ଉମରକୋଟ,୨୮/୦୯: ହାତୀ ଆକ୍ରମଣରେ ପ୍ରାଣ ହରାଇଲେ ବ୍ୟକ୍ତି । ନବରଙ୍ଗପୁର ଜିଲ୍ଲା ରାଇଘର ବ୍ଳକ ସୀମାନ୍ତ ପଡୋଶୀ ଛତିଶଗଡ ରାଜ୍ୟର ଗୋରିଆବନ୍ଦ ଜିଲ୍ଲା ଫିଙ୍ଗେଶ୍ୱର ଗ୍ରାମ ସୋରିଦଖୁର୍ଡ ଜଙ୍ଗଲ ନିକଟରେ ଏଭଳି ଅଘଟଣ ଘଟିଛି । 

ସୂଚନା ମୁତାବକ, ଭୁଜିଆପାରାର ଜଣେ ବ୍ୟକ୍ତି ସୋରିଦଖୁର୍ଡ ଜଙ୍ଗଲ ଆଡକୁ ଶୁକ୍ରବାର ଅପରାହ୍ନ ୪ଟା ସମୟରେ ମୂଷା ଖୋଜିବାକୁ ଯାଉଥିଲେ । ଏହି ସମୟରେ ତିନିଟି ଜଙ୍ଗଲୀ ହାତୀ ଉକ୍ତ ବ୍ୟକ୍ତିକୁ ଦଳି ଚକଟି ମାରିଦେଇଛନ୍ତି । ଏହି ଘଟଣା ସମ୍ପର୍କରେ ସ୍ଥାନୀୟଲୋକେ ଜାଣି ପୋଲିସ ଏବଂ ବନବିଭାଗକୁ ଖବର ଦେଇଥିଲେ । ଖବର ପାଇ ଫିଙ୍ଗେଶ୍ବର ବନବିଭାଗ ଏବଂ ପୋଲିସ  ଘଟଣା ସ୍ଥଳରେ ପହଞ୍ଚି ମୃତଦେହକୁ ଜବତ କରିଛି । ଏହା ସହ ମୃତକଙ୍କ ପରିବାରକୁ ସରକାରୀ ଆର୍ଥିକ ସହାୟତା ଯୋଗାଇବାକୁ ବନବିଭାଗ କହିଛି । ବର୍ତ୍ତମାନ ହାତୀର ଗତିବିଧି ଉପରେ ବନ ବିଭାଗ ନଜର ରଖିଥିବା ବେଳେ ତିନିଟି ହାତୀ ଏବେ ମହାସମୁନ୍ଦ ଆଡକୁ ଗତି କରିଛି ତେବେ ବନବିଭାଗ ଗ୍ରାମବାସୀଙ୍କୁ ସଚେତନ କରୁଛନ୍ତି ।