ପୁରୀ, ୩୧/୧୨ : ପୁରୀ ଜିଲ୍ଲା ସତ୍ୟବାଦୀ ବ୍ଲକ ସୁକଳରେ କ୍ଷତିଗ୍ରସ୍ତ ଚାଷୀଙ୍କୁ ଭେଟିଲେ ବିରୋଧୀ ଦଳ ନେତା। ନବୀନ ପଟ୍ଟନାୟକ ସତ୍ୟବାଦୀରେ କ୍ଷତିଗ୍ରସ୍ତ ଅଞ୍ଚଳ ପରିଦର୍ଶନ କରିଛନ୍ତି। ଏହା ସହ ଚାଷୀଙ୍କ ସହ ସିଧାସଳଖ ଆଲୋଚନା କରିଛନ୍ତି। ସମସ୍ତ ଚାଷୀଙ୍କୁ କ୍ଷତିପୂରଣ ମିଳିବ ବୋଲି ପ୍ରତିଶ୍ରୁତି ଦେଇଛନ୍ତି।
ସୂଚନାନୁଯାୟୀ, ବିରୋଧୀ ଦଳ ନେତା ନବୀନ ପଟ୍ଟନାୟକ ସତ୍ୟବାଦୀ ବ୍ଲକ ସୁକଳରେ ପହଞ୍ଚି ଚାଷ କ୍ଷୟକ୍ଷତି ଆକଳନ କରିଛନ୍ତି। କ୍ଷତିଗ୍ରସ୍ତ ଚାଷୀମାନେ ନବୀନଙ୍କୁ ଗଜା ଧାନ ଦେଖାଇଛନ୍ତି। ପରିଦର୍ଶନ ସମୟରେ ନବୀନ ଚାଷୀମାନଙ୍କ ସହ ସିଧାସଳଖ ଆଲୋଚନା କରିଛନ୍ତି। ନବୀନ କହିଛନ୍ତି ଯେ, ଗଞ୍ଜାମ ଭଳି ସତ୍ୟବାଦୀରେ ବି ସମାନ କ୍ଷୟକ୍ଷତି ହୋଇଛି। ଅଦିନିଆ ବର୍ଷାରେ ପ୍ରବଳ କ୍ଷତି ହୋଇଛି। ଯାହାକୁ ନେଇ ଚାଷୀ ଚିନ୍ତାରେ ଅଛନ୍ତି। ଚାଷ ଉଜୁଡ଼ିଥିବାରୁ ଚାଷୀ ଆତ୍ମହତ୍ୟା ଏବେ ଗୋଟିଏ ବଡ଼ ସମସ୍ୟା ହୋଇ ସୃଷ୍ଟି ହୋଇଛି। ତେଣୁ ବିଜେଡି ସରକାର ଚାଷୀଙ୍କ ପାଖରେ ଯେମିତି ପହଞ୍ଚୁଥିଲା ବିଜେପି ସରକାର ସେମିତି ପହଞ୍ଚିବା ଜରୁରୀ ହୋଇପଡିଛି।
