ମୁମ୍ବାଇ ୩୦/୧୦: ଖୁବ୍ଶୀଘ୍ର ଫିଲ୍ମ ‘ଗ୍ରାଉଣ୍ଡ୍ ଜିରୋ’ ଜରିଆରେ ସିନେ ପରଦାରେ ନଜର ଆସିବେ ଅଭିନେତ୍ରୀ ସାଇ ତମନକର । ଏଥିରେ ସେ ଇମ୍ରାନ ହାଶମିଙ୍କ ସହ ସ୍କ୍ରିନ୍ ଶେୟାର କରିବେ । ଫିଲ୍ମ ନିର୍ମାଣ କାମ ଶେଷ ହୋଇଛି । ଏହାକୁ ସକାରାତ୍ମକ ପ୍ରତିକ୍ରିୟା ମିଳିଥିବା ସାଇ କହିଛନ୍ତି । ରିଲିଜ୍କୁ ସେ ଉତ୍ସାହର ସହ ଅପେକ୍ଷା କରିଛନ୍ତି ।
ଇମ୍ରାନ ହାଶମିଙ୍କ ସହ କାମ କରିବାର ଖୁସି ଜାହିର କରି ସେ କହିଛନ୍ତି, ଖୁବ୍ କମ୍ ନିର୍ଦ୍ଦେଶକ ସେମାନଙ୍କ ଅଭିନୟ ପ୍ରତିଭାର ପୂର୍ଣ୍ଣ ପ୍ରଦର୍ଶନ କରିଛନ୍ତି, ତନ୍ମଧ୍ୟରେ ହାଶମି ଅନ୍ୟତମ । ସାଇ ଏବେ ଟିକିଏ ହଟ୍କେ ଭୂମିକା ଚୟନ କରୁଛନ୍ତି । ତେଣୁ ‘ଗ୍ରାଉଣ୍ଡ୍ ଜିରୋ’ରେ ନିଜକୁ ସାମିଲ କରି ସେ ବହୁତ ଖୁସି । ତେବେ ଅପ୍କମିଙ୍ଗ ଫିଲ୍ମ ସମେତ ବ୍ୟକ୍ତିଗତ ଜୀବନକୁ ନେଇ ଏବେ ଖବରକୁ ଆସିଛନ୍ତି ସାଇ । ନିକଟରେ ସେ ନିଜର ଦୀର୍ଘଦିନର ବୟଫ୍ରେଣ୍ଡ୍ ଅନିଶ ଜୋଗଙ୍କ ସହ ବ୍ରେକ୍ଅପ୍ ଘୋଷଣା କରିଛନ୍ତି । ନିଜ ସୋସିଆଲ ମିଡିଆ ହ୍ୟାଣ୍ଡେଲ୍ରୁ ଅନିଶଙ୍କ ସହ ସବୁ ଫଟୋ ହଟାଇବା ପରେ ଉଭୟଙ୍କ ବ୍ରେକ୍ଅପ ଚର୍ଚ୍ଚା ଜୋର ଧରିଥିଲା । ଆପୋସ ବୁଝାମଣାରେ ବ୍ରେକ୍ଅପ ହୋଇଥିବା ସାଇ ଏକ ସାକ୍ଷାତକାରରେ ସ୍ପଷ୍ଟ କରିଛନ୍ତି ।
ତେବେ ଏହି ନିଷ୍ପତ୍ତି ଅତ୍ୟନ୍ତ କଷ୍ଟକର ଥିଲା ବୋଲି ମଧ୍ୟ କହିଛନ୍ତି । ଅନିଶଙ୍କୁ ଡେଟ୍ କରିବା ପୂର୍ବରୁ ସେ ୨୦୧୩ ମସିହାରେ ଭିଜୁଆଲ ଇଫେକ୍ଟ ଆର୍ଟିଷ୍ଟ୍ ଆମେ ଗୋସଭିଙ୍କୁ ବିବାହ କରିଥିଲେ । କିନ୍ତୁ ୨୦୧୫ରେ ଉଭୟଙ୍କର ବିଚ୍ଛେଦ ହୋଇଥିଲା । ନିକଟରେ ଥ୍ରିଲର୍ ସିରିଜ୍ ‘ମାନବତ ମଡର୍ସ’ରେ ସାଇ ନଜର ଆସିଥିଲେ ।
