ସମ୍ବଲପୁର,୨୧/୦୬: ଆଗୁଆ ମୌସୁମୀ ପୂର୍ବାନୁମାନ ପାଇଁ ଏଥର ଛତିଶଗଡ଼ ନିର୍ଦ୍ଧାରିତ ସମୟର ୧୫ ଦିନ ପୂର୍ବରୁ କଲମାର ଗେଟ୍ ଖୋଲିବା ପ୍ରକ୍ରିୟା ଆରମ୍ଭ କରିଥିଲା । ଗତ ୮ ତାରିଖ ସୁଦ୍ଧା ୯ଟି ଗେଟ୍ ଖୋଲିଥିଲା । ହେଲେ ମୌସୁମୀ ଉଭାନ ମାରିବା ପରେ ଏବେ ପୁଣି ଗେଟ୍ ବନ୍ଦ କରିବା ଆରମ୍ଭ କରିଛି । କେବଳ ଗୋଟିଏ ଗେଟ୍କୁ ମାତ୍ର ୮ ଇଞ୍ଚ ଖୋଲା ରଖି ବାକି ସବୁ ବନ୍ଦ କରିଦେଇଛି । ଖାଲି ସେତିକି ନୁହେଁ, କଲ୍ମାର ତଳମୁଣ୍ଡରେ ଏକ ଶିଳ୍ପ ସଂସ୍ଥା ପାଇଁ ନିର୍ମିତ ଇନଟେକ୍ ୱେଲ୍ରୁ କ୍ରମାଗତ ପାଣି ଯୋଗାଣ ହେଉଛି । ଫଳରେ ଓଡ଼ିଶାକୁ ଜଳପ୍ରବାହ ଏକପ୍ରକାର ଠପ୍ ହୋଇଯାଇଛି । ଗୁରୁବାର ହୀରାକୁଦକୁ ମାତ୍ର ୮୧ କ୍ୟୁସେକ୍ ପାଣି ପ୍ରବେଶ କରୁଛି । ଫଳରେ ଦିନକ ପୂର୍ବରୁ ହୀରାକୁଦ ପାୱାର୍ ସିଷ୍ଟମ୍ରୁ ଶହେରୁ ଉଦ୍ଧ୍ୱର୍ ମେଗାୱାଟ୍ ବିଦ୍ୟୁତ୍ ଉତ୍ପାଦନ ହେଉଥିବା ବେଳେ ଏହା ୩୨ ମେଗାୱାଟ୍କୁ ଖସି ଆସିଛି ।
ନିୟମ ଅନୁଯାୟୀ ପ୍ରତିବର୍ଷ ଜୁନ୍ ୧୫ରୁ ଏହି ସମସ୍ତ ବନ୍ଧ ଓ ବ୍ୟାରେଜ୍ର ଗେଟ୍ ଖୋଲିଥାଏ । ହେଲେ ଏଥର ଆଗୁଆ ମୌସୁମୀ ପାଇଁ କଲମା ଜୁନ୍ ୧ରୁ ହିଁ ଗେଟ୍ ଖୋଲିବା ପ୍ରକ୍ରିୟା ଆରମ୍ଭ କରିଥିଲା । ୩ଟି ପର୍ଯ୍ୟାୟରେ ୮ ତାରିଖ ସୁଦ୍ଧା ମୋଟ୍ ୯ଟି ଗେଟ୍ ଖୋଲିଥିଲା । ସମସ୍ତ ଗେଟ୍କୁ ୮ ଇଞ୍ଚ ଲେଖାଏଁ ଖୋଲା ଯାଇଥିଲା । ଏବେ ବିଳମ୍ବିତ ମୌସୁମୀକୁ ଦୃଷ୍ଟିରେ ରଖି ଗୋଟିଏ ଗେଟ୍କୁ ଛାଡ଼ି ଅନ୍ୟ ସବୁ ଗେଟ୍ ବନ୍ଦ କରି ଦେଇଛି । ଏବେ ହୀରାକୁଦ ଜଳସ୍ତର ୬୦୦.୪୫ ଫୁଟ୍ ରହିଛି । ଗୁରୁବାରଠାରୁ ଶାସନ ଏବଂ ସମ୍ବଲପୁର ଡିଷ୍ଟ୍ରିବ୍ୟୁଟାରି କେନାଲ ଖୋଲିବା ପରେ ଜଳସ୍ତର ଆହୁରି ହ୍ରାସ ପାଇପାରେ । ଫଳରେ ବିଦ୍ୟୁତ୍ ଉତ୍ପାଦନ ପ୍ରଭାବିତ ହେବାର ଆଶଙ୍କା ରହିଛି ।
