ଭୁବନେଶ୍ୱର,୨୯/୦୯: ଝିଅଟିଏ ତା’ ଜନ୍ମରୁ ମୃତ୍ୟୁଯାଏ ଅନ୍ୟମାନଙ୍କ ଇଚ୍ଛାରେ ନିଜକୁ ବଦଳାଉଥାଏ । ତା’ ଚାଲିଚଳଣ, ଆଚାର ବ୍ୟବହାର ସବୁ ସମୟକ୍ରମେ ବଦଳେ ଅନ୍ୟମାନଙ୍କ ଚାପରେ । ବାହା ହେବା ପରେ ନିଜ ଠିକଣା ବି । ଶାଶୂଘରର ରୁଚି ଅନୁସାରେ ବଦଳେଇବାକୁ ପଡ଼େ  ତା’ ରୁଚି, ସୌକ୍‌, ଏମିତିକି ପିନ୍ଧୁଥିବା  ଲୁଗାପଟା । ସ୍ୱାମୀର  ମୃତ୍ୟୁ ପରେ ବିଧବା ହେଇଗଲେ ଧଳାଲୁଗା  ପିନ୍ଧି ସେ ହୁଏ ରଙ୍ଗହୀନ। ଅନ୍ୟର ଚାପରେ  ସବୁବେଳେ ଝିଅଙ୍କ ରୁଚି, ମନ, ଇଚ୍ଛା ଓ ଭବିଷ୍ୟତ  ବି ବଦଳିଯାଇପାରେ ଅଥଚ କେହି ସେ ବଦଳିବାକୁ ଗୁରୁତ୍ୱର ସହ ଲକ୍ଷ୍ୟ କରିପାରନ୍ତି ନାହିଁ । କିନ୍ତୁ ଝିଏଟିଏ ଯଦି ନିଜ ଇଚ୍ଛାରେ କେବେ ବଦଳିବାକୁ  ଚେଷ୍ଟା କରେ ଲୋକେ କହନ୍ତି-ଝିଅଟି ବଦଳିଗଲା । ମାତ୍ର ସାମ୍ପ୍ରତିକ ପରିସ୍ଥିତିରେ ଝିଅ ସ୍ୱାବଲମ୍ବୀ ହେବା ପାଇଁ କିପରି ନିଜକୁ ବଦଳାଇପାରେ ତା’ର  ନମୁନା ‘ଝିଅଟି ବଦଳିଗଲା’ ଯାହାକି ତରଙ୍ଗ ଟିଭିରେ ପ୍ରସାରିତ ହେବାକୁ ଯାଉଛି ଏଇ ରବିବାର ।

ରବିବାର ସନ୍ଧ୍ୟା ସାଢ଼େ ୬ଟାରେ ଏହି ଟେଲି ସିନେମାର ୱାର୍ଲ୍ଡ ଟେଲିଭିଜନ୍‌ ପ୍ରିମିୟର୍‌  ଅନୁଷ୍ଠିତ ହେବ । ଚନ୍ଦନ କୁମାରଙ୍କ କାହାଣୀ ଓ ଭରଦ୍ୱାଜ ପଣ୍ଡାଙ୍କ ସଂଳାପରେ ସଜା ଏହି ସିନେମାର ନିର୍ଦ୍ଦେଶନା ଦେଇଛନ୍ତି ଅଶୋକ  ପତି । ଦେବ୍‌, ହିମାଗ୍ନି, ଲିକୁନ୍‌, ଜୀବନ  ପଣ୍ଡା, ତ୍ରିଭୁବନ, ଅଳକା, ଅନନ୍ୟା, ନୀର  ପ୍ରମୁଖ ମୁଖ୍ୟ ଚରିତ୍ରରେ ଅଭିନୟ କରିଛନ୍ତି । ଗୀତିକାର ନିର୍ମଳ ନାୟକଙ୍କ ଗୀତକୁ ପ୍ରଶାନ୍ତ  ପାଢ଼ୀ ସ୍ୱର ଦେଇଥିବାବେଳେ କଣ୍ଠଦାନ  କରିଛନ୍ତି ସ୍ୱସ୍ତିକ୍‌ ପାଢ଼ୀ, ଅସୀମା ପଣ୍ଡା, ସତ୍ୟଜିତ୍‌ ପ୍ରଧାନ ଓ ଅନ୍ତରା ଚକ୍ରବର୍ତ୍ତୀ ।  କୋରିଓଗ୍ରାଫି କରିଛନ୍ତି ଲୁବୁନ୍‌-ଟୁବୁନ୍‌ । ପ୍ରଯୋଜନା ଦାୟିତ୍ୱ ତୁଲାଇଛନ୍ତି ଅଜୟ ରାଉତ ।