ ସିରିଜ ପରାଜିତ ହୋଇଛି । ଏହାରି ମଧ୍ୟରେ ଗୌତମ ଗମ୍ଭୀରଙ୍କୁ ଜୋରଦାର ଟାର୍ଗେଟ କରିଛନ୍ତି ପୂର୍ବତନ ଭାରତୀୟ କ୍ରିକେଟର ମନୋଜ ତିୱାରୀ । ଗମ୍ଭୀରଙ୍କୁ ଛଳ ପ୍ରକୃତିର ବ୍ୟକ୍ତି ବୋଲି କହିଛନ୍ତି ତିୱାରୀ । ସେ କହିଛନ୍ତି, ଗମ୍ଭୀରଙ୍କ ପାଖରୁ ଯେଉଁ ଆଶା କରାଯାଉଥିଲା ସେଥିପାଇଁ ସେ ଯୋଗ୍ୟ ନୁହଁନ୍ତି ।
ମନୋଜ ତିୱାରୀ ସ୍ଥାନୀୟ ଗଣମାଧ୍ୟକୁ ପ୍ରତିକ୍ରିୟା ଦେଇ କହିଛନ୍ତି, ‘ଗୌତମ ଗମ୍ଭୀର ଜଣେ କପଟୀ ମଣିଷ । ସେ ଯାହା କୁହନ୍ତି, ତାହା କରନ୍ତି ନାହିଁ । ଅଧିନାୟକ (ରୋହିତ) ମୁମ୍ୱାଇରୁ, ଅଭିଷେକ ନାୟର ବି ମୁମ୍ୱାଇରୁ ଆସନ୍ତି । ରୋହିତଙ୍କୁ ଆଗକୁ ଯିବାକୁ ଦିଆଗଲା । ଏଠି କେହି ବି ଜଲଜ ସକ୍ସେନା ପାଇଁ ମୁହଁ ଖୋଲୁ ନାହାନ୍ତି । ସେ ଭଲ ପ୍ରଦର୍ଶନ କରୁଛି କିନ୍ତୁ ଚୁପ୍ ରୁହେ ।' ମନୋଜ ତିୱାରୀ ବୋଲିଂ କୋଚ୍ ଭାବେ ମୋର୍ଣ୍ଣେ ମୋର୍କଲ ଏବଂ ବ୍ୟାଟିଂ କୋଚ୍ ଭାବେ ଅଭିଷେକ ନାୟରଙ୍କ ଚୟନକୁ ନେଇ ମଧ୍ୟ ସମାଲୋଚନା କରିଛନ୍ତି । ସେ କହିଛନ୍ତି, 'ବୋଲିଂ କୋଚଙ୍କ ଆବଶ୍ୟକତା କଣ ? ମୋର୍ଣ୍ଣେ ମୋର୍କଲ ଲକ୍ଷ୍ନୌ ସୁପର ଜାଏଣ୍ଟ୍ସରେ ବୋଲିଂ କୋଚ୍ ଥିଲେ । ଅଭିଷେକ ନାୟର କୋଲକାତା ନାଇଟ୍ ଟାଇଡର୍ସରେ ଗମ୍ଭୀରଙ୍କ ସହ ଥିଲେ । ସେ ଯାହା ନିର୍ଦ୍ଦେଶ ଦେବେ ଦୁହେଁ ଏହାକୁ ବିରୋଧ କରିପାରିବେ ନାହିଁ ବୋଲି ଭାରତୀୟ ଟିମର ମୁଖ୍ୟ କୋଚ୍ ଜାଣନ୍ତି ।'
ମନୋଜ ତିୱାରୀ କହିଛନ୍ତି, 'ସେମାନେ ଏକାସାଙ୍ଗରେ କିପରି କାମ କରିବେ ? ରୋହିତ୍ ୱାର୍ଲଡ୍ କପ୍ ଜିତିଥିବା କ୍ୟାପ୍ଟେନ । ଅନ୍ୟପଟେ ଗମ୍ଭୀର କ୍ୟାପ୍ଟେନ ଏବଂ ମେଣ୍ଟର ଭାବେ କୋଲକାତାକୁ ଟ୍ରଫି ଜିତାଇଛନ୍ତି । ଗମ୍ଭୀର ଏକାକୀ କେକେଆରକୁ ଟ୍ରଫି ଜିତାଇ ନାହାନ୍ତି । ଆମେ ସମସ୍ତେ ଏକ ହୋଇ ଭଲ ଖେଳିଥିଲୁ । ଜ୍ୟାକ୍ କ୍ୟାଲିସ, ସୁନୀଲ ନାରାୟାଣ ଏବଂ ମୁଁ, ସମସ୍ତେ ଏଥିରେ ଯୋଗଦାନ ଦେଇଛୁ । କିନ୍ତୁ କ୍ରେଡିଟ୍ କିଏ ନେଲା ? ଏଠି ଏପରି ମାହୋଲ ଏବଂ ପିଆର ଅଛି ଯିଏ ତାଙ୍କୁ ସବୁ ଶ୍ରେୟ ଦେବା ପାଇଁ କାମ କରୁଛି ।' ସେପଟେ ଗୌତମ ଗମ୍ଭୀରଙ୍କ ସମର୍ଥନରେ ବାହାରିଛନ୍ତି କେକେଆର ପୂର୍ବତନ ଅଧିନାୟକ ନୀତୀଶ ରାଣା । ସୋସିଆଲ୍ ମିଡିଆ ପ୍ଲାଟଫର୍ମ ଏକ୍ସରେ ସେ ଲେଖିଛନ୍ତି, 'ସମାଲୋଚନା ସତ ଉପରେ ଆଧାରିତ ହେବା ଦରକାର । ମୁଁ ଯେତେ ଜଣଙ୍କୁ ଭେଟିଛି, ସେମାନଙ୍କ ମଧ୍ୟରୁ ଗୌତମ ଭାଇ ଜଣେ ନିସ୍ୱାର୍ଥପର ଖେଳାଳି । ସେ ସବୁବେଳେ ଦାୟିତ୍ୱକୁ ନିଜ କାନ୍ଧକୁ ନିଅନ୍ତି । ଭଲ ପ୍ରଦର୍ଶନ କୌଣସି ପିଆର୍ ଆବଶ୍ୟକତା କରେ ନାହିଁ । ଟ୍ରଫିଗୁଡ଼ିକ ତାଙ୍କ ପ୍ରଦର୍ଶନର କଥା କହୁଛି ।'
