ନୂଆଦିଲ୍ଲୀ: କଂଗ୍ରେସର ରାଷ୍ଟ୍ରୀୟ ଅଧ୍ୟକ୍ଷ ମଲ୍ଲିକାର୍ଜୁନ ଖଡ଼ଗେ ଏବଂ ତାଙ୍କ ପରିବାର ସଦସ୍ୟଙ୍କ ବିରୋଧରେ କର୍ଣ୍ଣାଟକ ଲୋକାୟୁକ୍ତଙ୍କ ନିକଟରେ ଅଭିଯୋଗ ହୋଇଛି । ଠକେଇ, ଦସ୍ତାବିଜରେ ହେରଫେର, ଚକ୍ରାନ୍ତ କରି ସରକାରୀ ଜମି ହଡ଼ପ କରିବା ଏବଂ ସାର୍ବଜନୀନ ସ୍ଥାନକୁ ବ୍ୟକ୍ତିଗତ ଭାବରେ ବିନିଯୋଗ କରିବା ନେଇ ଖଡ଼ଗେ ଏବଂ ତାଙ୍କ ପରିବାର ସଦସ୍ୟଙ୍କ ବିରୋଧରେ ଅଭିଯୋଗ କରିଛନ୍ତି ବିଜେପି ନେତା ଏନଆର ରମେଶ ।
ଏହା ସହ ଖଡ଼ଗେଙ୍କ ବିରୋଧରେ, ସରକାରୀ ସଂପତ୍ତିକୁ ବେଆଇନ୍ ଭାବରେ ଅନୁମତି ଦେବା ଏବଂ ଜମି ଆବଣ୍ଟନକୁ ନେଇ ଆଶଙ୍କା ଥିବା ନେଇ ଏନଆର ରମେଶ ଅଭିଯୋଗ କରିଛନ୍ତି । ରେମେଶ ଯେଉଁସବୁ ଅଭିଯୋଗ କରିଛନ୍ତି ସେଥିମଧ୍ୟରୁ ଖଡ଼ଗେ, ସିଦ୍ଧାର୍ଥ ବିହାର ଟ୍ରଷ୍ଟକୁ ୫ ଏକର ଜମି ପ୍ରଦାନ କରିଥିବା ନେଇ ଦାବିକୁ ନେଇ ଚର୍ଚ୍ଚା ଜୋର ଧରିଛି । ଏହି ଟ୍ରଷ୍ଟ ତାଙ୍କ ପରିବାର ସହ ଜଡ଼ିତ ।
ମଲ୍ଲିକାର୍ଜୁନ ଖଡ଼ଗେ, କର୍ଣ୍ଣାଟକର ମନ୍ତ୍ରୀ ପ୍ରିୟଙ୍କା ଏମ୍ ଖଡ଼ଗେ, ରାହୁଲ ଏମ ଖଡ଼ଗେ, ରାଧାବାଇ ଏମ ଖଡ଼ଗେ, ରାଧାକ୍ରିଷ୍ଣା, କର୍ଣ୍ଣାଟକର ମନ୍ତ୍ରୀ ଏମବି ପାଟିଲ ଏବଂ ଆଇଏଏସ୍ ଅଧିକାରୀ ଡ. ଏସ୍ ସେଲଭାକୁମାରଙ୍କ ବିରୋଧରେ ଅଭିଯୋଗ କରିଛନ୍ତି ଏନଆର ରମେଶ । ନିଜ ଦାବିକୁ ସତ୍ୟ ପ୍ରମାଣିତ କରିବା ଲାଗି ବିଜେପି ନେତା ରମେଶ ୩୯୪ ପୃଷ୍ଠା ସମ୍ବଳିତ ଦସ୍ତାବିଜ ମଧ୍ୟ ଲୋକୟୁକ୍ତଙ୍କ ପାଖରେ ଦାଖଲ କରିଛନ୍ତି ।
ଅଭିଯୋଗ ଅନୁସାରେ, ଦୁଇଟି ଭିନ୍ନ ସରକାରୀ ଏଜେନ୍ସି ବେଙ୍ଗାଲୁରୁ ଉନ୍ନୟନ ପ୍ରାଧିକରଣ (ବିଡିଏ) ଏବଂ କେଆଇଏଡିବି ଦ୍ବାରା ୨୦୧୪ରେ ସିଦ୍ଧାର୍ଥ ବିହାର ଟ୍ରଷ୍ଟକୁ ଜମି ଆବଣ୍ଟିତ ହୋଇଛି । ତେବେ ଏହି ଜମି ପୂର୍ଣ୍ଣ ଅନୁମତି ବିନା ଆବଣ୍ଟିତ ହୋଇଥିବା ବେଳେ ଏହାର ପୁଙ୍ଖାନୁପୁଙ୍ଖ ତଦନ୍ତ କରାଯାଉ ବୋଲି ଦାବି କରିଛନ୍ତି ବିଜେପି ନେତା ଏନଆର ରମେଶ ।
