କୋଲକାତା: ଆରଜି କର ମେଡିକାଲ କଲେଜ ଓ ହସ୍ପିଟାଲରେ ଡାକ୍ତରଙ୍କୁ ଦୁଷ୍କର୍ମ ଓ ହତ୍ୟା ମାମଲା ଭିନ୍ନ ମୋଡ ନେଇଛି । ପୋଲିସ ଷ୍ଟେସନ୍ରେ ପ୍ରମାଣ ପରିବର୍ତ୍ତନ କରାଯାଇଥିବା ନେଇ ଦାବି କରିଛି ସିବିଆଇ । ଏହା ପୂର୍ବରୁ ଡାକ୍ତର ଦୁଷ୍କର୍ମ ଓ ହତ୍ୟା ମାମଲାରେ ପ୍ରମାଣ ହେରଫେର କରିଥିବା ନେଇ ପୋଲିସ ବିରୋଧରେ ଅଭିଯୋଗ ଆସିଥିଲା । ଏହି ମାମଲାରେ ଟାଲା ଥାନାର ତତ୍କାଳୀନ ଅଫିସର ଇନ ଚାର୍ଜ ଅଭିଜିତ ମଣ୍ଡଳଙ୍କୁ ଗିରଫ କରିଥିଲା ସିବିଆଇ । ଏବେ ପୁଣି ଥରେ ଟାଲା ଥାନା ବିରୋଧରେ ସଙ୍ଗୀନ ଅଭିଯୋଗ ଆସିଛି ।
ଥାନାରେ ପ୍ରମାଣ ପରିବର୍ତ୍ତନ କରାଯାଇ ମିଥ୍ୟା ରେକର୍ଡ ତିଆରି କରାଯାଇଛି । ସ୍ବତନ୍ତ୍ର ସିବିଆଇ କୋର୍ଟରେ ଏନେଇ ଖୁଲାସା କରିଛି କେନ୍ଦ୍ରୀୟ ତଦନ୍ତ ଏଜେନ୍ସି । ଅଗଷ୍ଟ ୯ରେ ଆରଜି କର ମେଡିକାଲ କଲେଜ ଓ ହସ୍ପିଟାଲରେ ମହିଳା ଡାକ୍ତରଙ୍କ ମୃତଦେହ ମିଳିଥିଲା । ଶବ ବ୍ୟବଚ୍ଛେଦ ହେବା ପରେ ଡାକ୍ତରଙ୍କୁ ଦୁଷ୍କର୍ମ କରାଯାଇଥିବା ଜଣାପଡ଼ିଥିଲା । ଏହି ମାମଲାରେ ସଂଜୟ ରୟକୁ ଗିରଫ କରିଥିଲା ପୋଲିସ । ପରେ ଏହି ମାମଲାରେ ହାତ ଥିବା ନେଇ କଲେଜର ପୂର୍ବତନ ପ୍ରିନ୍ସିପାଲ୍ ସିନ୍ଦୀପ ଘୋଷ ଏବଂ ଟାଲା ଥାନାର ପୂର୍ବତନ ଓଆଇସି ଅଭିଜିତ ମଣ୍ଡଳଙ୍କୁ ଗିଫର କରାଯାଇଥିଲା ।
ବୁଧବାର ଅଭିଜିତ ମଣ୍ଡଳ କୋର୍ଟରେ ଜାମିନ ପାଇଁ ଆବେଦନ କରିଥିଲେ । ଏହି ସମୟରେ ସିବିଆଇ ବିଭିନ୍ନ ପ୍ରମାଣ ଦେଇ ତାଙ୍କର ଜାମିନ ଆବେଦନକୁ ବିରୋଧ କରିଥିଲା । ଏଥିରେ ପ୍ରମାଣ ସହ ହେରଫେର କରାଯାଇଥିବା ନେଇ କୋର୍ଟରେ ଜଣାଇଥିଲା ସିବିଆଇ । ସିବିଆଇ ଦାବି କରିଥିଲା ଯେ, ଟାଲା ଥାନାରେ ମିଥ୍ୟା ରେକର୍ଡ ତିଆରି କରାଯାଇଛି । ତେବେ ଆରମ୍ଭରୁ ଟାଲା ପୋଲିସ ଷ୍ଟେସନର ଭୂମିକା ପ୍ରଶ୍ନଘେରରେ ରହିଆସିଛି ।
ସଠିକ ସମୟରେ କାହିଁକି ଏଫଆଇଆର ରୁଜୁ ହୋଇନଥିଲା ? କାହିଁକି ତରବରିଆ ଭାବରେ ପୋଲିସ ଶବ ସତ୍କାର କଲା ? ଏଭଳି ଅନେକ ପ୍ରଶ୍ନ ଉଠିଥିବା ବେଳେ କୋର୍ଟରେ ପୂର୍ବତନ ଓଆଇସି ଅଭିଜିତ ମଣ୍ଡଳ କହିଥିଲେ ଯେ, ଘଟଣା ପରେ ସଠିକ ପଦକ୍ଷେପ ନେଇଥିଲେ । ଅଗଷ୍ଟ ୯ ସକାଳ ୯.୩୦ରେ ଘଟଣା ସଂପର୍କରେ ଖବର ମିଳିଥିଲା । ସାଢ଼େ ୧୦ରେ ଘଟଣାସ୍ଥଳରେ ସେ ପହଞ୍ଚିଥିଲେ ବୋଲି କୋର୍ଟରେ କହିଥିଲେ ଅଭିଜିତ ମଣ୍ଡଳ ।
