ନୂଆଦିଲ୍ଲୀ, ୨୪/୦୬: ସୋମବାର ଠାରୁ ଆରମ୍ଭ ହେବ ଅଷ୍ଟାଦଶ ଲୋକସଭାର ପ୍ରଥମ ଅଧିବେଶନ । ଏହା ଜୁଲାଇ ୩ ତାରିଖ ପର୍ଯ୍ୟନ୍ତ ଚାଲିବାର କାର୍ଯ୍ୟକ୍ରମ ରହିଛି । ଏହି ୧୦ ଦିନିଆ ଅଧିବେଶନରେ ୮ଟି କାର୍ଯ୍ୟ ଦିବସ ରହିଛି (ଜୁନ ୨୯ ଓ ୩୦ ତାରିଖ ଛୁଟି) । ପ୍ରଥମ ଦୁଇ ଦିନ ଅର୍ଥାତ ୨୪ ଓ ୨୫ ତାରିଖରେ ନବ ନିର୍ବାଚିତ ସାଂସଦ ଶପଥ ଗ୍ରହଣ କରିବେ । ଲୋକସଭାର କାମଚଳା ବାଚସ୍ପତି ଭର୍ତ୍ତୃହରି ମହତାବ ପଦ ଓ ଗୋପନୀୟତାର ଶପଥ ପାଠ କରାଇବେ ।
ସୋମବାର ସକାଳ ୯ଟା ୩୦ରେ କାମଚଳା ବାଚସ୍ପତି ଶ୍ରୀ ମହତାବ ରାଷ୍ଟ୍ରପତି ଭବନକୁ ଯାଇ ସେଠାରେ ରାଷ୍ଟ୍ରପତିଙ୍କ ଠାରୁ ନିଜେ ଶପଥ ଗ୍ରହଣ କରିବେ । ପରେ ପୂର୍ବାହ୍ନ ୧୧ଟାରେ ଲୋକସଭାକୁ ଆସି ଅନ୍ୟ ସଦସ୍ୟମାନଙ୍କୁ ଶପଥ ପାଠ କରାଇବେ । ପ୍ରଥମେ ପ୍ରଧାନମନ୍ତ୍ରୀ, ମନ୍ତ୍ରିମଣ୍ଡଳର ସଦସ୍ୟ ଓ ତାହାପରେ ଅନ୍ୟ ସଦସ୍ୟମାନେ ଶପଥ ନେବେ । ଶପଥ ପାଠ କରାଇବାରେ କାମଚଳା ବାଚସ୍ପତିଙ୍କୁ ସହଯୋଗ କରିବା ଲାଗି ରାଷ୍ଟ୍ରପତି ଆଉ ୫ ଜଣ ବରିଷ୍ଠ ସଦସ୍ୟଙ୍କୁ ନିଯୁକ୍ତ କରିଛନ୍ତି । ସେମାନେ ହେଲେ କଂଗ୍ରେସର କୋଡିକୁନ୍ନିଲ ସୁରେଶ, ଟିଏମ୍ସିର ସୁଦୀପ ବନ୍ଦୋପାଧ୍ୟାୟ, ଡିଏମ୍କେର ଟି.ଆର୍. ବାଲୁ ଏବଂ ବିଜେପିର ରାଧାମୋହନ ସିଂହ ଓ ଫଗନ ସିଂହ କୁଲସ୍ତେ । କିନ୍ତୁ କାମଚଳା ବାଚସ୍ପତିଙ୍କ ନିଯୁକ୍ତିକୁ ବିରୋଧ କରି ବିରୋଧୀ ଦଳର ୩ ସଦସ୍ୟ ଗତ ୨୨ ତାରିଖରେ ସେମାନଙ୍କ ନାମ ପ୍ରତ୍ୟାହାର କରିନେଇଛନ୍ତି ।
ସେହିପରି ଆସନ୍ତା ୨୬ ତାରିଖରେ ବାଚସ୍ପତି ନିର୍ବାଚନ ହେବ । ୨୭ ତାରିଖରେ ରାଜ୍ୟସଭାର ୨୬୪ ତମ ଅଧିବେଶନ ଆରମ୍ଭ ହେବ । ସେହିଦିନ ରାଷ୍ଟ୍ରପତି ଦ୍ରୌପଦୀ ମୁର୍ମୁ ଉଭୟ ଗୃହର ମିଳିତ ଅଧିବେଶନକୁ ସମ୍ବୋଧନ କରିବେ । ଏହାପରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଉଦ୍ବୋଧନ ଦେବେ। ୨୮ ତାରିଖରେ ପ୍ରଧାନମନ୍ତ୍ରୀ ଗୃହରେ ନିଜ ମନ୍ତ୍ରିମଣ୍ଡଳର ସଦସ୍ୟଙ୍କ ପରିଚୟ ପ୍ରଦାନ କରିବେ । ଅଧିବେଶନର ଶେଷ ଦୁଇ ଦିନରେ ସରକାର ରାଷ୍ଟ୍ରପତିଙ୍କ ଅଭିଭାଷଣ ଉପରେ ଧନ୍ୟବାଦ ପ୍ରସ୍ତାବ ଆଣିବେ ଏବଂ ତା’ଉପରେ ଉଭୟ ଲୋକ ସଭା ଓ ରାଜ୍ୟ ସଭାରେ ଚର୍ଚ୍ଚା ହେବ ।
ପ୍ରଧାନମନ୍ତ୍ରୀ ତାର ଜବାବ ରଖିବେ । ଦୀର୍ଘ ୧୦ ବର୍ଷ ପରେ ଲୋକସଭାରେ ଦୃଢ଼ ବିରୋଧୀ ଦଳ ଦେଖିବାକୁ ମିଳିବ। ତେଣୁ ବିରୋଧୀ ଦଳଗୁଡିକ ସଂସଦରେ ନିଟ୍ ପରୀକ୍ଷା ବିଭ୍ରାଟ, ଅଗ୍ନିବୀର ଯୋଜନା, ଷ୍ଟକ ମାର୍କେଟ ଘୋଟାଲା ଭଳି ବିଭିନ୍ନ ପ୍ରସଙ୍ଗ ଉଠାଇ ସରକାରଙ୍କୁ ଘେରିବାକୁ ଯୋଜନା ପ୍ରସ୍ତୁତ କରିସାରିଛନ୍ତି ।
