କୋଚି,୨୮/୦୯: କେରଳରେ ମଙ୍କିପକ୍ସ(ଏମ୍ପକ୍ସ)ର ଦ୍ୱିତୀୟ ରୋଗୀ ଚିହ୍ନଟ ହୋଇଛନ୍ତି । ୨୯ ବର୍ଷୀୟ ଯୁବକଜଣକ ନିକଟରେ ୟୁଏଇରୁ କେରଳର ଏର୍ଣ୍ଣାକୁଲମ୍କୁ ଫେରିଥିଲେ । ତାଙ୍କୁ ପ୍ରବଳ ଜ୍ୱର ଥିଲା । ନମୂନା ପରୀକ୍ଷଣରୁ ତାଙ୍କୁ ଏମ୍ପକ୍ସ ହୋଇଥିବା ସ୍ପଷ୍ଟ ହୋଇଛି ।
ରାଜ୍ୟର ସ୍ୱାସ୍ଥ୍ୟ ବିଭାଗ ଅନୁସାରେ, ରୋଗୀ କୋଚିର ଏକ ଘରୋଇ ହସ୍ପିଟାଲରେ ଚିକିତ୍ସିତ ହେଉଥିବାବେଳେ ତାଙ୍କର ସ୍ୱାସ୍ଥ୍ୟବସ୍ଥା ସ୍ଥିର ରହିଛି । ରୋଗୀଙ୍କର ନମୂନାକୁ ପୁନେର ନ୍ୟାସନାଲ ଇନ୍ଷ୍ଟିଚ୍ୟୁଟ୍ ଅଫ୍ ଭାଇରୋଲୋଜିକୁ ଜିନୋମ୍ ସିକ୍ୱେନ୍ସିଂ ଲାଗି ପଠାଯାଇଛି । ସେଥିରୁ ସେ ଏମ୍ପକ୍ସର ବିପଜ୍ଜନକ ଓ ଶୀଘ୍ର ବ୍ୟାପୁଥିବା କ୍ଲେଡ୍-୧ବି ଷ୍ଟ୍ରେନ୍ ଦ୍ୱାରା ସଂକ୍ରମିତ କି ନାହିଁ ତାହା ଜଣାପଡିବ । ଭାରତରେ ଏହା ମଙ୍କିପକ୍ସର ତୃତୀୟ ମାମଲା ।
ଗତ ୧୮ ତାରିଖରେ ଭାରତରେ ଏମ୍ପକ୍ସର ଦ୍ୱିତୀୟ ଓ କ୍ଲେଡ୍-୧ ବି ଷ୍ଟ୍ରେନ୍ର ପ୍ରଥମ ରୋଗୀ ଚିହ୍ନଟ ହୋଇଥିଲେ । ୩୮ ବର୍ଷୀୟ ସଂକ୍ରମିତ ରୋଗୀ ୟୁଏଇରୁ କେରଳର ମଲପ୍ପୁରମ୍ ଫେରିଥିଲେ । ସେ ଏକ ସରକାରୀ ହସ୍ପିଟାଲରେ ଚିକିତ୍ସିତ ହେଉଥିବାବେଳେ ତାଙ୍କର ସ୍ୱାସ୍ଥ୍ୟବସ୍ଥା ସ୍ଥିର ରହିଛି । ତା’ ପୂର୍ବରୁ ଗତ ୯ ତାରିଖରେ ହରିଆଣାର ହିସାରରେ ଦେଶର ପ୍ରଥମ ମଙ୍କିପକ୍ସ ମାମଲା ସାମ୍ନାକୁ ଆସିଥିଲା।
