ମାଲକାନଗିରି,୧୧/୬ : ମାଲକାନଗିରି ବିଏସଏଫ ଯବାନଙ୍କୁ ମିଳିଛି ଏକ ବଡ଼ ସଫଳତା । ମାଓଗଡ଼ ତୁଳସୀ ପାହାଡ଼ରେ ଯବାନଙ୍କୁ ଟାର୍ଗେଟ କରି ଲୁଚାଇ ରଖିଥିବା ବମ ବିସ୍ପୋରକ ଦ୍ରବ୍ୟକୁ ଜବତ କରି ମାଓ ବିସ୍ଫୋରଣ ଯୋଜନାକୁ ପଣ୍ଡ କରିଦେଇଛନ୍ତି ସୀମା ସୁରକ୍ଷା ବାହିନୀ। ମାଲକାନଗିରି ଜିଲ୍ଲା ମାଥିଲି ଥାନାସ୍ଥ ଟେମୁରୁପାଲୀ ପଞ୍ଚାୟତ ମାଓଗଡ଼ ଭାବେ ପରିଚିତ ତୁଳସୀ ପାହାଡ଼ କିରିମେଟି ଜଙ୍ଗଲରେ ମାଓବାଦୀଙ୍କ ଡମ୍ପ ଥିବାର ବିଶ୍ବସ୍ତ ସୂତ୍ରରୁ ଖବରପାଇଥିଲେ ।
ପରେ ଆଜି ସକାଳେ ସେ ପାହାଡ଼କୁ ସର୍ଚ୍ଚ ଅପରେସନରେ ବିଏସଏଫ ଯବାନମାନେ ଯାଇଥିଲେ । ଜଙ୍ଗଲରେ ସର୍ଚ୍ଚ ଅପରେସନବେଳେ କିରିମେଟି ପାହାଡ଼ର ଏକ ପଥର ସୁଡଙ୍ଗରେ ଏକ ଡମ୍ପକୁ ଠାବ କରିଥିଲେ । ଯାଞ୍ଚ କରିବାରୁ ସେଥିରୁ ଟିଫିନବମ, ଲ୍ୟାଣ୍ଡମାଇନ ବ୍ୟବହୃତ ତାର, ବିସ୍ଫୋରକ ଦ୍ରବ୍ୟ, ସୋଲାର ପ୍ଲେଟ, ବ୍ୟାଗ, ମାଓ ପୋଷାକ ଆଦି ମାଓ ସାମଗ୍ରୀ ଜବତ କରିଛନ୍ତି । ସୂଚନାଯୋଗ୍ୟ ଯେ, ତୁଳସୀ ପାହାଡ଼ଟି ଛତିଶଗଡ଼ ରାଜ୍ୟ ସୀମାନ୍ତକୁ ଲାଗି ରହିଥିବାରୁ ଏହା ଛତିଶଗଡ଼ ଦରଭା ମାଓ ଡିଭିଜନର କାମ ହୋଇଥାଇପାରେ ବୋଲି ସନ୍ଦେହ କରାଯାଉଛି ।