ନୀଳଗିରି,୨୯/୧୦ : ବାତ୍ୟା ଦାନା ପ୍ରଭାବରେ ଅନେକ ଘର ଭାଙ୍ଗି ଯିବାରୁ ପରିବାର ଅସହାୟ ହୋଇ ପଡିଛନ୍ତି। କେଉଁଠି ମୁଣ୍ଡ ଗୁଞ୍ଜିବେ କିଭଳି ପରିବାର ନେଇ ଚଳିବେ ଏ ନେଇ ଚିନ୍ତାରେ ପଡିଛନ୍ତି ଲୋକେ । ଏଭଳି ଜଣେ ପରିବାର ଅଛନ୍ତି ଯେଉଁ ମାନେ କି ବାତ୍ୟା ପାଇଁ ଅଣ୍ଟା ସଳଖି ପାରୁନାହାନ୍ତି। 

ସୂଚନାଯୋଗ୍ୟ ବାଲେଶ୍ଵର ଜିଲ୍ଲା ନୀଳଗିରି ଅଞ୍ଚଳରେ ବାତ୍ୟା ଦାନା ପ୍ରଭାବରେ ଶତାଧିକ ଚାଳ ଛପର, ଟାଇଲ ଓ ଆଜବେଷ୍ଟ ଘର ନଷ୍ଟ ହୋଇଯାଇଛି । ନୀଳଗିରି ବ୍ଲକ ଭଉଁରିଆବାଡ଼ ପଞ୍ଚାୟତ ସ୍ୱର୍ଗତ ଫକୀର ମୋହନ ନାୟକଙ୍କ ପୁଅ ଟିକାୟତ ନାୟକଙ୍କ ୩ ବଖରା ଟାଇଲ ଛପର ମାଟି ଘର ଟି ସମ୍ପୂର୍ଣ୍ଣ ନଷ୍ଟ ହୋଇଯାଇଛି । ଶ୍ରୀ ନାୟକ ପେଶାରେ ଜଣେ ସାମ୍ବାଦିକ ହୋଇଥିବାବେଳେ ସେ ଗରିବ ଅଟନ୍ତି । ଘରର ମାଟି କାନ୍ଥ ଭୁଶୁଡି କବାଟ, ଝରକା ଭାଙ୍ଗିଥିବାବେଳେ ଧାନ ଚାଉଳ ଓ ଆସବାବପତ୍ର ନଷ୍ଟ ହୋଇଯାଇଛି । 

ଲକ୍ଷ ଲକ୍ଷ ଟଙ୍କାର ଘର ଓ ସାମଗ୍ରୀ ନଷ୍ଟ ହୋଇଯିବାରୁ ପରିବାର ଲୋକେ ଏବେ ସମ୍ପୂର୍ଣ୍ଣ ଭାଙ୍ଗି ପଡିଛନ୍ତି । ଘର ଟି ବିପଦ ସଂକୁଳ ଅବସ୍ଥାରେ ଥିବାବେଳେ ଏବେ ପରିବାର ସହ ରହିବା ଅସମ୍ଭବ ହୋଇପଡିଛି । ତୁରନ୍ତ ତାଙ୍କୁ କ୍ଷତିପୂରଣ ଦେବା ସହ ପ୍ରଧାନମନ୍ତ୍ରୀ ଆବାସ ଯୋଜନାରେ ଘର ଯୋଗାଇ ଦେବାକୁ ସ୍ଥାନୀୟ ବିଧାୟକ ସନ୍ତୋଷ ଖଟୁଆ, ବିଡ଼ିଓ ଓ ତହସିଲଦାରଙ୍କୁ ଦାବିପତ୍ର ପ୍ରଦାନ କରିଛନ୍ତି ।