ପୁରୀ, ୨୯/୦୯: ରାୟଗଡ଼ା ଫରେଷ୍ଟ୍ ଡିଭିଜନ ଦ୍ୱାରା ପରିଚାଳିତ ଭବାନୀପାଟଣାର ଜାରିଂ ହାଇଟେକ୍ ନର୍ସରୀ ରିସର୍ଚ୍ଚ ସେଣ୍ଟରରେ କାମ କରୁଥିବା ଫରେଷ୍ଟର ସଞ୍ଜୟ ନାୟକଙ୍କ ଆତ୍ମହତ୍ୟା ପରେ ପତ୍ନୀ ଏବେ ବିଚଳିତ । ତାଙ୍କ ଦୁଃଖ ପୁଲିସ କି ବନ ବିଭାଗ ଅଧିକାରୀ କାହାକୁ ଦେଖାଯାଉନି । ଘଟଣାକୁ ମିଳିମିଶି ଚାପି ଦେଉଛନ୍ତି । ଏଭଳି ବିଚଳିତ ଅବସ୍ଥାରେ ୨୭ ତାରିଖ ଦିନ ପୁରୀରେ ସ୍ୱାମୀଙ୍କ ଶୁଦ୍ଧି କର୍ମ ବେଳେ ସେ ବୁଡ଼ିଯାଉଥିବା ବେଳେ ତାଙ୍କୁ ଉଦ୍ଧାର କରାଯାଇଥିବା ସ୍ଥାନୀୟ ଲୋକେ କହିଛନ୍ତି ।
ଶୁକ୍ରବାର ଅପରାହ୍ଣ ପ୍ରାୟ ସାଢ଼େ ୧୨ଟାରୁ ୧ଟା ସମୟ । ମୃତ ଫରେଷ୍ଟର୍ଙ୍କ ପତ୍ନୀ ୨ଟି ସନ୍ତାନଙ୍କ ସମେତ ପରିବାର ଓ ସମ୍ପର୍କୀୟମାନେ ବାଲିସାହିସ୍ଥିତ ତୀର୍ଥ ପୁଷ୍କରିଣୀ ଶ୍ୱେତଗଙ୍ଗାରେ ଦଶାହ କାର୍ଯ୍ୟ କରୁଥିଲେ। ଦଶତୁଠ କର୍ମ ଚାଲିଥିବାବେଳେ କୂଳରେ ବସି କାନ୍ଦୁଥିଲେ ତାଙ୍କ ପତ୍ନୀ । ଅତ୍ୟନ୍ତ ବିଚଳିତ ଥିଲେ ସେ । ପାଖରେ ଅନ୍ୟ ୨ଟି ଦଶାହ କର୍ମ ଚାଲିଥିଲା । କିଛି ସମୟ ପରେ ପତ୍ନୀ ପୋଖରୀ ଭିତରକୁ ଯାଇଥିଲେ । କିନ୍ତୁ ବାହାରକୁ ଆସି ନଥିଲେ । ସେ ବୁଡ଼ି ଯାଉଥିବା ଦେଖି କୂଳରେ ଥିବା ତାଙ୍କ ନଣନ୍ଦ ପାଣି ଭିତରକୁ ଡେଇଁଥିଲେ । କିନ୍ତୁ ସେ ତାଙ୍କୁ ଉଦ୍ଧାର କରିପାରିନଥିଲେ । ଉଭୟ ପାଣିରେ ବୁଡ଼ି ଯାଉଥିବାବେଳେ ସେଠାରେ ଉପସ୍ଥିତ ଥିବା ଶିବଶଙ୍କର ନାମକ ବ୍ରାହ୍ମଣ ଓ ଶୁଦ୍ଧି କ୍ରିୟାରେ ସହଯୋଗ କରୁଥିବା ନାପିତ ରବି ବାରିକ ଏବଂ ବାଲିସାହିର ୨ ଜଣ ବ୍ୟକ୍ତି ପାଣିକୁ ଡେଇଁ ଉଭୟଙ୍କୁ ଉଦ୍ଧାର କରିଥିଲେ ।
ମହିଳାଙ୍କୁ କୂଳକୁ ଅଣାଯାଇଥିଲେ ମଧ୍ୟ ତାଙ୍କ ଆଖିରୁ ଲୁହ ବନ୍ଦ ହେଉ ନଥିଲା । ସେ କେବଳ କୋହ ଭରା କଣ୍ଠରେ କହି ଚାଲିଥିଲେ ନିଜ ଦୁଃଖ । ବାରମ୍ବାର କହୁଥିଲେ, ମୋର ବଞ୍ଚି ଲାଭ କ’ଣ? ମୋତେ କାହିଁକି ବଞ୍ଚାଉଛ? ଫରେଷ୍ଟର୍ଙ୍କ ପତ୍ନୀଙ୍କୁ ସମସ୍ତେ ସମବେଦନା ଜଣାଇବା ସହ ବୁଝାସୁଝା କରିଥିଲେ । ପରିବାର ଓ ସମ୍ପର୍କୀୟମାନେ ୨ ସନ୍ତାନଙ୍କ ଭବିଷ୍ୟତ ପାଇଁ ତାଙ୍କୁ ସାହାସ ଧରିବାକୁ ପଡ଼ିବ ବୋଲି ସମସ୍ତେ ସାନ୍ତ୍ୱନା ଦେଇଥିଲେ । ଦଶାହ କର୍ମ ସାରିବା ପରେ ପରିବାର ରାୟଗଡ଼ା ଫେରିଯାଇଥିଲେ ।
ଉଲ୍ଳେଖଯୋଗ୍ୟ, ଫରେଷ୍ଟର ସଞ୍ଜୟ ନାୟକ (୩୩ ବର୍ଷ) ଗତ ୧୮ ତାରିଖରେ ଆତ୍ମହତ୍ୟା କରିଥିଲେ । ସେ ସୁଇସାଇଡ ନୋଟରେ କାର୍ଯ୍ୟକ୍ଷେତ୍ରରେ କିପରି କମିଶନ ନେବାକୁ ଡିଏଫ୍ଓ ଓ ଆକାଉଣ୍ଟସ ବିଭାଗ ତାଙ୍କ ଉପରେ ଚାପ ପକାଉଥିଲେ ତାହା ଉଲ୍ଲେଖ କରିଥିଲେ । ଏପରିକି ଦାବି ମୁତାବଳ କମିଶନ ଦେଇ ନପାରିବାରୁ ତାଙ୍କୁ ବଲାଙ୍ଗିର ବଦଳି କରି ଦିଆଯାଇଥିଲା । ସଞ୍ଜୟଙ୍କ ଭାଇ ରବିନାରାୟଣ ନାୟକ ସୁଇସାଇଡ୍ ନୋଟ୍ ଆଧାରରେ ଥାନାରେ ଲିଖିତ ଅଭିଯୋଗ କରିଥିଲେ । ପିସିସିଏଫ୍ ଦେବୀଦତ୍ତ ବିଶ୍ୱାଳ ମଧ୍ୟ ଗଣମାଧ୍ୟମରେ ପ୍ରକାଶିତ ଖବରକୁ ତର୍ଜମା କରି ଅତି ଶୀଘ୍ର ତଦନ୍ତ ହେବ ବୋଲି ପ୍ରତିଶ୍ରୁତି ଦେଇଥିଲେ । ସଞ୍ଜୟଙ୍କ ପତ୍ନୀ ଜଙ୍ଗଲ ଓ ପରିବେଶ ମନ୍ତ୍ରୀ ଗଣେଶ ରାମ ସିଂ ଖୁଣ୍ଟିଆଙ୍କୁ ଏ ନେଇ ଦାବିପତ୍ର ପ୍ରଦାନ କରିଥିଲେ । ମନ୍ତ୍ରୀ ସଞ୍ଜୟଙ୍କ ଘରକୁ ଯାଇ ପରିବାରକୁ ଭେଟିବା ସହ ଘଟଣାର ତଦନ୍ତ ହେବ ବୋଲି କହିଥିଲେ । କିନ୍ତୁ ୧୦ ଦିନ ମଧ୍ୟରେ ନା ପୁଲିସ ନା ବନ ବିଭାଗ କେହି ଘଟଣାର ତଦନ୍ତ କରୁଛନ୍ତି ।
