ନୂଆଦିଲ୍ଲୀ, ୨୮/୯ :  ବିବାଦ ଘେରରେ ଅନଲାଇନ ବୁକିଂ ଓ୍ବେବସାଇଟ ବୁକ ମାଇ ଶୋ । ଆସନ୍ତା ବର୍ଷ ଜାନୁଆରୀରେ ହେବାକୁ ଥିବା ଲୋକପ୍ରିୟ ବ୍ରିଟିଶ ରକ ବ୍ୟାଣ୍ଡ କୋଲ୍ଡପ୍ଲେ କନ୍ସର୍ଟର ଟିକେଟ କଳାବଜାରୀକୁ ନେଇ ବୁକ ମାଇ ଶୋ ଏବେ ବିବାଦ ଘେରରେ । ଏହି କନ୍ସର୍ଟକୁ ନେଇ ଲୋକଙ୍କ ମଧ୍ୟରେ ଏଭଳି କ୍ରେଜ କି ବୁକିଂ ଓ୍ବିଣ୍ଡୋ ଖୋଲିବା ମାତ୍ରକେ ସୋଲ୍ଡ ଆଉଟ ହୋଇଯାଇଥିଲା । କୋଲ୍ଡପ୍ଲେ କନ୍ସର୍ଟର ଟିକଟ ନେବା ଲାଗି ଲୋକଙ୍କ ଦିଓ୍ବାନା ଦେଖି ଟିକେଟର କଳାବଜାରୀ ଆରମ୍ଭ ହୋଇଯାଇଛି । ଏବେ ଏହି ଟିକେଟ କଳାବଜାରୀକୁ ନେଇ ବୁକ ମାଇ ଶୋ ବିବାଦ ଘେରରେ । ମୁମ୍ବାଇ ପୋଲିସ ବୁକ ମାଇ ଶୋର ସିଇଓକୁ ସମନ ଜାରି କରିଛି ।

କୋଲ୍ଡପ୍ଲେ କନ୍ସର୍ଟ ଟିକେଟର କଳାବଜାରୀ ମାମଲାରେ ମୁମ୍ବାଇ ପୋଲିସ ବୁକ୍ ମାଇ ଶୋର ସିଇଓ ଏବଂ କୋ- ଫାଉଣ୍ଡର ଆଶିଷ ହେମରାଜାନୀଙ୍କୁ ସମନ ଜାରି କରିଛି । ଟିକେଟର କଳାବଜାରୀ କରିବା ଅଭିଯୋଗରେ ଆଶିଷ ହେମରାଜାନୀଙ୍କ ବିପକ୍ଷରେ ସମନ ଜାରି କରାଯାଇଛି । ପ୍ରକାଶ ଯେ, ବୁକ ମାଇ ଶୋର ସିଇଓଙ୍କ ଉପରେ ଅଭିଯୋଗ ଲାଗିଛି କି ସେ କୋଲ୍ଡପ୍ଲେ କନ୍ସର୍ଟର ଟିକେଟ ମହଙ୍ଗା ମୂଲ୍ୟରେ ବିକ୍ରି କରିଛନ୍ତି । ଯେଉଁ ଟିକେଟର ମୂଲ୍ୟ ୨୫୦୦ଟଙ୍କା ଅଟେ ତାକୁ କଳାବଜାରୀ କରି ୩ଲକ୍ଷ ଟଙ୍କାରେ ବିକ୍ରି କରାଯାଇଛି । ପ୍ରକାଶ ଯେ, ଆସନ୍ତା ବର୍ଷ ଜାନୁଆରୀ ୯ରୁ ୧୨ ତାରିଖ ପର୍ଯ୍ୟନ୍ତ ବ୍ରିଟିଶ ରକ ବ୍ୟାଣ୍ଡ କୋଲ୍ଡପ୍ଲେଙ୍କ ମୁମ୍ବାଇରେ କନ୍ସର୍ଟ ହେବାକୁ ଅଛି ।