ରଗଡି,୨୦/୦୬: ଋତୁକୁ ନେଇ ଆସେ ଫଳ । ଖରା ଦିନ ସରି ଆସିଲା ବେଳକୁ ବଜାରରକୁ ପ୍ରବେଶ କରିଛି ଜାମୁକୋଳି । ବଜାରରେ ବର୍ତ୍ତମାନ ଆମ୍ବ, ପଣସ, ଲିଚୁ କୋଳି ରାଜ କରୁଥିବା ବେଳେ ଧୀରେ ଧୀରେ ସେହି ସ୍ଥାନରେ ଲୋକଙ୍କ ଆକର୍ଷଣ ପାଲଟିଛି ଜାମୁକୋଳି । ଗାଁ ହେଉକି ସହର ସମସ୍ତଙ୍କର ପ୍ରିୟ ଜାମୁକୋଳି ।
ଯାଜପୁର ଜିଲ୍ଲାର ବିଭିନ୍ନ ହାଟ, ବଜାରରେ ସହ ରାଜରାସ୍ତା କଡ଼ରେ ଜାମୁକୋଲିର ଆସର ଜମିଛି । ଏହି କୋଳିର ସ୍ୱାଦ ସହ ଉପକାରୀତା ରହିଥିବାରୁ ବଜାରର ବିଭିନ୍ନ ଛକ ଆଦି ସ୍ଥାନରେ ଏହି କୋଳି କିଣିବା ପାଇଁ ଭିଡ଼ ଲାଗିଥିବାର ଦେଖିବାକୁ ମିଳୁଛି । ମହିଳା ଓ ପୁରୁଷ ବ୍ୟବସାୟୀମାନେ ରାସ୍ତା ପାଶ୍ୱର୍ରେ ଟାକେଇରେ ଜାମୁକୋଳି ଧରି ବିକ୍ରି କରୁଛନ୍ତି । ସେପଟେ ବଜାରରେ ଫଳର ଦାମ୍ ଆକାଶ ଛୁଆଁ ରହିଛି। ନୂଆ କରି ବଜାରକୁ ଆସିଥିବାରୁ ଏବେ ଏହା କିଲୋ ପିଛା ୧୨୦ ଟଙ୍କାରେ ବିକ୍ରି ହେଉଛି । ବହୁ କଷ୍ଟରେ ଜାମୁକୋଳି ସଂଗ୍ରହ କରି ଆଣୁଥିବାରୁ ଅଢେଇଶ ଗ୍ରାମରୁ କମ୍ ଦେବାକୁ ରାଜି ହେଉ ନାହାନ୍ତି ବ୍ୟବସାୟୀମାନେ ।
ଛୋଟ ପିଲାଙ୍କ ଠାରୁ ଆରମ୍ବ କରି ବୟସ୍କକଙ୍କର ଜାମୁକୋଳି ପ୍ରତି ଭାରି ଆଦର ରହିଛି । ଜାମୁକୋଳି ବ୍ୟବସାୟୀଙ୍କୁ ରାସ୍ତା କଡ଼ରେ ଦେଖିଲା ମାତ୍ରେ ବାଟୋଇ ଟିଏ ଅଟକି ଯାଇ ଜାମୁକୋଳି କିଣି ନେଉଛନ୍ତି । ଏବେ ନୂଆ କରି ବଜାରକୁ ଆସିଥିବାରୁ ଗ୍ରାହକଙ୍କ କୋଳି ପ୍ରତି ଆଗ୍ରହ ରହିଛି । ବର୍ଷାରେ କୋଳି ପାଚୁ ଥିବାରୁ, ଯେତେ ଅଧିକ ବର୍ଷା ହୁଏ କୋଳି ସେତିକି ମାତ୍ରାରେ ପାଚିଥାଏ । ବର୍ଷାର ଶେଷ ବେଳକୁ ଏହା ଆଉ ଦେଖିବାକୁ ମିଳେ ନାହିଁ । ଚଳିତ ବର୍ଷ ଏହା ପ୍ରଥମ କରି ବଜାରକୁ ଆସିଥିବାରୁ ଏହାର ଦାମ୍ ଟିକେ ଅଧିକ ରହିଛି । ଜଣେ ବୟସ୍କଙ୍କ ମତରେ ଜାମୁକୋଳି ଦେହ ପାଇଁ ହିତକାରକ । ଏଥିରେ ରୋଗ ପ୍ରତିରୋଧକ ଶକ୍ତି ଥିବାରୁ ଏହା ଦେହ ପାଇଁ ଉପଯୋଗୀ ହୋଇଥାଏ । ମଧୁମେହ ରୋଗ ପାଇଁ ଏହା ଏକ ବଡ଼ ଲାଭଦାୟକ ।
ଜାମୁକୋଳି କିଣୁଥିବା ଗ୍ରାହକଙ୍କୁ ପଚାରିବାରୁ ସେ କହିଥିଲେ ଯେ, ବର୍ଷକୁ ଥରେ ମାତ୍ର ଏହି କୋଳି ଖାଇବାର ସୁଯୋଗ ମିଳିଥାଏ । ଗାଁ ଗହଳି ଗଲେ ମାଗଣାରେ ମିଳିଯାଏ । ଏଠାରେ କିନ୍ତୁ କିଣି ଖାଇବାକୁ ପଡ଼ୁଛି । ଏବେ ଦାମ୍ ଟିକିଏ ଅଧିକ୍ ରହୁଛି । ବ୍ୟବସାୟୀଙ୍କୁ ପଚାରିବାରୁ ସେ କହିଥିଲେ ଯେ, ଆବଶ୍ୟକ ମୁତାବକ କୋଳି ମିଳୁ ନାହିଁ । ତେଣୁ ଅନ୍ୟ ସ୍ଥାନରୁ କୋଳି ଆଣି ବିକିବା ପାଇଁ ପଡୁଛି । କିଣା ଦାମଠାରୁ ଏଠାରେ ଟିକିଏ ଅଧୁକରେ ବିକିବା ପାଇଁ ପଡୁଛି । ବର୍ଷା ଶେଷ ବେଳକୁ ଏହା ଆଉ ନଥୁବ । ବର୍ତ୍ତମାନ କେନ୍ଦୁଝର ଜିଲ୍ଲାରୁ ଅଧିକାଂଶ କୋଳି ଆମଦାନୀ ହେଉଛି । ନୂଆ ହୋଇଥିବାରୁ କୋଳି ଅଧିକ ବିକ୍ରି ହେଉଛି । ବର୍ଷା ହେଲେ ଏହି କୋଳି ପାଚେ ବୋଲି ବ୍ୟବସାୟୀ ପ୍ରକାଶ କରିଛନ୍ତି।
