ନୂଆଦିଲ୍ଲୀ,୨୮/୦୯: ୨୦୪୭ ସୁଦ୍ଧା ବିକଶିତ ରାଷ୍ଟ୍ର ହେବା ପାଇଁ ଲକ୍ଷ୍ୟ ରଖିଛି ଭାରତ । ଉକ୍ତ ଲକ୍ଷ୍ୟକୁ ହାସଲ  କରିବା ପାଇଁ ୨୦୪୭ ସୁଦ୍ଧା ଦେଶରେ ବିମାନବନ୍ଦର ସଂଖ୍ୟାକୁ  ୩୫୦ରେ ପହଞ୍ଚାଇବାକୁ ଯୋଜନା ରହିଛି । ଏହା ମାଧ୍ୟମରେ  ପର୍ଯ୍ୟଟନ କ୍ଷେତ୍ରକୁ ବଳ ମିଳିବ ବୋଲି କହିଛନ୍ତି କେନ୍ଦ୍ର ବେସାମରିକ ବିମାନ ଚଳାଚଳ ମନ୍ତ୍ରୀ କିଞ୍ଜାରାପୁ ରାମମୋହନ ନାଇଡୁ । ବିଜ୍ଞାନ ଭବନଠାରେ ବିଶ୍ୱ ପର୍ଯ୍ୟଟନ ଦିବସ ଉପଲକ୍ଷେ  ଆୟୋଜିତ ଏକ କାର୍ଯ୍ୟକ୍ରମରେ ଯୋଗ ଦେଇ କେନ୍ଦ୍ରମନ୍ତ୍ରୀ  କହିଛନ୍ତି ଯେ, ଦୁର୍ଗମ ଅଞ୍ଚଳଗୁଡ଼ିକୁ ବିମାନ ସେବା ସହିତ  ଯୋଡ଼ିବା ପାଇଁ ମନ୍ତ୍ରାଳୟ କାର୍ଯ୍ୟ କରୁଛି ।   

କେନ୍ଦ୍ରମନ୍ତ୍ରୀ କହିଛନ୍ତି ଯେ, ସରକାର ଘରୋଇ  କନେକ୍ଟିଭିଟିକୁ ବଢ଼ାଇବା ଉପରେ ଜୋର ଦେଉଛନ୍ତି ।  ଏହାସହିତ ବିମାନବନ୍ଦରଗୁଡ଼ିକରେ ବିଦେଶୀ ପର୍ଯ୍ୟଟକଙ୍କୁ  ଉତ୍ତମ ସେବା ଓ ଆତିଥେୟତା ପ୍ରଦାନ ଉପରେ ଗୁରୁତ୍ୱ ଦିଆଯାଉଛି । କାରଣ ଦେଶର ପ୍ରବେଶପଥ ହେଉଛି  ବିମାନବନ୍ଦର । ସେ ସୂଚନା ଦେଇଛନ୍ତି ଯେ, ଏବେ ଭାରତରେ  ୧୫୭ଟି ବିମାନବନ୍ଦର ରହିଛି । କିନ୍ତୁ ଆଗାମୀ ୨୦ରୁ ୨୫  ବର୍ଷ ମଧ୍ୟରେ ଏହା ୩୫୦କୁ ବୃଦ୍ଧି ପାଇବ ।