ଜୟପୁର/କୋରାପୁଟ, ୩୦/୧୦ : କଫି ଏବଂ ଗୋଲମରିଚ ଭଳି ଅଳେଇଚ ଚାଷ ପାଇଁ ବେଶ ଅନୁକୂଳ କୋରାପୁଟର ଜଳବାୟୁ । ବର୍ଷକୁ ଏକର ପିଛା ପ୍ରାୟ ୨ ଲକ୍ଷ ଟଙ୍କା ପର୍ଯ୍ୟନ୍ତ ଲାଭ ମିଳିପାରୁଛି । କଫି ବଗିଚାର ଛାଇ ଜାଗାରେ ହିଁ ଏହି ଚାଷ ହେଉଛି । ଏଥିଲାଗି ଅଧିକରୁ ଅଧିକ ଚାଷୀ ଅଳେଇଚ ଚାଷ ପ୍ରତି ମନ ବଳାଇବା ଦରକାର । କେବଳ ସରକାରୀ ପ୍ରୋତ୍ସାହନ ମିଳିପାରିଲେ, ଜିଲ୍ଲାର ଚାଷୀମାନେ ଏହି ଚାଷ କରି ବେଶ ସ୍ୱାବଲମ୍ବୀ ହୋଇପାରିବେ ବୋଲି କହିଛନ୍ତି ଜିଲ୍ଲାର ଅନ୍ୟତମ ବରିଷ୍ଠ କଫି ଓ ଗୋଲମରିଚ ଚାଷୀ ତଥା ବ୍ରାଉନ୍ଭ୍ୟାଲିର ଉଦ୍ୟୋଗୀ ସୁଜୟ ପ୍ରଧାନ । କୋରାପୁଟରୁ ୨୦ କିମି ଦୂରରେ ରହିଛି ଛୋଟାଗୁଡ଼ା ଗାଁର ବ୍ରାଉନ୍ଭ୍ୟାଲି କଫି ବଗିଚା । ଏହାର ଶାନ୍ତଶୀତଳ ପରିବେଶରେ ଏବେ ଗଛଗୁଡ଼ିକରେ ଭରି ରହିଛି ଅଳେଇଚ।
ସୁଜୟ କହିଛନ୍ତି, ୧୦ ବର୍ଷ ତଳେ ସେ ଏହାର କିଛି ଚାରା ଆଣିଥିଲେ । କଫି ଓ ଗୋଲମରିଚ ଚାଷରେ ଅଧିକ ବ୍ୟସ୍ତ ରହୁଥିବାରୁ ଅଳେଇଚ ଚାଷ ପ୍ରତି ସେତେଟା ଗୁରୁତ୍ୱ ଦେଇ ପାରିନଥିଲେ । ଗତ ୪ ବର୍ଷ ହେଲା ଉପଯୁକ୍ତ ଯତ୍ନ ନେଲା ପରେ ଏବେ ଉତ୍ସାହଜନକ ଫଳ ପାଇଛନ୍ତି । ପ୍ରତି ଗଛ ପିଛା ଅନ୍ୟୁନ ୫୦୦ ଗ୍ରାମ ଅଳେଇଚ ଫଳିପାରୁଛି । ଗୋଟିଏ ଏକରରେ ୧୫/୧୫ ଫୁଟ୍ ବ୍ୟବଧାନରେ ଗୋଟିଏ ଲେଖାଏଁ ଚାରା ଲଗାଇଲେ ବି ପ୍ରାୟ ୨୦୦ ଗଛ ଲାଗିପାରୁଛି । ଚାରାରୋପଣର ୪ ବର୍ଷ ପରେ ଅଳେଇଚ ଫଳିବା ଆରମ୍ଭ ହେଉଛି । ଥରେ ଲଗାଗଲେ ଏହା ୨୫ରୁ ୩୦ ବର୍ଷ ପର୍ଯ୍ୟନ୍ତ ଉତ୍ପାଦନ ଦେଉଛି । କେବଳ ସାର, ଖତ ଏବଂ ଯତ୍ନ ନେବାର ଆବଶ୍ୟକତା ରହିଛି । ସାଧାରଣତଃ ମାର୍ଚ୍ଚ, ଏପ୍ରିଲ୍ ଓ ମେ ମାସରେ ଅଳେଇଚ ଗଛରେ ଫୁଲ ଧରିଥାଏ । ଡିସେମ୍ବର ବେଳକୁ ଉତ୍ପାଦନ ହୋଇଥାଏ । ଭଲ ଚାଷ ପାଇଁ ଶତକଡ଼ା ୬୦ ଭାଗ ଜୈବିକ ଖତ ସହ ୪୦ ଭାଗ ରାସାୟନିକ ସାର ବ୍ୟବହାର କରିବାକୁ ପଡୁଛି । ବ୍ୟବସାୟିକ ଭିତ୍ତିରେ ଚାଷ କରାଗଲେ ଗୋଟିଏ ଏକରରୁ ଅତି କମ୍ରେ ୧ କ୍ୱିଣ୍ଟାଲ ପର୍ଯ୍ୟନ୍ତ ଅଳେଇଚ ଉତ୍ପାଦନ ହୋଇପାରୁଛି । ଯାହାର ବଜାର ମୂଲ୍ୟ ଏବେ କ୍ୱିଣ୍ଟାଲ ପିଛା ରହିଛି ଅଢେଇ ଲକ୍ଷ ଟଙ୍କା । ଏକର ପିଛା ୫୦ ହଜାର ଟଙ୍କା ଖର୍ଚ୍ଚ ଗଲେ ବି ଲାଭ ପ୍ରାୟ ୨ ଲକ୍ଷ ଟଙ୍କା ମିଳିପାରିବ ।
ସବୁଠୁ ବଡ଼କଥା ହେଉଛି, ଏହା କଫି, ଗୋଲମରିଚ ଏବଂ ଡାଲଚିନି ଚାଷ ସହ ଏକସଙ୍ଗେ ହୋଇପାରୁଛି । ଏସବୁ ଚାଷ ବେଶ ଲାଭଜନକ । ରାଜ୍ୟ ସରକାରଙ୍କ ଉଦ୍ୟାନ ବିଭାଗ, ପଟ୍ଟାଙ୍ଗିରେ ଥିବା ଗବେଷଣା କେନ୍ଦ୍ର ଏବଂ ବ୍ରାଉନଭ୍ୟାଲି କଫି ବଗିଚାରୁ ବର୍ଷା ଦିନ ପୂର୍ବରୁ ଚାଷୀ ଚାହିଁଲେ ଚାରା ନେଇପାରିବେ । ସୁଜୟ କହିଛନ୍ତି, ଏବେ କୋରାପୁଟ କଫିକୁ ବିଶ୍ୱସ୍ତରରେ ପହଞ୍ଚାଇବା ପାଇଁ ସରକାରଙ୍କ ତରଫରୁ କ୍ଷୁଦ୍ର ଚାଷୀଙ୍କୁ ସଶକ୍ତିକରଣ କରାଯାଉଛି । ସେହି ବଗିଚାରେ କଫି ସାଙ୍ଗକୁ ଅଳେଇଚ ଚାଷ କରାଗଲେ ବହୁ ଚାଷୀ ଲାଭବାନ ହୋଇପାରିବେ ।
ଏବେ ତାଙ୍କ ବଗିଚାରେ କଫି ସାଙ୍ଗକୁ ଗୋଲମରିଚ, ଅଳେଇଚ, ବତେଇ, ସପୁରୀ, କମଳା ଏବଂ ହଳଦୀ ଚାଷ ସଫଳତାର ସହ ହୋଇପାରୁଛି । ନିକଟରେ ତାଙ୍କ ଅଳେଇଚ ବଗିଚା ପରିଦର୍ଶନ କରିଥିଲେ ନାଇଜର୍ର ରସାୟନ ବିଭାଗ ମୁଖ୍ୟ ପ୍ରଫେସର ହିମାଂଶୁ ବିଶ୍ୱାଳ ଏବଂ ବିଶାଖାପାଟଣାର ପ୍ରସିଦ୍ଧ ବୈଜ୍ଞାନିକ ଡ. ୱାଇ.ସତୀଶ ରାଜୁ । କଫି ସହ ଅଳେଇଚ ଚାଷ ଦେଖି ପ୍ରଶଂସା କରିଥିଲେ । ଜିଲ୍ଲାରେ ଥିବା ଏସବୁ ସମ୍ଭାବନା ପ୍ରତି ସମସ୍ତଙ୍କ ଦୃଷ୍ଟି ଆକର୍ଷଣ କରିବାରେ ଶ୍ରୀ ପ୍ରଧାନ ସମର୍ଥ ହୋଇଛନ୍ତି ବୋଲି ବଗିଚାର ଥିବା ବିବିଧତାକୁ ଦେଖିବା ପାଇଁ କଟକରୁ ଆସିଥିବା ବରିଷ୍ଠ ପର୍ଯ୍ୟଟକ ଅସୀମ ପଦ୍ମନାଭ ଦାସ ମଧ୍ୟ କହିଛନ୍ତି । ପଟ୍ଟାଙ୍ଗି କୃଷି ଗବେଷଣା କେନ୍ଦ୍ରର ବୈଜ୍ଞାନିକ ଡ. ପର୍ଶୁରାମ ଶିଆଲ କହିଛନ୍ତି, କୋରାପୁଟ ଜିଲ୍ଲାର ଉଚ୍ଚତା(ହାଇ ଅଲ୍ଟିଚ୍ୟୁଡ୍), ମାଟି ଏବଂ ଜଳବାୟୁ ଅଳେଇଚ ଚାଷ ପାଇଁ ବେଶ ଉପଯୋଗୀ । ଏହି ଚାଷ କରି ଚାଷୀମାନେ ବେଶ୍ ସ୍ୱାବଲମ୍ବୀ ହୋଇପାରିବେ । ସୂଚନାଥାଉକି, ଗତ ୨ ବର୍ଷ ହେଲା ଉଦ୍ୟାନ ବିଭାଗ ଏହି ଚାଷକୁ ଜିଲ୍ଲାରେ ସାମିଲ କରିଥିବା ଜଣାପଡିଛି ।
