ମୁମ୍ବାଇ ୨୯/୦୯: ଗତ ଶୁକ୍ରବାର ବଡ଼ ପରଦାରେ ମୁକ୍ତିଲାଭ କରିଛି ବହୁ ପ୍ରତୀକ୍ଷିତ ଫିଲ୍ମ ‘ଦେବରା: ଭାଗ-୧’ । ପ୍ରଥମ ଦିନ ଏହା ସବୁ ଭାଷାରେ ୮୨.୫ କୋଟି କଲେକ୍ସନ୍ କରିଛି । ଏହା ଜରିଆରେ ବକ୍ସ ଅଫିସ୍ରେ ଏ ବର୍ଷର ୨ୟ ସର୍ବାଧିକ ଆୟ କରିଥିବା ଫିଲ୍ମର ଟାଇଟଲ୍ ହାତେଇଛି । ଏହା କେବଳ ଏ ବର୍ଷର ଇଣ୍ଡିଆନ୍ ଓପନର୍ ତାଲିକାର ଶୀର୍ଷରେ ଥିବା ‘କଲ୍କି ୨୮୯୮ ଏଡି’ର ପଛରେ ଅଛି । ପ୍ରଭାସ ଷ୍ଟାରର୍ ‘କଲ୍କି’ ପ୍ରଥମ ଦିନ ବିଶ୍ୱ ବକ୍ସ ଅଫିସ୍ରେ ୧୭୭ କୋଟି ଏବଂ ଭାରତରେ ନେଟ୍ ୧୧୪ କୋଟି କଲେକ୍ସନ୍ କରିଥିଲା । ‘ଆର୍ଆର୍ଆର୍’, ‘ବାହୁବଲୀ-୨’, ‘କଲ୍କି ୨୮୯୮ ଏଡି’, ‘ସାଲାର: ଭାଗ-୧’ ଓ ‘କେଜିଏଫ୍: ଭାଗ ୨’ ପରେ ରିଲିଜ୍ର ପ୍ରଥମ ଦିନ ‘ଦେବରା’ ଭାରତର ୬ଷ୍ଠ ସର୍ବାଧିକ ଆୟ କରିଥିବା ଫିଲ୍ମ ହୋଇଛି ।
ଗତ ୬ ବର୍ଷରେ ପ୍ରଥମ ଥର ବଡ଼ ପରଦାରେ ଏକାକୀ ନାଟକର ମୁଖ୍ୟ ନାୟକ ଭାବେ ନଜର ଆସିଛନ୍ତି ଏନ୍ଟିଆର୍ । ଫିଲ୍ମ ‘ଆର୍ଆର୍ଆର୍’ ବିଶ୍ୱ ବକ୍ସ ଅଫିସ୍ରେ ସଫଳ ହେବା ପରେ ଏହା ତାଙ୍କର ୨ୟ ଫିଲ୍ମ । ୨ୟ ଦିନ ସନ୍ଧ୍ୟା ସୁଦ୍ଧା ଫିଲ୍ମଟି ୨୪.୫୪ କୋଟି କଲେକ୍ସନ୍ କରିଥିଲା । ଏଥିସହିତ ଏହାର ମୋଟ୍ କଲେକ୍ସନ୍ ୧୦୭.୦୪ କୋଟି ଟପିଛି । ପ୍ରଥମ ଦିନ ଫିଲ୍ମର ତେଲୁଗୁ ସଂସ୍କରଣ ୭୩.୨୫ କୋଟି ବ୍ୟବସାୟ କରିଥିଲା । ହିନ୍ଦୀରେ ୭.୫ କୋଟି ଏବଂ କନ୍ନଡ଼ ଓ ମାଲାୟାଲମ୍ରେ ଯଥାକ୍ରମେ ୩୫ ଲକ୍ଷ ଓ ୪୦ ଲକ୍ଷ କଲେକ୍ସନ୍ କରିଥିଲା ।
ଭାରତରେ ପ୍ରଥମ ଦିନ ଫିଲ୍ମର ନେଟ୍ କଲେକ୍ସନ୍ ୮୨.୫ କୋଟି ହୋଇଥିବାବେଳେ ମୋଟ୍ କଲେକ୍ସନ୍ ୯୮ କୋଟି ଟପିଥିଲା । ଫିଲ୍ମଟି ବିଦେଶରେ ପ୍ରଥମ ଦିନ ୪୭ କୋଟି ଆୟ କରିଥିଲା । ଏଥିସହିତ ବିଶ୍ୱସ୍ତରରେ ପ୍ରଥମ ଦିନ ଏହାର ମୋଟ୍ କଲେକ୍ସନ୍ ୧୪୫ କୋଟି ଟପିଥିଲା । କୋରତଲା ଶିବଙ୍କ ନିର୍ଦ୍ଦେଶିତ ଏହି ଆକ୍ସନ୍-ଡ୍ରାମାରେ ମୁଖ୍ୟ ଭୂମିକାରେ ଅଭିନୟ କରିଛନ୍ତି ଜୁନିୟର ଏନ୍ଟିଆର୍, ଜାହ୍ନବୀ କପୁର । ଖଳନାୟକ ଭୈରବ ଭୂମିକାରେ ନଜର ଆସିଛନ୍ତି ସୈଫ ଅଲି ଖାନ୍ ।
