ନୂଆଦିଲ୍ଲୀ,୨୮।୯: ଜମ୍ମୁ-କଶ୍ମୀରରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ନିର୍ବାଚନୀ ରାଲି। ଶନିବାର ଏକ ବିଶାଳ ରାଲିକୁ ସମ୍ବୋଧିତ କରି ମୋଦି କହିଛନ୍ତି, ୨୦୧୬ରେ ଆଜିର ରାତିରେ ହୋଇଥିଲା ସର୍ଜିକାଲ ଷ୍ଟ୍ରାଇକ୍। ଭାରତ ଦୁନିଆକୁ କହି ଦେଇଥିଲା, ଏହା ହେଉଛି ନୂତନ ଭାରତ, ଯାହାକି ଘରେ ପଶି ମାରିଥାଏ। ସେ କଂଗ୍ରେସ ଉପରେ ସର୍ଜିକାଲ ଷ୍ଟ୍ରାଇକ୍ ନେଇ ପ୍ରମାଣ ମାଗିଥିବା ଅଭିଯୋଗ ଆଣିଛନ୍ତି। ଏହା ସହ କହିଛନ୍ତି, କଂଗ୍ରେସ ପାକିସ୍ତାନ ଭଳି କଥା କହୁଛି।’
ପ୍ରଧାନମନ୍ତ୍ରୀ କଂଗ୍ରେସ, ନ୍ୟାସନାଲ କନଫ୍ରେନ୍ସ(ଏନ୍ସି) ଓ ପିଡିପିକୁ ଟାର୍ଗେଟ କରି କହିଛନ୍ତି, ଜମ୍ମୁ-କଶ୍ମୀରର ଲୋକ ଏହି ତିନି ପରିବାରର ରାଜନୀତିରେ ଖୁବ୍ ବ୍ୟତିବ୍ୟସ୍ତ ହୋଇପଡିଛନ୍ତି। ସେ କହିଛନ୍ତି, ଏଠାର ଲୋକ ଏବେ ଆତଙ୍କବାଦ, ବିଚ୍ଛିନବାଦୀ ଓ ଦଙ୍ଗା ଚାହାନ୍ତି ନାହିଁ। ସେମାନେ ନିଜର ପିଲାଙ୍କ ପାଇଁ ଭଲ ଭବିଷ୍ୟତ ଓ ଶାନ୍ତି ଚାହାନ୍ତି। ଏହି କାରଣରୁ ଲୋକ ସରକାରଙ୍କୁ ସମର୍ଥନ ଦେଉଛନ୍ତି।’
ପ୍ରଧାନମନ୍ତ୍ରୀ ମୋଦି ଗତ ଦୁଇଟି ପର୍ଯ୍ୟାୟରେ ପ୍ରବଳ ମତଦାନର ଉଲ୍ଲେଖ କରି କହିଛନ୍ତି, ଏଥିରୁ ସ୍ପଷ୍ଟ ଜଣାପଡୁଛି ଯେ, ଜମ୍ମୁ-କଶ୍ମୀରର ଜନତାଙ୍କ ମୁଡ୍ ବିଜେପି ପକ୍ଷରେ ରହିଛି। ସେ ପ୍ରତିଶ୍ରୁତି ଦେଇଛନ୍ତି ରାଜ୍ୟରେ ବିଜେପିର ପୂର୍ଣ୍ଣ ବହୁମତ ସରକାର ଗଠନ ହେବାକୁ ଯାଉଛି।