ଭୁବନେଶ୍ୱର,୨୬/୦୯: ଭରତପୁର ଥାନାରେ ୧୫ ତାରିଖ ରାତିରେ କ’ଣ ଘଟିଥିଲା? ସେନାଧିକାରୀ ଓ ତାଙ୍କ ବାନ୍ଧବୀ କ’ଣ ସତରେ ନିର୍ଯାତନା ଓ ଅସଦାଚରଣର ଶିକାର ହୋଇଥିଲେ? ଏଭଳି ସଙ୍ଗୀନ ଅଭିଯୋଗ ପଛର ସତ ଜାଣିବାକୁ ନିଲମ୍ବିତ ଆଇଆଇସି ଦୀନକୃଷ୍ଣ ମିଶ୍ରଙ୍କ ପଲିଗ୍ରାଫ୍, ବ୍ରେନ୍ ଫିଙ୍ଗର ପ୍ରିଣ୍ଟିଂ ଓ ନାର୍କୋ ଆନାଲିସିସ୍ ପରୀକ୍ଷା କରାଯିବ । ଦୀନକୃଷ୍ଣଙ୍କ ସହମତି ପରେ ଏସ୍ଡିଜେଏମ୍ ଏହି ପରୀକ୍ଷା ପାଇଁ ଅନୁମତି ଦେଇଛନ୍ତି ।
ବୁଧବାର ପୂର୍ବାହ୍ଣରେ ଦୀନକୃଷ୍ଣ ଏସ୍ଡିଜେଏମ୍ଙ୍କ ଠାରେ ହାଜର ହୋଇଥିଲେ । ସେ କୌଣସି ଆଇନଜୀବୀଙ୍କ ସାହାଯ୍ୟ ନେବାକୁ ମନା କରିଥିଲେ । ବିଚାରପତିଙ୍କ ସାମ୍ନାରେ ନିଜ ପକ୍ଷ ରଖି ସେ କହିଥିଲେ, ମୁଁ ନିର୍ଦ୍ଦୋଷ । ମୋ ବିରୋଧରେ ଯାହା ବି ଅଭିଯୋଗ ହୋଇଛି, ସେଥିରେ ମୋର କୌଣସି ସମ୍ପୃକ୍ତି ନାହିଁ । ପଲିଗ୍ରାଫ୍ ଟେଷ୍ଟ ସହିତ ନାର୍କୋ ଆନାଲିସିସ୍ ଓ ବ୍ରେନ୍ ଫିଙ୍ଗର ପ୍ରିଣ୍ଟିଂ ପରୀକ୍ଷା ପାଇଁ ମୋର କୌଣସି ଆପତ୍ତି ନାହିଁ ।
ଏହି ୩ଟି ଟେଷ୍ଟ ପାଇଁ ଦୀନକୃଷ୍ଣଙ୍କୁ ଗୁଜରାଟ ଗାନ୍ଧୀନଗରସ୍ଥିତ ରାଜ୍ୟ ଅପରାଧ ବିଧି ବିଜ୍ଞାନାଗାର (ଏସ୍ଏଫ୍ଏସଏଲ) ନେବାକୁ ନିର୍ଦ୍ଦେଶ ଦେଇଛନ୍ତି ଏସ୍ଡିଜେଏମ୍ । ଏସ୍ଓପି ଅନୁସାରେ ପରୀକ୍ଷା କରାଇ ଯଥାଶୀଘ୍ର ମେଡିକାଲ ରିପୋର୍ଟ ଅଦାଲତରେ ଉପସ୍ଥାପନ ପାଇଁ କ୍ରାଇମ୍ବ୍ରାଞ୍ଚ ତଦନ୍ତକାରୀ ଅଧିକାରୀ ଡିଏସ୍ପି ନରେନ୍ଦ୍ର ବେହେରା ଆଦେଶିତ ହୋଇଛନ୍ତି । ପରୀକ୍ଷାରୁ ନିର୍ଯାତନାର ସତ୍ୟାସତ୍ୟ ବାହାରିବ ବୋଲି କ୍ରାଇମ୍ବ୍ରାଞ୍ଚ ଆଶା ରଖିଛି ।
ଅନ୍ୟପଟେ କ୍ରାଇମ୍ବ୍ରାଞ୍ଚର ତଦନ୍ତକାରୀ ଦଳ ସାମ୍ନାରେ ପୂରା ଘଟଣାର ପୁନରାବୃତ୍ତି କରିଛନ୍ତି ସେନାଧିକାରୀ ଓ ତାଙ୍କ ବାନ୍ଧବୀ । ଶ୍ରୀ ବେହେରାଙ୍କ ସମେତ ୫ ଜଣିଆ କ୍ରାଇମ୍ବ୍ରାଞ୍ଚ ଦଳ ସକାଳ ୮ଟାରେ ଭରତପୁର ଥାନାରେ ପହଞ୍ଚିଥିଲେ । ତାଙ୍କ ସହ ଏକ ଫୋରେନ୍ସିକ ଦଳ ମଧ୍ୟ ସେଠାକୁ ଯାଇଥିଲେ । ସେନାଧିକାରୀ ଓ ବାନ୍ଧବୀ ଅଧଘଣ୍ଟାଏ ପରେ ଥାନାରେ ପହଞ୍ଚିଥିଲେ । ତାଙ୍କ ସହ ଥିଲେ ୧୨୦ ଇନ୍ଫ୍ରାଣ୍ଟ୍ରି ବାଟାଲିୟନର ଜଣେ କମାଣ୍ଡିଂ ଅଧିକାରୀ ଓ ୮ଜଣ ଯବାନ । ଉଭୟ ପୀଡି଼ତଙ୍କ ସୁରକ୍ଷା ପାଇଁ ସେନା ଯବାନମାନେ ସାଙ୍ଗରେ ଥିଲେ । କ୍ରାଇମ୍ବ୍ରାଞ୍ଚ ପହଞ୍ଚିବା ପୂର୍ବରୁ ୩ ନିଲମ୍ବିତ ମହିଳା ଅଧିକାରିଣୀ (ସବ୍ଇନ୍ସପେକ୍ଟର ବୈଶାଳିନୀ ନାୟକ, ଏଏସ୍ଆଇ ସଳୀଳମୟୀ ସାହୁ, ଏଏସ୍ଆଇ ସାଗରିକା ନାଥ) ଥାନାରେ ଉପସ୍ଥିତ ଥିଲେ ।
ଘଟଣାଦିନ ଥାନାରେ ପହଞ୍ଚିବାଠାରୁ ହସ୍ପିଟାଲ ଯିବା ଯାଏଁ ପ୍ରତିଟି ମୁହୂର୍ତ୍ତ ଜାଣିବାକୁ ଚେଷ୍ଟା କରିଥିଲେ ତଦନ୍ତକାରୀ ଦଳ । ସେନାଧିକାରୀ ଓ ବାନ୍ଧବୀଙ୍କୁ ପୁଲିସ କିଭଳି ଦୁର୍ବ୍ୟବହାର କରିଥିଲା? ଉଭୟଙ୍କ ଅଭିଯୋଗପତ୍ର ରଖିଥିଲେନି କାହିଁକି? ଗାଳିଗୁଲଜ କରିଥିଲେ କି ନାହିଁ? କେଉଁ ଅବସ୍ଥାରେ ଓ କାହିଁକି ବାନ୍ଧବୀଜଣକ ବାରମ୍ବାର କବାଟ ଠକ୍ ଠକ୍ କରୁଥିଲେ? ଉପସ୍ଥିତ ଅନ୍ୟ ପୁଲିସ ଅଧିକାରୀଙ୍କ ବ୍ୟବହାର କେମିତି ଥିଲା? ସବୁକିଛି ଗୋଟି ଗୋଟି କରି ଅଭିନୟ ଜରିଆରେ ଦେଖାଇଥିଲେ ସେନାଧିକାରୀଓ ତାଙ୍କ ବାନ୍ଧବୀ ।
ଉଭୟଙ୍କ ବିରୋଧରେ ହୋଇଥିବା ମାମଲା ଆଧାରରେ ୩ ନିଲମ୍ବିତ ପୁଲିସ ଅଧିକାରିଣୀଙ୍କଠାରୁ ତଥ୍ୟ ଆଦାୟ କରିଥିଲା କ୍ରାଇମ୍ବ୍ରାଞ୍ଚ । ବାନ୍ଧବୀଜଣକ କାହିଁକି ଚିଲ୍ଲାଉଥିଲେ? ଅଶ୍ରବ୍ୟ ଭାଷାରେ ଗାଳିଗୁଲଜ କରିଥିଲେ କି? କେଉଁ ପରିସ୍ଥିତିରେ ଓ କାହିଁକି ପୁଲିସଙ୍କ ହାତକୁ କାମୁଡି଼ଥିଲେ? ଏସବୁର ଦୃଶ୍ୟକୁ ୩ଜଣ ମନପକାଇଥିଲେ ।
ପ୍ରାୟ ୫ ଘଣ୍ଟାର ଘଣ୍ଟାଚକଟା ପରେ କ୍ରାଇମ୍ବ୍ରାଞ୍ଚ ଦଳ ସେନାଧିକାରୀ ଓ ବାନ୍ଧବୀଙ୍କୁ ଧରି ପଥରଗାଡି଼ଆର ସୁନ୍ଦରପୁର ଅଞ୍ଚଳକୁ ଯାଇଥିଲା। ସେଠାରେ ଉଭୟ ପାଶ୍ୱର୍ରୁ ରାସ୍ତାକୁ ବନ୍ଦ କରାଯାଇଥିଲା । ୭ଜଣ ଅସାମାଜିକ କେଉଁ ପଟୁ ତାଙ୍କ ଆଡ଼କୁ ଆସିଲେ? ସେମାନଙ୍କ ମଧ୍ୟରେ କାହିଁକି ବଚସା ଓ ଧସ୍ତାଧସ୍ତି ପରିସ୍ଥିତି ଉପୁଜିଥିଲା? କେଉଁ ରାସ୍ତା ଦେଇ ସେମାନେ ଖସି ପଳାଇଥିଲେ? ଉଭୟ ପୀଡି଼ତ ଏସବୁ ଘଟଣାର ପୁନରାବୃତ୍ତି କରିଥିଲେ ।
କ୍ରାଇମ୍ବ୍ରାଞ୍ଚର ଫୋରେନ୍ସିକ ଦଳ ସମସ୍ତ ତଦନ୍ତ ଓ ଯାଞ୍ଚ ପ୍ରକ୍ରିୟାର କ୍ୟାମେରାରେ ରେକର୍ଡ କରିଥିଲା । ‘ଫାରୋ’ର ୩ଡି କ୍ୟାମେରା ଯୋଗେ ଥାନା ଭିତରେ ପ୍ରତିଟି ମୁହୂର୍ତ୍ତର ଭିଡିଓ କଏଦ୍ କରାଯାଇଥିଲା । କ୍ୟାମେରାଟି ୩୬୦ ଡିଗ୍ରୀରେ ଚର୍ତୁଦିଗ ଘୁରି ସ୍କାନର ଯୋଗେ ଫଟୋ ଓ ଭିଡିଓ ଉତ୍ତୋଳନ କରିଥିଲା ।